एमसीसी सम्झौता कार्यान्वयनबारे बोर्डमा सुमारको ‘ब्रिफिङ’- समाचार - कान्तिपुर समाचार

एमसीसी सम्झौता कार्यान्वयनबारे बोर्डमा सुमारको ‘ब्रिफिङ’

जगदीश्वर पाण्डे

काठमाडौँ — अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) की उपाध्यक्ष फातिमा सुमारले नेपालमा एमसीसी सम्झौता कार्यान्वयनको अवस्थाबारे बोर्डलाई जानकारी दिएकी छन् ।

एमसीसी बोर्डका अध्यक्ष तथा विदेशमन्त्री एन्टोनी ब्लिन्केनको नेतृत्वमा बुधबार वासिङ्टन डीसीमा भएको बोर्ड बैठकमा सुमारले नेपालको स्थितिबारे ब्रिफिङ गरेकी हुन् ।

सम्झौताकै विषयमा उपाध्यक्ष सुमारले गत भदौ २४ देखि २७ गतेसम्म नेपाल भ्रमण गरेकी थिइन् । भ्रमणका दौरानमा उनले प्रधानमन्त्री तथा कांग्रेस सभापति शेरबहादुर देउवा, एमाले अध्यक्ष केपी शर्मा ओली, माओवादी केन्द्रका अध्यक्ष पुष्पकमल दाहाल, नेकपा एकीकृत समाजवादीका अध्यक्ष माधवकुमार नेपाल, जनता समाजवादी पार्टीका अध्यक्ष उपेन्द्र यादव र पूर्वप्रधानमन्त्री बाबुराम भट्टराईलगायतसँग भेटवार्ता गरेकी थिइन् । उनले केही सांसदहरूसहित निजी क्षेत्रका विभिन्न व्यक्तिसँग पनि भेटवार्ता गरेकी थिइन् । चार वर्षअघि भएको एमसीसी सम्झौता संसद्बाट अनुमोदन हुन नसक्दा कार्यान्वयन सुरु भएको छैन । नेपालमा एमसीसी सम्झौतालाई लिएर सत्ता गठबन्धन र अन्य दलबीचमा फरक–फरक मत रहेको छ ।

नेपालको गरिबी निवारणमा एमसीसीबाट प्राप्त हुने ५ सय मिलियन डलर अनुदानले ठूलो सहयोग गर्ने सुमारले नेपाल भ्रमणको दौरानमा बताएकी थिइन् । एमसीसी सम्झौता नेपालको ऊर्जा र सडक पूर्वाधार विकासका लागि गरिएको हो । नेपाल भ्रमणका क्रममा उनले भनेकी थिइन्, ‘नेपालले जतिसक्दो छिटो यो सम्झौता अनुमोदन गर्छ त्यत्ति नै नेपालको थलिएको अर्थतन्त्रलाई फाइदा पुग्छ ।’ उनले यो सम्झौताको कुनै अन्तिम समयसीमा नरहेको पनि उल्लेख गरेकी थिइन् ।


प्रकाशित : आश्विन १५, २०७८ २२:०५
प्रतिक्रिया
पठाउनुहोस्

रथीबाट अवकाशपछि पनि हमाल नै सिरियामा फोर्स कमान्डर रहने

सेनामा नयाँ रथीको रुपमा सिनियर उपरथी सरोजप्रताव राणाको नाम अगाडि
जगदीश्वर पाण्डे

काठमाडौँ — सिरियाको गोलनहाइटमा संयुक्त राष्ट्रसंघ (यूएन) अन्तर्गत शान्ति मिसनमा फोर्स कमान्डर रथी ईश्वर हमालले नेपाली सेनाबाट अवकाश भएपछि पनि जिम्मेवारी सम्हालिरहने भएका छन् ।

हमाल यही असोज २५ गतेबाट ५८ वर्षे उमेर हदका कारण नियमित अवकाशमा जाँदैछन् । उनको स्थानमा नयाँ रथीमा वरिष्ठ उपरथी सरोजप्रताप राणालाई बढुवा गर्ने तयारी भएको सैनिक मूख्यालय जंगी अड्डाले स्रोतले कान्तिपुरलाई बतायो ।

हमालले नेपाली सेनाबाट अवकाश पाए पनि शान्ति स्थापनामा फोर्स कमान्डरको रुपमा आफ्नो दुई वर्षे कार्यकाल नसक्दा समेत काम गर्न पाउने भएका हुन् । नेपाली सेनाको प्रस्तावमा यसअघि नै सरकारले रथी हमालको जस्तो अवस्था आए ‘नेपालमा अवकाश भए पनि विदेशमा भने उही पदलाई निरन्रता दिने’ गरी निर्णय गरेको सैनिक प्रवक्ता सन्तोषबल्लभ पौडेलले जानकारी दिए ।

यूएनको जिम्मेवारीमा नेपाललाई उच्च तहमा थोरै मौका मिल्ने र त्यो मौका पनि जागिरको हदले जाने भएपछि उक्त निर्णय गरिएको थियो । फोर्स कमान्डरमा भने सरकारले सिफारिस गरे पनि जो कोही काम गर्नसक्ने अवस्था हुन्न । यसका लागि फोर्स कमान्डरका आकांक्षीहरुले परीक्षा पास गर्नुपर्ने हुन्छ ।

हमालसहित अन्य सैनिक अधिकृतहरुलाई हेरेर सरकारले नेपालमा अवकाश पाए पनि विदेशमा जिम्मेवारी सम्हाल्दा समेत उही पदमा रहेको जानकारी दिने गरी निर्णय गरेको हो । हमाललाई संयुक्त राष्ट्र संघले सन् २०२० को फेब्रुअरीमा फोर्स कमान्डर नियुक्त गरेको थियो । दुई वर्षे कार्यकालमा उनले १४ महिना काम गरिसकेका छन् । अब १० महिना काम गर्न बाँकी रहेको जंगी अड्डाका एक सैनिक अधिकारीले जानकारी दिए ।

हमालले सिरियामा फोर्स कमान्डरमा रहँदा नेपालको रथीकै परिचय दिनेछन् तर त्यहाँ जिम्मेवारी सकिने बित्तिकै उनी अवकाश प्राप्त हुनेछन् । सैनिक मुख्यालय जंगी अड्डाको लागि भने हमाल असोज २५ पछि अवकाश प्राप्त रथी नै हुनेछन् ।

प्रकाशित : आश्विन ११, २०७८ १९:४०
पूरा पढ्नुहोस्
प्रतिक्रिया
पठाउनुहोस्
×