नौ देशबाट नेपाल आउन प्रतिबन्ध, क्वारेन्टिनको व्यवस्था गर्न टोली गठन- समाचार - कान्तिपुर समाचार
कान्तिपुर वेबसाईट
AdvertisementAdvertisement

नौ देशबाट नेपाल आउन प्रतिबन्ध, क्वारेन्टिनको व्यवस्था गर्न टोली गठन

यी हुन् प्रतिबन्ध लगाइएका मुलुक : दक्षिण अफ्रिका, बोत्सवाना, जिम्बावे, नामिविया । लोसोथो, इसवाटिनी, मोजाम्विक, मलावी र हङकङ
मातृका दाहाल

काठमाडौँ — सरकारले कोरोना भाइरसको नयाँ भेरिएन्ट ‘ओमीक्रोन’ विरुद्ध प्रतिकार्य योजना लागू गर्दै दक्षिण अफ्रिकासहित ९ देशबाट नेपाल आउन प्रतिबन्ध लगाएको छ । बिहीबार रातिदेखि लागू हुने गरी दक्षिण अफ्रिका, बोत्सवाना, जिम्बाबे, नामिविया, लोसोथो, इसवाटिनी, मोजाम्विक, मलावी र हङकङबाट नेपाल आउन रोक लगाइएको हो ।

यी मुलुकलाई ट्रान्जिट बनाएर आउने अरु देशका नागरिकलाई पनि अर्को आदेश नभएसम्मका लागि प्रवेशमा रोक लगाइएको हो । जोखिमयुक्त मुलुकमा अत्यावश्यक कामबाहेक अनावश्यक यात्रा नगर्न पनि सरकारले आग्रह गरेको छ । नेपालबाट विदेश जाने कर्मचारीले पूर्वस्वीकृतिसमेत लिनु पर्ने छ ।

त्यस्तै प्रतिबन्ध लगाइएका मुलुकको यात्रा गरेर तीन साता अवधि पूरा नगरेका अरु देशका नागरिकलाई पनि नेपाल प्रवेशमा प्रतिबन्ध लगाइएको छ । आदेश जारी भएका बखत नेपाल भ्रमणका लागि ट्रान्जिटमा रहेका यात्रुलाई भने नेपाल आएपछि आफ्नै खर्चमा सात दिन क्वारेन्टाइनमा राख्ने निर्णय भएको छ ।

सोमबारको मन्त्रिपरिषद् बैठकले कोरोनाको नयाँ भेरिएन्ट ओमिक्रोन फैलिन नदिन तथा त्यस विरुद्ध प्रतिकार्य योजना लागू गर्ने गर्ने ‘विदेशबाट नेपाल आगमन हुने र नेपालबाट प्रस्थान गर्ने यात्रुहरुको यात्रा व्यवस्थापनसम्बन्धी आदेश–२०७८’ जारी गरेको थियो । सोही आदेशअनुसार दक्षिण अफ्रिकासहित ९ मुलुक र ती मुलुकहरुलाई ट्रान्जिट बनाएर नेपाल आउन रोक लगाइएको र त्यसको कार्यान्वयनका लागि सम्बन्धित संयन्त्रलाई परिपत्र गरिएको गृह मन्त्रालयका प्रवक्ता फणीन्द्रमणि पोखरेलले जानकारी दिए । यो निर्णयसँगै दक्षिण र उत्तरतर्फका अन्तर्राष्ट्रिय नाका र त्रिभुवन अन्तर्राष्ट्रिय विमानस्थलमा सुरक्षा जाँचमा कडाई पारिएको छ । कूटनीतिक र अफिसियल तथा अत्यावश्यक यात्राका लागि भने तोकिएको जनस्वास्थ्यसम्बन्धी मापदण्ड पालना गर्ने गरी प्रवेश दिइने निर्णय भएको गृह मन्त्रालयले जनाएको छ । गृहले मन्त्रिपरिषदको निर्णय कार्यान्वयनका लागि नेपाल प्रहरी, सशस्त्र प्रहरी बल (एपीएफ), राष्ट्रिय अनुसन्धान विभाग र अध्यागमन विभाग तथा ७७ वटै जिल्ला प्रशासन कार्यालयलाई परिपत्र गरेको छ ।

