विश्वप्रकाशलाई देउवाको सुझाव– ‘अहिले नहतारिनुस्’- समाचार - कान्तिपुर समाचार
कान्तिपुर वेबसाईट
AdvertisementAdvertisement

विश्वप्रकाशलाई देउवाको सुझाव– ‘अहिले नहतारिनुस्’

कान्तिपुर संवाददाता

काठमाडौँ — प्रधानमन्त्री एवम् कांग्रेस सभापति शेरबहादुर देउवाले बाहिरबाट अरुले भनेको जस्तो निर्णय गर्न सहज नभएको बताएका छन् । काठमाडौंमा नेता रामचन्द्र घिमिरेद्वारा लिखित ‘राजनेता शुवर्ण शमशेर’ पुस्तक विमोचन गर्दै प्रधानमन्त्री देउवाले जिम्मेवारीमा बसेर निर्णय गर्न भन्न जति सहज नभएको बताए । 

कार्यक्रममा बोल्दै प्रवक्ता विश्वप्रकाश शर्माले १४ औँ महाधिवेशनबाट पार्टीमा रुपान्तरण आवश्यक रहेको भन्दै राजनीतिमा परिवर्तनका लागि ‘वान, टु, थ्री, फोर’को प्रस्ताव अघि सारेको बताएका थिए ।

जवाफमा देउवाले आफूले त्यति नै गर्न सकेको भन्दै नहतारिन सुझाव दिए । ‘अहिले नहतारिनुस् । अहिले हतारिएर केही हुँदैन । अब पालो तपाईंहरूकै हो । तपाईंहरूको पनि पालो आउँछ । त्यतिबेला कस्तो गर्नुहुन्छ, हेरौँला, भन्न सजिलो छ, गर्न गाह्रो छ,’ देउवाले भनेका थिए । देउवाले पार्टीमा आफूले परिपक्क निर्णय गर्ने गर्दा ढिलो हुने गरेको बताएका थिए ।

कार्यक्रममा बोल्दै सहमहामन्त्री प्रकाशशरण महतले देउवाले समयमा निर्णय नगर्दा समस्या हुने गरेको बताएका थिए । ‘निर्णय गर्ने भनेर मात्रै हुँदैन । निर्णय कस्तो गर्ने भन्ने कुरा मुख्य हो । निर्णय गर्दा परिपक्क निर्णय गर्नुपर्छ । निर्णय गरेर पछुताउनुभन्दा निर्णय नगर्नु नै राम्रो हुन्छ,’ देउवाले जवाफमा भनेका थिए ।

उनले कांग्रेसका संस्थापक नेता शुवर्ण शमशेरले कांग्रेस र नेपाली राजनीतिमा महत्वपूर्ण योगदान पुर्‍याएको स्मरण गरे ।

प्रकाशित : मंसिर १४, २०७८ १७:३४
प्रतिक्रिया
पठाउनुहोस्

त्रिभुवन विमानस्थलबाट एकै दिन २१ केजी सुन बरामद 

कान्तिपुर संवाददाता

काठमाडौँ — एकै दिन त्रिभुवन अन्तर्राष्ट्रिय विमानस्थलबाट २१ केजी सुन बरामद भएको छ । सोमबार विदेशबाट नेपाल आएका ४ सय १५ जना यात्रुबाट २१ केजी बराबर सुन बरामद गरिएको त्रिभुवन अन्तर्राष्ट्रिय विमानस्थल भन्सार कार्यालका प्रमुख, प्रशासक महेश भट्टराईले जानकारी दिए ।

‘सोमबार भएको घटना हो । ४ सय १५ जना यात्रुबाट प्रतिव्यक्ति ५०–६० ग्रामसम्म काँचो सुन सिस्टमले पहिचान गर्‍यो,’ उनले भने, ‘यसलाई हामीले नियन्त्रणमा लिएका छौं, भन्सार राजस्व तिर्न लगाएका हौं । जफत गरेका होइनौँ ।’ उनका अनुसार ४ सय १५ जनामध्ये १ सय ९५ यात्रुले भन्सार महशुल तिरेर आफ्नो सुन लगिसकेका छन् । ती यात्रुबाट १० केजी काँचो सुनको भन्सार जाँचपास गरेर करिब ९४ लाख रुपैयाँ राजस्व संकलन भएको उनले बताए ।

‘बाँकी यात्रुले भन्सारकै लकरमा राखेका छन् । हामीले लकरमा राखे बापत एउटा स्लिप दिन्छौँ,’ उनले भने, ‘त्यसको ६० दिनभित्र आफूले तिर्नुपर्ने भन्सार रकम तिरेर लैजान सक्छन् । सोमबार नतिरेकाले आज (मंगलबार) बुझाएर लगिरहेका छन् ।’ उनका अनुसार एक व्यक्तिले सुन आयात गर्दा अधिकतम ५० ग्रामसम्म ल्याउन पाउँछ । यो व्यवस्थाअन्तर्गत प्रति १० ग्राम सुनको ९ हजार ५ सय र त्यो भन्दा माथिको प्रति १० ग्राम १० हजार ५ सय रुपैयाँ भन्सार राजस्व तिर्नुपर्ने हुन्छ ।


प्रकाशित : मंसिर १४, २०७८ १७:२२
पूरा पढ्नुहोस्
प्रतिक्रिया
पठाउनुहोस्
x
×