भाषण नसुनेरै फर्किए कार्यकर्ता
चितवन — रूपन्देही तिलोत्तमा नगरपालिका–११ का रणसिंह थापा १२ कक्षा पढ्ने छोरी अनिशालाई लिएर एमाले महाधिवेशन उद्घाटन समारोहमा केपी शर्मा ओलीको भाषण सुन्न शुक्रबार चितवन आएका थिए । दिउँसो ३ बजेतिर एमाले अध्यक्ष ओलीको मन्तव्य सुरु हुँदा रणसिंह मञ्चभन्दा धेरै पर पुल्चोकमा हतास मनस्थितिमा भेटिए ।
‘मञ्च भएको ठाउँमा पुग्न सक्ने छाँट देखिएन । घर फर्कने भनेको पुलमा आम्मा कत्रो जाम हो ? भीडले गर्दा छोरी झन्डै बेहोस भई,’ उनले भने, ‘यो अवस्था देखेपछि त छोरी भाषण सुन्न कहीं कतै नजाने हुन्छे कि क्या हो †’ उनीहरू चढेर आएको गाडी पुलपारि थियो । उनले आफ्नो वडाबाट मात्रै आठ वटा बस र २ वटा बलेरो जिपमा मानिस आएको सुनाए ।
पुलको भीड छिचोलेर गैंडाकोटबाट नारायणगढ छिर्न नवलपुर कावासोतीकी वृन्दा गैरेलाई झन्डै डेढ घण्टा लाग्यो । गैरेले पुलको जाम पार गरे पनि नदी किनारको भीड नाघेर मञ्च वरपर पुग्न सकिनन् । त्यसैले उनी पुलनजिक नै बसेर माइकमा सुन्ने प्रयास गरिन् । तर माइकले राम्रोसँग काम नगर्दा को बोलेको हो, के भनेको हो भन्ने मेसो पाइनन् । ‘पार्टीको महाधिवेशन हो । नेताको भाषण सुन्न पाएको भए राम्रै हुन्थ्यो । तर पाइएन । भीड धेरै हुनाले सजिलै ठाउँमा पुग्न सकिएन । पार्टीलाई विश्वास गरेर नै मान्छे आएका रहेछन्, त्यसैले यस्तो भीड भयो,’ गैरेले भनिन् । नवलपुर हुप्सीकोटका मनिका आले, हिरा कानु, गंगीसरा राना सूर्य चिह्न अंकित सेतो झन्डा समाएर बसेका थिए । उद्घाटन कार्यक्रममा आए पनि फर्कन ढिलो हुने भन्दै उनीहरू नेताको भाषण सुन्न बसेनन् । ‘पार्टी फुट्यो भन्थे, फुटेको पार्टीमा पनि यो विधि मान्छे भेटिए । यो राम्रो कुरा हो,’ हुप्सीकोटकै मीनबहादुर सिर्पालीले भने ।
मध्याह्न १२ बजे सुरु गर्ने भनिएको उद्घाटन कार्यक्रममा अध्यक्ष ओली सवा १ बजे बल्ल मञ्चमा उक्लेका थिए । त्यसको तीन घण्टापछि सवा ४ बजे कार्यक्रम समापन भएको थियो । तर त्योभन्दा पहिल्यै रूपन्देही सियारी–४ छपियाका रामकुमार यादव घर फर्कन लागेका थिए । श्रीमती रेखा यादव पनि सँगै थिइन् । ‘हाम्रो बुबा राजनीति गर्नुहुन्छ । म त्यस्तो राजनीति गर्दिनँ तर पार्टीको कार्यक्रममा जाने गर्छु । यसअघि बुटवलमा भएको आठौं महाधिवेशनमा पनि गएको थिएँ । त्योभन्दा यहाँको भीड धेरै ठूलो लाग्यो,’ ४० वर्षीय यादवले भने । उनीसँग कुरा हुँदै गर्दा पार्टी अध्यक्ष ओलीले सम्बोधन गर्दै थिए । तर नदी किनारको पुछारमा बसेका रामकुमारले कसले बोलेको हो, मेसो पाउन सकेनन् । मञ्चभन्दा परपर राखिएका माइकहरूले राम्रोसँग काम नगर्दा बजारतिर भाषण सुन्न सकिएको थिएन । घर फर्कन समय घर्कंदै गएको थियो, त्यसमाथि पुलमा ठूलो जाम थियो । पश्चिम नेपाल लाग्नेहरू चिन्तामा थिए । प्राय:जसो रातारात गाडी चढेर गैंडाकोटसम्म आएका थिए । त्यसपछि पैदलै पुल तरेर उद्घाटन स्थल पुगेका थिए । बिहान खाली देखिएको पुल पछि भरिभराउ भएर मान्छे मात्रै हिँड्न पनि सकस भएको थियो ।