प्रतिबन्ध लगाइएका बाहेक अन्य मुलुकमा संक्रमणको अवस्था र जोखिम हेरेर स्वास्थ्य तथा जनसंख्या मन्त्रालयले जोखिमयुक्त मुलुकको पहिचान गरी त्यसको जानकारी अध्यागमन विभागलाई गराउन पनि निर्देशन दिइएको छ । त्यसकै आधारमा अध्यागमन विभागबाट ‘ट्राभल एडभाइजरी’ जारी हुने गृह मन्त्रालयले जनाएको छ ।

क्यारेन्टिन व्यवस्था गर्न टोली गठन

विभिन्न देशका कोरोनाको नयाँ भेरिएन्ट ओमिक्रोन देखापरेसँगै नेपालमा त्यसको रोकथाम तथा नियन्त्रणका लागि मन्त्रिपरिषद बैठकले कोभिड–संकट व्यवस्थापन केन्द्र (सीसीएमसी)को अगुवाइमा क्वारेन्टिन व्यवस्थापन टोली गठन गर्न निर्देशन दिएको छ । दक्षिण अफ्रिकासहित ९ देश, यी देशलाई ट्रान्जिट बनाएर आउने अरु देशका नागरिक तथा जोखिमयुक्त देशको यात्रा गरेर तीन साता अवधि नपुगेका व्यक्तिमाथी प्रवेशमा कडाई गरेसँगै सरकारले आन्तरिक तयारी स्वरुप व्यवस्थित क्वारेन्टिनको जोहो गर्न टोली गठन गरेको हो । टोलीमा सीसीएमसीका अधिकारीसहित गृह मन्त्रालय, संस्कृति पर्यटन तथा नागरिक उड्ययन मन्त्रालय, स्वास्थ्य तथा जनसंख्या मन्त्रालय तथा चारवटै सुरक्षा निकायका प्रतिनिधि समाबेस गरिएको छ । टोलीलाई तोकिएका क्वारिन्टिनको अनुगमन गर्न पनि जिम्मेवारी दिइएको छ । क्वारिन्टिन अवधिमा संक्रमणको कुनै लक्षण देखिए तत्काल अस्पताल वा आइसोलेसनमा पठाइने र अन्यको हकमा सातदिन पछि पीसीआर परीक्षण गरेर गन्तव्यमा जान दिइने छ । नेपालमा नया भेरिएन्ट फैलिन नदिन विदेशबाट आएका व्यक्तिमा संक्रमणको लक्षण देखिए उनीहरुसँगै यात्रा गर्नेको कन्ट्याक्ट ट्रेसिङ गर्न पनि सीसीएमसीलाई निर्देशन दिइएको छ । यस्तै सरकारले संक्रमण रोकथाम तथा नियन्त्रणका लागि प्रतिदिन २ लाख मानिसलाई खोपको व्यवस्था मिलाउन पनि निर्देशन दिइएको छ ।

