नाकामा एन्टिजेन पोजिटिभ देखिएकाको नमुना जीन सिक्वेन्सिङका लागि एनपीएचएलमा पठाउनुपर्ने- समाचार - कान्तिपुर समाचार
कान्तिपुर वेबसाईट
AdvertisementAdvertisement

नाकामा एन्टिजेन पोजिटिभ देखिएकाको नमुना जीन सिक्वेन्सिङका लागि एनपीएचएलमा पठाउनुपर्ने

कान्तिपुर संवाददाता

काठमाडौँ — नेपालका विभिन्न नाकामा परीक्षण मापदण्ड अनुसार कोभिड-१९ को एन्टिजेन परीक्षणमा पोजिटिभ देखिएकाहरूको थप नमुना संकलन गरेर जीन सिक्वेन्सिङका लागि राष्ट्रिय जनस्वास्थ्य प्रयोगशाला पठाउन स्वास्थ्य सेवा विभागले हेल्थ डेस्कहरुलाई अनुरोध गरेको छ ।

नेपालमा कोरोना संक्रमण घट्दो क्रममा भएपनि दक्षिण अफ्रिका तथा केही मुलुकहरुमा नयाँ भेरियन्ट 'ओमिक्रोन' देखिएकाले सजगता अपनाउन थप परीक्षण सुरु गर्न विभागले पत्राचार गरेको हो ।

सोमबार एक सूचना जारी गर्दै विभागका महानिर्देशक डा. दीपेन्द्ररमण सिंहले परीक्षण मापदण्डअनुसार एन्टिजेन परीक्षणमा पोजिटिभ आएकाहरुको थप नमुना संकलन गरेर प्रदेश जनस्वास्थ्य प्रयोगशालासँग समन्वय गरी जीन सिक्वेन्सिङका लागि राष्ट्रिय जनस्वास्थ्य प्रयोगशाला टेकुमा नमुना पठाउने व्यवस्था मिलाउन अनुरोध गरेका छन् ।

विभागले राष्ट्रिय जनस्वास्थ्य प्रयोगशालालाई भने नाकाहरुबाट संकलित नुमनाहरुको जीन सिक्वेन्सिङ परीक्षण मिलाउनुपर्ने बताएको छ ।

साथै प्रादेशिक जनस्वास्थ्य प्रयोगशालाले सबै सीमा नाकाहरुमा संकलित कोभिड-१९ एन्टिजेन पोजिटिभ नमुनालाई एनपीएचएलसम्म पुर्‍याउनका लागि समन्वय तथा सहजीकरण गर्न तथा प्रदेश स्वास्थ्य आपतकालीन केन्द्रले संकलित नमुनाहरुलाई राष्ट्रिय प्रयोगशालासम्म पुर्‍याउने व्यवस्था गर्नका लागि सूचनामार्फत आग्रह गरेको छ ।

प्रकाशित : मंसिर १३, २०७८ १६:०२
प्रतिक्रिया
पठाउनुहोस्

नर्भिकमा युरोलोजीको विशेष टिम र बालरोग विशेषज्ञले नि:शुल्क ओपीडी सेवा दिने

कान्तिपुर संवाददाता

काठमाडौँ — थापाथलीस्थित नर्भिक इन्टरनेशनल हस्पिटलमा आगामी शनिबार दुई विशेषज्ञ चिकित्सकले नि:शुल्क ओपीडी सेवा संचालन गर्ने भएका छन् । नर्भिकमा कार्यरत बालरोग विशेषज्ञ डा. यादव ढकाल र वरिष्ठ यूरोलोजिष्ट डा. सुनिल श्रेष्ठ नेतृत्वको टिमले नि:शुल्क ओपीडी सेवा दिने भएका हुन् । 

विभिन्न स्वास्थ्य समस्याबाट पीडित बालबालिकाले डा. ढकालको ओपीडीबाट लाभ लिनसक्ने छन् । यस्तै, प्रोस्टेट ग्रन्थी, मिर्गौला, मुत्रनली, मुत्रथैलीमा पत्थरी भएका लगायतका समस्या भएका बिरामीहरुले डा. सुनिल श्रेष्ठ नेतृत्वको टिमको ओपीडीबाट लाभ लिन सक्ने छन् ।

डा. श्रेष्ठसँगै डा. सञ्जिव श्रेष्ठ लगायतका चिकित्सक तथा स्वास्थ्यकर्मी समेत रहने छन् । शनिबारको नि:शुल्क ओपीडीमा सहभागी हुने बिरामीको शल्यक्रिया गर्नुपरेमा उनीहरुलाई सहुलियत दरको व्यवस्था मिलाइने समेत नर्भिकले जनाएको छ । शनिबार बालरोग विशेषज्ञ डा. ढकालले बिहान १० देखि १२ बजेसम्म र डा. श्रेष्ठ नेतृत्वको यूरोलोजी टिमले बिहान १० देखि ११ बजेसम्म नि:शुल्क ओपीडी संचालन गर्ने छन् ।

नर्भिक अस्पतालले आफ्नो सामाजिक उत्तरदायित्व अन्तर्गत विगत केही महिनादेखि प्रत्येक शनिबार नि:शुल्क ओपीडी सेवालाई संचालन गर्दै आएको छ । नि:शुल्क ओपीडी सेवामा सर्वसाधारणको आकर्षण रहेको छ ।नि:शुल्क ओपीडी सेवा लिन चाहनेले नर्भिक अस्पतालको कल सेन्टरको नम्बर ५९७००३२ मा सम्पर्क गरेर आफ्नो नाम अग्रिम टिपाउन सक्ने सुविधा उपलब्ध छ ।


प्रकाशित : मंसिर १३, २०७८ १५:४७
पूरा पढ्नुहोस्
प्रतिक्रिया
पठाउनुहोस्
×