बेलायती महारानीका तर्फबाट राजदूत रेग्मीलाई बिदाइ- समाचार - कान्तिपुर समाचार

बेलायती महारानीका तर्फबाट राजदूत रेग्मीलाई बिदाइ

कान्तिपुर संवाददाता

काठमाडौँ — आउँदो आइतबार नेपाल फर्कन लागेका बेलायतका लागि नेपाली राजदूत लोकदर्शन रेग्मीलाई बेलायती महारानीका तर्फबाट बिदाइ गरिएको छ । महारानी एलिजावेथ द्वितीयाका प्रतिनिधि शुक्रबार अपरान्ह लन्डनस्थित नेपाली दूतावासमै गएर बिदाइ गरेका हुन् ।

गत मार्च १ बाट कार्यभार सम्हालेका रेग्मीलाई नेपाल सरकारले फिर्ता बोलाउने निर्णय गरेपछि उनी ८ महिना नपुग्दै नेपाल फर्किने तयारीमा छन् । महारानीको प्रतिनिधि ‘मार्सल अफ डिप्लोम्याटिक कोर्प्स’ विलियम एलिस्टर ह्यारिसन दूतावास आएर राजदूत रेग्मीको बिदाइ गर्दै उनले महारानीले हस्ताक्षर गरी पठाएको आफ्नो तस्बिरसमेत राजदूत रेग्मीलाई उपहारस्वरूप हस्तान्तरण गरे।

‘मार्सल अफ डिप्लोम्याटिक कोर्प्स’ बेलायती महारानीका ‘कूटनीतिक सम्बन्ध’ मा महारानीको प्रतिनिधित्व एवम् संयोजन गर्ने उच्च शाही अधिकारी हुन् ।

महारानीले रेग्मीलाई बिदाइ सन्देशसमेत पठाएकी छन् । सन्देशमा राजदूत रेग्मीले बेलायत आएर निर्वाह गरेका सम्पूर्ण भूमिकाका लागि धन्यवाद ज्ञापन गर्दै बेलायत तथा नेपालको ऐतिहासिक मैत्रीसम्बन्ध आगामी दिनमा थप मजबुत बन्दै जाने विश्वास व्यक्त गरिएको छ ।

राजदूत रेग्मीले पनि महारानीका प्रतिनिधमार्फत् आफ्नो तर्फबाट कृतज्ञता जाहेर गर्दै कोभिड महामारीका बेला नेपाललाई बेलायतबाट प्राप्त सहयोगका लागि धन्यवाद दिएका छन् । साथै, भूपू गोर्खाहरुको मुद्धामा हुन लागेको दुई देशबीचको वार्ता पनि सकारात्मक निष्कर्षमा पुग्ने आशा रेग्मीको छ ।

बेलायतको छोटो बसाइ आफ्नो लागि अमूल्य र अविस्मरणीय रहेको राजदूत रेग्मीको बुझाइ छ ।

प्रकाशित : कार्तिक ६, २०७८ ०८:३८
प्रतिक्रिया
पठाउनुहोस्

उद्योगमा लगानी प्रतिबद्धता : संख्या घट्दै, लगानी बढ्दै

कान्तिपुर संवाददाता

काठमाडौँ — उद्योगको दर्ता संख्या घटे पनि समग्रमा (स्वदेशी तथा विदेशी) लगानी प्रतिबद्धता रकम भने बढेको छ । उद्योग विभागको पाँच आर्थिक वर्षको पहिलो तीन महिना (साउन–असोज) को तथ्यांक तुलना गर्दा उद्योग दर्ता संख्या कम भए पनि स्वदेशी तथा विदेशी लगानी प्रतिबद्धता रकममा वृद्धि भएको देखिएको छ ।

आर्थिक वर्ष २०७४/७५ को पहिलो तीन महिनामा १ सय ३९ उद्योग दर्ता भएका थिए । त्यति बेला ७३ अर्ब ६७ करोड ५० लाख रुपैयाँ लगानी प्रतिबद्धता आएको थियो । चालु आर्थिक वर्ष २०७८/८९ को साउन–असोजसम्म भने ८७ उद्योग दर्ता भएको र तिनमा १ खर्ब २२ अर्ब १८ करोड २० लाख रुपैयाँ रकम लगानी प्रतिबद्धता आएको विभागको तथ्यांक छ । २०७५/७६ मा १ सय ७५ उद्योगमा ६८ अर्ब ३५ करोड ८० लाख रुपैयाँ लगानी प्रतिबद्धता आएको थियो ।