प्रकाशित : मंसिर १६, २०७८ २१:२६
प्रतिक्रिया
पठाउनुहोस्

भारतमा देखियो ओमिक्रोन, नेपाल पनि जोखिममा 

विज्ञ भन्छन् –‘खोप सबैलाई र फ्रन्टलाइनरलाई बुस्टर डोज आवश्यक’
बुनु थारु

काठमाडौँ — तीव्र गतिमा फैलिरहेको नयाँ भेरिएन्ट ओमिक्रोन छिमेकी देश भारतमा पुष्टि भएसँगै नेपाल पनि जोखिममा परेको छ । बिहीबार दुई जनामा पुष्टि भएको भारतको स्वास्थ्य तथा परिवार कल्याण मन्त्रालयले जनाएको छ । ६६ वर्ष र ४६ वर्षका पुरुषमा यो भेरिएन्ट पुष्टि भएको छ । सबैभन्दा पहिले नोभेम्बर २४ मा दक्षिण अफ्रिकामा यो भेरिएन्ट पुष्टि भएकोमा बिहीबार साँझसम्म भारत गरी ३० देशमा  फैलिसकेको छ र ३७५ जना संक्रमित भइसकेका छन् ।

विश्व स्वास्थ्य संगठनले ओमिक्रोनलाई भेरिएन्ट अफ कन्सर्न भनेर घोषणा गरिसकेको यो भेरिएन्ट ठूलो संख्यामा उत्परिवर्तित भएको र तीव्र रूपमा फैलिने भन्दै वैज्ञानिकहरुले बताइरहेका छन् । दक्षिण अफ्रिका, अमेरिका, क्यानडा, बोट्सवाना, जर्मनी, इजरायल, बेलायत, बेल्जियम आदि देशमा यो भेरिएन्ट देखा परिसकेका छन् ।

संक्रामक रोग विशेषज्ञ डा अनुप सुवेदीले यो भेरिएन्ट संक्रमणशील भएको अनुमान गरिएकाले संसारमै फैलिरहेको बेला भारतमा देखिनु स्वाभाविक भएको बताए । उनका अनुसार नेपालसँग अझै पनि केही हप्ताको समय बाँकी रहेको छ ।‘नेपालमा आउनै नसक्ने बनाउन त सकिँदैन तर एकैचोटी यो भेरिएन्ट धेरै संख्यामा नआओस् भनेर कोसिस गर्न सक्छौं ’उनले भने ।

उनले हवाईमार्गबाट बढी संक्रमण आउन सक्ने भन्दै आउने यात्रुलाई अनिवार्य क्वारेन्टाइन, खोप लगाए पनि परीक्षण गर्नुपर्ने बताए । डा अनुप भन्छन् –‘भारतमा केश बढ्न थालेपछि नाकामा समस्या हुन सक्छ । स्थायी खालको क्वारेन्टाइन बनाउने कुरा गरिएको छ त्यो तुरुन्त काम थालनी गरिहाल्नुपर्छ । अनि नाकामा परीक्षण गर्न सक्ने बन्दोबस्त गर्न सक्नुपर्छ । त्यसो गर्दा सुरुमा धेरै मान्छे पस्न पाएनन् भने एकैचोटी संक्रमणको संख्या ह्वात्तै बढ्दैन। अलिकति नियन्त्रित तरिकाले बढ्छ र त्यसले हामो स्वास्थ्य संयन्त्रण अस्तव्यस्त बनाउन सक्दैन।’

उनले नेपाल छिर्ने यात्रुको कडाइ नगरे तथा परीक्षण र कन्ट्याक्ट ट्रेसिङ गर्न सकिएन भने ठूलो लहरको सामना गर्नुपर्ने खतरा रहेको औंल्याए । उनका अनुसार खोप सकेसम्म धेरैलाई लगाउन आवश्यक रहेको र फ्रन्टलाइन कर्मचारीहरुलाई बुस्टर डोज लगाउनुपर्ने सुझाए । उनका अनुसार सरकारले अहिले नेपालमा कोरोना संक्रमणको संख्या कम भएको हुँदा नै परीक्षण तथा कन्ट्याक्ट ट्रेसिङ अहिले नै समुदायमा गरिए परिस्थिति नियन्त्रणभन्दा बाहिर जान सक्दैन ।