पुल पार हुन लागेजस्तै अप्ठ्यारो नारायणी किनारको पुछारबाट मञ्च भएको सिरानसम्म पुग्न थियो । स्नातक पढ्दै गरेका पुष्पा पाण्डे, प्रिती सापकोटा र चन्दा गौतम शुद्धोधन गाउँपालिका–५ मानपकडीबाट महाधिवेशनको उद्घाटन कार्यक्रममा सहभागी हुन आएका थिए । उनीहरू एमालेको विद्यार्थी संगठन अनेरास्ववियुमा आबद्ध पनि छन् । ‘हामी अध्यक्ष केपी ओलीलाई प्रत्यक्ष देख्न पाइन्छ भनेर आएको हो । बल्लबल्ल मञ्च नजिक पुगेर उहाँलाई हेर्यौं । भाषण सुन्न त मन थियो तर फर्कन बेर हुने भएका हिँड्न लागेको,’ पुष्पाले भनिन् ।
चितवन प्रहरी प्रमुख एसपी ओम अधिकारी मध्याह्नपछि सडकमा ठूलो भीड बढेको बताउँछन् । कार्यक्रम सकिएर फिर्ता हुन थाल्दा राजमार्गमा जताततै लामो जाम भएको उनले बताए । दिउँसो ३ बजे छिचोल्नै गाह्रो हुने गरेर नारायणीको पुलको मुखमा ठूलो जाम थियो । पुलभरि भीड थियो । नारायणगढतर्फ तीन वटा र पुलको मध्यभागमा तीन एम्बुलेन्स पार हुन नसकेर साइरन बजाउँदै बसेका थिए । एमाले प्रचार विभाग प्रमुख योगेश भट्टराईले बिहीबार दिउँसो पत्रकार सम्मेलनमा उद्घाटनको दिन नारायणी किनारलाई ‘मानव समुद्र’ बनाउने बताएका थिए । कार्यक्रममा पाँच लाख जना जुटाउने एमालेको दाबी थियो । सरकारी अधिकारीहरूले कति संख्यामा मान्छे आए आकलन गर्न भ्याएका छैनन् । नारायणी किनार र बजारभर देखिएको भीडले जमघट ठूलै भएको देखाउँथ्यो ।
नारायणी किनारमा बिहीबार मध्यरातै जमघट सुरु भएको थियो । टाढाबाट आएका मानिस गैंडाकोटतर्फ बगरमा बसभित्रै सुतेका थिए । उनीहरूको थकान कार्यक्रम स्थलमा पनि देखिन्थ्यो । कपिलवस्तु मायादेवी गाउँपालिका–४ गुन्डीबाट महिला र पुरुष गरेर चार सय जना आएको लाला लोधले बताए । कार्यक्रम सुरु नहुँदै उनीहरू सबै चौरमा घाम तापेर बसेका थिए । झाँकीका बाजाको झ्याइँझ्याइँ र माइकमा घन्कने चर्को आवाजको प्रवाह नगरी केही चौरमै निदाएका थिए । रातारात गाडी चढेर नारायणगढ आएका धेरै थिए । उनीहरूका लागि बासको व्यवस्था थिएन । त्यसैले कार्यक्रम सकिँदा फर्कन ढिला हुने भएका कारण धेरैले भाषण कुरेनन् । सुदूरपश्चिम बैतडीकी सरस्वती नेपाली, मीना भट्ट, कल्पना राना महाधिवेशनका लागि मंसिर ६ गते जिल्लाबाट हिँडेका थिए । उनीहरूलाई फर्कने हतार थिएन । ‘भर्खर पार्टी फुटे पनि एमालेलाई कार्यकर्ताले विश्वास गरेकै छन् । यति ठूलो जमघटले जनता पनि साथ रहेछन् भन्ने देखियो,’ सरस्वतीले भनिन् । यो महाधिवेशनपछि आउने नेतृत्वले पार्टीलाई सबै क्षेत्रमा स्थापित गराउन सक्ने आशा आफूले लिएको उनले बताइन् ।
प्रकाशित : मंसिर १०, २०७८ २२:१६