२०७६/७७ मा ८३ उद्योगमा ५२ अर्ब २४ करोड २० लाख रुपैयाँ लगानी प्रतिबद्धता आएको विभागको तथ्यांक छ । २०७७/७८ को साउन–असोजसम्म भने ५९ उद्योग दर्ता भएका छन् । यसका लागि उद्योगीहरूले ६२ अर्ब ३७ करोड १० लाख रुपैयाँ लगानी प्रतिबद्धता जनाएका छन् । यस आधारमा उद्योग दर्ता संख्या कम भए पनि लगानी प्रतिबद्धता रकम वृद्धि भइरहेको देखिन्छ ।

उद्योगमा लगानी बढ्नु सकारात्मक रहेको विभागका सूचना अधिकारी ज्ञानेन्द्र पराजुलीले बताए । ‘लगानीकर्ताहरूले गरेका प्रतिबद्धता हुन् यी । रकम बढ्नु भनेको लगानी वृद्धि हुनु हो । यसलाई हामीले ठूला उद्योग आएको भनेर विश्लेषण गर्नुपर्छ,’ पराजुलीले भने, ‘कोभिडपछि सरकारले उद्योगहरूलाई धेरै सुविधासमेत दिएको छ । विभिन्न छुटका कार्यक्रमसमेत ल्याएको छ । यसले लगानी रकम बढेको हो ।’

विभागले आठ वर्गीकरणमा राखी उद्योग दर्ता गर्दै आएको छ । यसमा कृषि तथा वन पैदावरमा आधारित, पूर्वाधार, ऊर्जामूलक, सूचना, प्रसारण तथा सञ्चार प्रविधि, उत्पादन, सेवा र पर्यटनमूलक उद्योग छन् । विभागमा १० करोडदेखि ६ अर्ब रुपैयाँसम्म पुँजी भएका उद्योग दर्ता हुन्छन् । १० करोड रुपैयाँभन्दा कम पुँजी लगानी भएका उद्योग प्रदेश तहअन्तर्गतका लघु, घरेलु तथा साना उद्योग कार्यालयमा दर्ता हुन्छन् । ६ अर्ब रुपैयाँभन्दा बढी पुँजी भएका उद्योग लगानी बोर्डमा दर्ता हुन्छन् ।

विदेशी लगानी प्रतिबद्धता बढ्यो

पाँच आर्थिक वर्षको पहिलो तीन महिना (साउन–असोज) को तथ्यांकअनुसार विदेशी लगानी प्रतिबद्धता बढेको छ । आर्थिक वर्ष २०७४/७५ को साउन–असोजसम्म १ सय २ उद्योगमा ८ अर्ब ४३ करोड २० लाख रुपैयाँ विदेशी लगानी प्रतिबद्धता आएकोमा चालु आर्थिक वर्षको सोही अवधिमा एक सय ७ उद्योगमा २३ अर्ब ७१ करोड ५० लाख रुपैयाँ रकम प्रतिबद्धता आएको छ ।

२०७५/७६ को पहिलो तीन महिनामा १ सय २९ उद्योगमा ४ अर्ब ८३ करोड ५० लाख रुपैयाँ विदेशी लगानी प्रतिबद्धता आएको थियो । २०७६/७७ को सोही अवधिमा भने ९० उद्योगमा १४ अर्ब १८ करोड २० लाख र २०७७/७८ मा ९४ उद्योगमा १९ अर्ब ३९ करोड ५० लाख रुपैयाँ विदेशी लगानी प्रतिबद्धता आएको थियो । यो लगानी कृषि तथा वन पैदावरमा आधारित, ऊर्जामूलक, सूचना प्रविधिमा आधारित, उत्पादनमूलक, सेवामूलक र पर्यटनमूलक उद्योगमा गरिने प्रतिबद्धता रहेको विभागको तथ्यांक छ ।

प्रकाशित : कार्तिक ६, २०७८ ०७:५९
पूरा पढ्नुहोस्
प्रतिक्रिया
पठाउनुहोस्
×