ओमिक्रोनको जोखिमका कारण सरकारले बुधबार आवश्यक नपरेको खण्डमा विदेश भ्रमण नगर्न आग्रहसमेत गरेको छ । स्वास्थ्य मन्त्रालयले दक्षिण अफ्रिकाबाट आउनेहरूको हेल्थ डेस्कमा परीक्षण, सिक्वेसन्सिङ र क्वारेन्टाइन गरिरहेको बताएको छ ।

स्वास्थ्य मन्त्रालयका सहप्रवक्ता डा समीरकुमार अधिकारीले सरकारले भारतमा देखिएसँगै नेपाल पनि जोखिममा भएकाले यसतर्फ सचेत रहेको बताउँदै आवश्यक निगरानी गरिरहेको बताए ।

अहिले विश्वव्यापीकरण यति तीव्र छ कि हामीले कुनै सीमाभित्र भाइरस रहन्छ भन्ने कुरा व्यवहारिक र सम्भव हुँदैहुँदैन । कहीं न कहींबाट एक देशबाट अर्को देशमा जाने सक्ने सम्भावनाहरु एकदमै रहेकोले सरकारले निगरानी गर्ने सकेसम्म चाँडै पत्ता लगाउने, नाकामा प्रवेश गर्ने व्यक्तिलाई अनिवार्य क्वारेन्टिनको व्यवस्थाहरु गरेको छ ।

उनले नेपाल प्रवेश गर्नेले अनिवार्य कोरोना संक्रमणको परीक्षण गरेर आउनुपर्ने व्यवस्था गरिएको बताउँदै त्यसरी आएका व्यक्तिहरुमध्ये संक्रमण पुष्टि भएका नमुनामध्ये जीन सिक्वेन्सिङ गरेर कुन भेरियन्ट हो भन्ने पत्ता लगाउने काम सम्बन्धित निकायहरुसँग समन्वय गरेर कामहरु अगाडि बढिसकेको बताए ।

‘हामीले सिक्वेन्सिङहरु नियमित जीन सिक्वेन्सिङ गरिराखेका छौं र अन्तराष्ट्रिय रुपमा समझदारी भएका निकायहरुसँग पनि समन्वयमा नमुनाहरु पठाइराखेका छौं’, उनले भने ।

उनले संक्रमण फैलिन नदिन देशभित्र जनस्वास्थ्यका मापदण्डका कुराहरुलाई लिएर अलि बढी व्यवहारमा लानुपर्ने जरुरी रहेको बताए छ । ‘तीव्र गतिमा यो बारे सोचिएन र व्यवहारमा ल्याउन सकेनौं भने स्थलमार्गबाट वा हवाई मार्गबाट संक्रमण फैलिने डर छ । कोभिडविरुद्धको खोप अहिले पनि प्रभावकारी रहेको कुरा आएको छ । खोपलाई तीव्र गतिमा सबै मान्छेलाई लगाइ सक्ने गरी कामहरु सरकारले गरिराखेको छ,’उनले भने ।

अहिलेसम्म कहाँ कति देखा परे?

भारत – २

दक्षिण अफ्रिका – १८३

बोत्सवाना – १९

नेदरल्याण्ड्स – १६

हङकङ – ७

इजरायल – २

बेल्जियम – २

बेलायत – ३२

जर्मनी – १०

अष्ट्रेलिया – ८

इटाली – ४

चेकिया – १

डेनमार्क – ६

अस्ट्रिया – ४

क्यानाडा – ७

स्वीडेन – ४

स्विजरल्याण्ड – ३

स्पेन – २

पोर्चुगल – १३

जापान – २

फ्रान्स – १

घाना – ३३

दक्षिण कोरिया – ३

नाइजेरिया – २

ब्राजिल – २

नर्वे – २

अमेरिका – १

साउदी अरेबिया – १

आयरल्याण्ड – १

संयुक्त अरब इमिरेट्स – १

प्रकाशित : मंसिर १६, २०७८ २१:२३
पूरा पढ्नुहोस्
प्रतिक्रिया
पठाउनुहोस्
×