राजनीतिक भागबन्डाका कारण न्यायपालिकामा विसंगति मौलायो : न्यायाधीश समाज- समाचार - कान्तिपुर समाचार
कान्तिपुर वेबसाईट
AdvertisementAdvertisement

राजनीतिक भागबन्डाका कारण न्यायपालिकामा विसंगति मौलायो : न्यायाधीश समाज

'संविधानको दायराभित्र रहेर चालिने कदमको स्वागत गर्छौं'
'संस्था र पद्धति निर्माणका लागि त्याग र समर्पण चाहिन्छ, क्षणिक वा दलीय वा अन्य कुनै पनि प्रकारको सुविधा वा फाइदा मात्रै हेरेर संस्था र पद्धति निर्माण हुन सक्तैन'
कान्तिपुर संवाददाता

काठमाडौँ — न्यायाधीश समाज, नेपालले न्यायिक नेतृत्वको बारेमा उठेका विवादको संविधानको दायराभित्र रहेर समाधान गर्नुपर्ने बताएको छ । न्यायाधीश समाज, नेपालका उपाध्यक्ष बाबुराम रेग्मीले एक विज्ञप्ति जारी गर्दै न्यायपालिकामा स्वच्छता र विश्वसनीयता हर हालतमा कायम गर्नुपर्ने बताएका हुन् । 

समाजले राजनीतिक भागबन्डाका कारण न्यायपालिकामा विसंगति देखिएको बताएको छ । न्याय परिषद्को संयोजनमा न्यायपालिकामा गरिएको राजनीतिक भागबन्डा र प्रभावका कारण नै न्यायपालिकामा विकृति विसंगति भित्रिएको र मौलाएको पनि समाजको आरोप छ ।

'विगत केही समयदेखि निरन्तर रुपमा न्यायपालिका र खासगरी न्यायिक नेतृत्वका सम्बन्धमा उठाइएका प्रश्नहरु, हुने गरेका आलोचना र विभिन्न कोणबाट व्यक्त गरिएका सरोकारहरुप्रति हामी चिन्तित छौं र ती कुराहरुमा हाम्रो गम्भीर ध्यानाकर्षण भएको छ,' न्यायाधीश समाज नेपालले सोमबार जारी गरेको विज्ञप्तिमा भनिएको छ, 'न्यायपालिका उपर निष्पक्षताको कुरामा प्रश्न खड़ा हुनु र भागबन्डाका आरोप लागेका समाचार, दृष्टिकोण, टीका-टिप्पणी आदि सामाजिक सञ्जाल र आम सञ्चार मार्फत सार्वजनिक हुनु दुःखद विषय हो । यस्ता कुरामा संवेदनशील र गम्भीर हुनु पर्दछ ।'

विवादको वास्तविकता के हो भन्ने कुरा छानबिनश्चात यकिन हुन सक्ने भन्दै न्यायाधीश समाज नेपालले भनेको छ, 'यसरी सार्वजनिक रुपमा उठाइएका प्रश्नहरु सत्य-तथ्यमा आधारित छन् भने त्यसलाई गम्भीर र आपत्तिजनक कार्य मान्नु पर्दछ । यस्ता कुराहरुलाई लामो समयसम्म कुनै निकास नदिई त्यतिकै राख्दा न्यायपालिकालाई थप क्षति पुग्न सक्ने हुँदा यस्ता कुराको समयमा नै समाधान खोजिनु पर्छ भनी न्यायाधीश समाज आफ्नो धारणा स्पष्ट गर्दछ ।'

न्यायपालिका संस्था निर्माणका लागि त्याग र।समर्पण चाहिने पनि समाजले उल्लेख गरेको छ । 'संस्था र पद्धति निर्माणका लागि त्याग र समर्पण चाहिन्छ । क्षणिक वा दलीय वा अन्य कुनै पनि प्रकारको सुविधा वा फाइदा मात्रै हेरेर संस्था र पद्धति निर्माण हुन सक्तैन,' विज्ञप्तिमा उल्लेख छ, 'समसामयिक रुपमा भएका आलोचना, सरोकार, चासो वा टीका-टिप्पणीलाई हल्का रुपमा लिएर वास्तविक समस्याको पटाक्षेप गर्न खोजियो भने त्यो मुलुकको लागि नै दुर्भाग्यपूर्ण हुनेछ । न्यायपालिकाको स्वच्छता, निष्पक्षता र विश्वसनीयता हर हालतमा कायम राखिनु पर्दछ। व्यक्ति आउने जाने भै रहने हुँदा पद्धति र संस्थाको सर्वाधिक महत्व रहन्छ, रहनु पर्दछ ।'

