जिल्ला अधिवेशन नसकिए पनि प्रदेशमा रोकिँदैनः कांग्रेस निर्वाचन समिति

शनिबार बसेको समितिको बैठकले तोकिएकै मितिमा प्रदेश अधिवेशन पूरा गर्ने गरी तयारी अघि बढाएको हो । समितिका सदस्य गोपालकृष्ण घिमिरेले जिल्ला अधिवेशन नसकिए पनि प्रदेश महाधिवेशन नरोकिने बताए ।

‘हाम्रो प्राथमिकता जिल्ला अधिवेशन होइन । प्रदेश र केन्द्रीय महाधिवेशन हो । त्यसैले जिल्ला अधिवेशन नसकिए पनि प्रदेश अधिवेशन रोकिँदैन,’ उनले भने ।

संवैधानिक व्यवस्थाका कारण कांग्रेस मंसिर मसान्तभित्र आफ्नो प्रदेश र केन्द्रीय कार्यसमितिका पदाधिकारीको चुनाव गरेर त्यसको विवरण निर्वाचन आयोगमा बुझाइसक्नुपर्छ । निर्वाचन समितिले मसान्तभित्रै पदाधिकारीको मतपरिणाम आइसक्ने गरी निर्वाचन कार्यक्रमको तयारी अघि बढाएको छ ।

‘हामीसँग समय कम छ, त्यसैले अब त उपाय नै छैन । महाधिवेशन त गर्नैपर्ने अवस्था छ,’ घिमिरेले भने । उनले मंसिर २१ गते नै मनोनयन दर्ता भएर निर्वाचनको प्रक्रिया अघि बढाइने बताए ।

कांग्रेसको केन्द्रीय महाधिवेशन मंसिर २४ देखि २६ गतेसम्म गर्ने कार्यतालिका छ । २४ गते उद्घाटन भएपछि २५ गते नै मतदान गर्ने गरी तयारी भइरहेको समितिले जनाएको छ । केन्द्रीय महाधिवेशनअघि १६ र १७ गते प्रदेश महाधिवेशन हुदैछ । हालसम्म ३५ बढी जिल्लामा अधिवेशन भएको छ ।