मंसिर १७ गतेदेखि आफू बसेको ठाउँबाट नै मतदाता नामावली दर्ता गर्न सकिने- समाचार - कान्तिपुर समाचार
कान्तिपुर वेबसाईट
AdvertisementAdvertisement

मंसिर १७ गतेदेखि आफू बसेको ठाउँबाट नै मतदाता नामावली दर्ता गर्न सकिने

कान्तिपुर संवाददाता

काठमाडौँ — निर्वाचन आयोगले मंसिर १७ गतेदेखि आफू बसेको ठाउँबाट नै मतदाता नामावली दर्ता गर्न सकिने व्यवस्था गर्ने भएको छ । बुधबार काठमाडौंमा निर्वाचन पर्यवेक्षण समिति नेपालले आयोजना गरेको निर्वाचनसँग सम्बन्धित समसामयिक विषयहरुमा गरिएको अन्तरक्रियामा निर्वाचन आयोगका प्रमुख आयुक्त दिनेशकुमार थपलियाले अब आफू बसेको ठाउँबाट नै मतदाता नामावली दर्ता गर्न सकिने व्यवस्था गरेको बताएका हुन् ।


उनले अब ७७ वटा जिल्ला निर्वाचन कार्यालय, ७७ वटा जिल्ला प्रशासन कार्यालय र सबै इलाका प्रशासन कार्यालयबाट जुनसुकै समयमा पनि मतदाता नामावली दर्ता गर्न सकिने व्यवस्था गरेको पनि बताए ।

प्रमुख आयुक्त थपलियाले आउँदो माघ १२ गते राष्ट्रियसभाको चुनाव गर्न आयोगको तयारी भइरहेको बताए । उनले उपनिर्वाचनका लागि अहिले २२ स्थान रिक्त रहेको र सरकारले मिति तोके उपनिर्वाचन गराउन आयोग तयार रहेको पनि बताए । त्यस्तै, आयोगले आउँदो जेठको ५ गते स्थानीय तहका सबै पदाधिकारीहरुको पद रिक्त हुने भएकोले त्यो अगावै स्थानीय तहको निर्वाचन गराउन आवश्यक तयारी प्रारम्भ गरेको छ ।

प्रमुख आयुक्त थपलियाले अब उम्मेद्‌वारी घोषणा गर्दा उम्मेद्‌वारको सम्पत्ति विवरण लिने कानून पनि आयोगले बनाएको बताए । थपलियाले निर्वाचनको बेलाको हरेक सात/सात दिनमा आम्दानी खर्च सार्वजनिक गर्नुपर्ने नियम बनाएको र त्यसका लागि अब आयोगले यी कुराहरु हेर्नका लागि स्थानीय तहको निर्वाचन हुँदा ७५३ ठाउँमा अनुगमन गर्ने समिति, प्रदेशको निर्वाचन हुँदा ३३० ठाउँमा, प्रतिनिधिसभाको निर्वाचन हुँदा १६५ ठाउँमा अनुगमन समितिको व्यवस्था गरिएको पनि जानकारी दिए । प्रमुख निर्वाचन आयुक्त थपलियाले राष्ट्रियसभाको निर्वाचनमा भने खाता, सम्पत्ति विवरण लगायका कुराहरु स्वयं आयोगले नै हेर्ने पनि बताए ।

संविधान र कानुनका प्रावधानहरु आम मानिसका लागि बाध्यकारी भएझै दलहरुको निम्ति पनि सोही अनुसार बाध्यकारी हुनुपर्ने भन्दै प्रमुख आयुक्त थपिलियाले कानुनले तोकेको अवधिमा काम गर्दै जाने हो भने दलभित्रै नियमन रहेको बताए । उनले कानुनमा केही अपर्याप्तता भएको तर कानून कमजोर नभएको बताए । प्रमुख आयुक्त थपलियाले दलहरु आफैं व्यवस्थित हुनुपर्ने, नियमित हुनुपर्ने र आफैं सुशासन कायम राख्नुपर्ने भन्दै बलियो कानुन बनाएर मात्रै अहिलेको अवस्थामा धेरै राम्रा काम गर्न सकिन्छ भन्ने स्थिती नरहेको प्रस्ट पारे ।

उनले निर्वाचन आयोगले राजनीतिक दलको स्वमूल्यांकन प्रणाली बनाएको र यसभित्र ५ वटा अनुगमनका क्षेत्र तोकेको बताउँदै यसका लागि ७५ वटा सूचकहरु बनाइएको बताए । उनले कुन राजनीतिक दलले कानून, नीति, नियम मान्छ भनेर १०० अंकमा मूल्यांकन गर्ने र आवश्यक्ता अनुसार सार्वजनिक गर्ने बताए ।

प्रकाशित : मंसिर १५, २०७८ १४:५५
प्रतिक्रिया
पठाउनुहोस्

नेपाल दुई दशकभित्रै समुन्नत राष्ट्र : प्रधानमन्त्री देउवा

'सरकार निजी क्षेत्रलाई नियन्त्रणको पक्षमा छैन, तपाईंको लगानी र सम्पत्तिको सुरक्षा हुन्छ'
कान्तिपुर संवाददाता