न्यायपालिकामा देखिएको विवादको समाधानबारे विज्ञप्तिमा भनिएको छ, 'न्यायपालिकाको आन्तरिक शुद्धीकरण र सुदृढीकरणका लागि नेपालको संविधानको दायराभित्र रहेर चालिने कुनै पनि कदमलाई हामी हार्दिकतापूर्वक स्वागत गर्दछौ । तसर्थ, परिस्थितिको गम्भीरता र सम्वेदनशीलतालाई अबिलम्ब मनन् गरी आ-आफ्नो संवैधानिक तथा कानुनी अधिकार र दायित्व निर्वाह गर्न सम्बन्धित सबै निकाय, पदाधिकारी तथा व्यवसायीहरुलाई न्यायाधीश समाज, नेपाल हार्दिक अपिल गर्दछ ।'



प्रकाशित : कार्तिक ९, २०७८ ११:५५
प्रतिक्रिया
पठाउनुहोस्

‘जुलुङ्गो’ लाई युनिसेफ आइरिस अवार्ड

कान्तिपुर संवाददाता

काठमाडौँ — नेपाली फिल्म जुलुङ्गो (अ स्केरक्रो)ले फ्लोरेन्स चलचित्र महोत्सवमा युनिसेफ आइरिस अवार्ड जित्न सफल भएको छ ।

फ्लोरेन्स इटालीमा २१ देखि २४ अक्टुबरसम्म आयोजित महोत्सवमा निर्देशक राजेशप्रसाद खत्रीद्वारा निर्देशित चलचित्रले युनिसेफ इनोचेन्टी फिल्म फेस्टिभल २०२१ मा ‘युनिसेफ आइरिस ७५ अवार्ड’ हात पारेको हो । चलचित्रले किशोरीहरूलाई शिक्षा प्राप्त गर्नबाट रोक्ने सांस्कृतिक बाधाहरूलाई सही ढंगले चित्रण गर्दछ ।

निर्णायक मण्डलीले 'अ स्केरक्रो'लाई भिजुअल सिम्बोलिजम र बाल अधिकार सम्बन्धी महासन्धिलाई समर्थन गर्ने महत्त्वपूर्ण सन्देशको कारण चयन गरेको हो । हिमाली समुदायको परिवेशमा आधारित यो चलचित्रले आफ्नी आमालाई स्केरक्रो (जुलुङ्गो ) बनाउन सहयोग गर्नका लागि विद्यालय जानबाट बञ्चित भएकी किशोरीको कथा देखाउँछ ।

‘दुर्गम गाउँको एक शिक्षक भएको हुनाले मैले निर्दाेष बालबालिकाको एउटा समूहसँग कुराकानी गर्ने सौभाग्य पाएको छु,’ खत्रीले भने, ‘सत्य कथाहरूलाई प्रस्तुत गरी चलचित्रको माध्यमबाट म बालबालिकाको अधिकारको वकालत गर्न चाहन्छु ।’ उनले नेपाली बालबालिकाहरुले भोगेका कथाहरू संसारका सबै भागमा पुग्ने आशा गरेका छन् ।

महोत्सवमा विश्वका २९ देशहरूबाट ३९ वटा चलचित्रहरूको विशेष प्रदर्शन भएको थियो । महोत्सवले आजको समयमा बालबालिका हुनुको अर्थ के हो भन्ने कुरा कुशलतापूर्वक दर्शाएका चलचित्रहरूको उत्सव मनाउँछ । यूआईएफएफले बालबालिकाबारे चलचित्र निर्माणमा उत्कृष्टताको पहिचान गर्न र संसारभरि बाल्यावस्थालाई चलचित्रको विषयवस्तुको रूपमा अन्वेषणमा प्रोत्साहित गर्नका लागि ‘आइरिस अवार्ड’ स्थापना गरिएको हो । यसको दोस्रो संस्करणमा ११४ देशहरूबाट कुल १७०० चलचित्रहरू प्राप्त भएको थियो ।

प्रकाशित : कार्तिक ९, २०७८ ११:४२
पूरा पढ्नुहोस्
प्रतिक्रिया
पठाउनुहोस्
×