काठमाडौँ — प्रधानमन्त्री शेरबहादुर देउवाले नेपाललाई अबको ५ वर्षभित्र विकासशील र दुई दशक (वि.सं २१००) सम्ममा समुन्नत राष्ट्र बनाउनका लागि दोस्रो चरणको आर्थिक सुधार आवश्यक रहेको बताएका छन् । दोस्रो चरणको सुधारका लागि नीति नियम र आवश्यक पूर्वाधार निर्माणसँगै निजी क्षेत्रको भूमिका पनि बढाउने पक्षमा सरकार रहेको प्रधानमन्त्री देउवाले बताए ।

बुधबार नेपाल आर्थिक पत्रकार समाज (सेजन) को २५ औं वार्षिकोत्सव समारोहमा बोल्दै देउवाले यसअघि मुलुकले अवलम्बन गरेको खुला बजार अर्थनीतिका कारण हासिल गरेको उपलब्धीलाई दोस्रो चरणको आर्थिक सुधारमार्फत संस्थागत गरिनुपर्नेमा जोड दिए । त्यसका लागि निजी क्षेत्रको भूमिका अपरिहार्य हुने बताए । दोस्रो चरणको सुधारका लागि सरकार आवश्यक नीति, कानुन, रणनीति, योजना तथा संरचना निर्माणका लागि तयार रहेको उनको भनाइ छ । सरकार निजी क्षेत्रलाई अनावश्यक नियन्त्रण गर्ने पक्षमा नरहेको देउवाको भनाइ छ । नेपाललाई केही समयअघिमात्र संयूक्त राष्ट्रसंघको महासभाले विकासोन्मुखबाट विकासशील राष्ट्रमा बढुवा गर्ने प्रस्ताव अनुमोदन गरेको थियो । नेपालले सन् २०२६ सम्ममा विकासशील राष्ट्र बन्नका लागि तयारी अवधि पाएको छ । त्यस्तै, सन् २०३० सम्ममा दिगो विकास सम्बन्धी सबै लक्ष्य पुरा गर्ने नेपालको योजना छ ।

‘दोस्रो चरणको आर्थिक सुधारले नेपाललाई विकसित राष्ट्रको रुपमा स्थापित गर्न सहयोग पुग्नेछ,’ प्रधानमन्त्री देउवाले भने, ‘कतिपय साथीहरुलाई सुधार भन्ने शब्द मन नपर्न सक्छ, तर आधारभूत रुपमा मुलुकका सबै राजनीतिक दलले यो एजेन्डा स्वीकृत गरेका छन् ।’

दोस्रो चरणको आर्थिक सुधारका लागि अब ढिलाई गर्न नहुने पनि प्रधानमन्त्री देउवाको भनाइ छ । राजनीतिक उतार–चढाव, प्राकृतिक प्रकोप र कोभिड १९ महामारीका कारण नेपालको अर्थतन्त्र निकै पछि परिसकेको र अब सुधार प्रकृया थालनी गर्न लामो समय नरेको उनले बताए । त्यस्तै, नेपालमा लगानी र व्यवसायको वातावरण बनाउनका लागि सरकार प्रतिवद्ध रहेको उनले बताए । ‘सरकार अनावश्यक नियन्त्रणको पक्षमा छैन, बरु आवश्यक नियमन र सहजीकरणको पक्षमा छ,’ प्रधानमन्त्री देउवाले भने, ‘त्यसैले देश तथा विदेशका लगानीकर्तालाई ढुक्क भएर नेपालमा लगानी गर्न आग्रह गर्छु । नेपालमा तपाईको लगानी र सम्पत्तिको सुरक्षा हुन्छ । सरकारले त्यसको ग्यारेन्टी लिन्छ ।’

त्यस्तै, अर्थमन्त्री जनार्दन शर्माले आर्थिक सुधारका प्रयास भइरहेको र विभिन्न नीतिगत व्यवस्थाले निजी तथा बाह्य क्षेत्रलाई थप सशक्त बनाउँदै लगेको बताएका छन् । ‘आर्थिक सुधारका लागि प्रयासहरु भइरहेका छन् । सार्वजनिक खरिद नियमावलीमा संशोधन, विदेशी मुद्रामा बैंक खाता खोल्ने लगायतका सुधारका प्रयास भइरहेका छन्,’ अर्थमन्त्री शर्माले भने ।

सेजनले आफ्नो रजत जयन्तीका अवसरमा हिमाल खबर डटकमका रमेश कुमार न्यौपाने र अन्नपूर्ण पोस्ट दैनिककी सुनीता कार्कीलाई सेजन अवार्डबाट सम्मानित गरेको छ । वर्षभरीमा प्रकाशित आर्थिक समाचारहरुमध्येबाट परेका प्रस्तावमध्ये अनलाइन र छापा गरी दुई विधामा अवार्ड दिइएको हो । त्यस्तै, सेजनका पूर्व उपाध्यक्ष सन्जय न्यौपानेको स्मृतिमा स्थापना भएको ‘सन्जय न्यौपाने रिसर्च ग्रान्ट’ कारोबार दैनिककी सरस्वती ढकाललाई दिइएको छ भने ‘सेजन हाइड्रो फेलोसिप अवार्ड’ नागरिक दैनिकका हिमाल लम्साललाई दिइएको छ ।


प्रकाशित : मंसिर १५, २०७८ १४:४४
पूरा पढ्नुहोस्
प्रतिक्रिया
पठाउनुहोस्
×