कांग्रेसमा पुस्तान्तरण होइन, रुपान्तरण चाहिएको छ : पौडेल- समाचार - कान्तिपुर समाचार
कान्तिपुर वेबसाईट
AdvertisementAdvertisement

कांग्रेसमा पुस्तान्तरण होइन, रुपान्तरण चाहिएको छ : पौडेल

कान्तिपुर संवाददाता

काठमाडौँ — कांग्रेसका वरिष्ठ नेता रामचन्द्र पौडेलले पार्टीमा अहिले रूपान्तरण आवश्यक रहेको बताएका छन् । ‘पार्टीमा पुस्तान्तरणको बहस भइरहेको छ । तर, हुनुपर्ने रूपान्तरणको हो,’ गृहजिल्ला तनहुँमा शुक्रबार आयोजित कार्यक्रममा पौडेलले भने, ‘अहिलेको पार्टी सञ्चालन कसरी भइरहेको छ, यो अवस्थामा रूपान्तरण चाहिएको हो कि पुस्तान्तरण ? पार्टी सही बाटोमा हिँडेको भए पुस्तान्तरणको बहस नै उठ्दैन थियो । त्यसैले यो बहसलाई ठीक बाटोमा हिँडाउन सक्नुपर्छ ।’ 

उनले पार्टीको १४ औँ महाधिवेशनले यो भ्रमलाई चिर्नुपर्ने बताए । ‘यदि पार्टीमा सबै संगठनहरू परिचालन हुन सकेको भए, समयमा महाधिवेशन गरेर नेतृत्व हस्तान्तरण गर्न सकेको भए, पार्टी विचारबाट सञ्चालन भएको भए, रूपान्तरणको आवश्यकता हुने थिएन,’ पौडेलले भने, ‘जब रूपान्तरण हुन्छ, तब पुस्तान्तरणको बहस नै आउँदैन । त्यसैले आजको आवश्यकता रूपान्तरण हो, युवा साथीहरू भ्रममा नबस्नुहोला ।’

नेता पौडेलले पार्टीभित्र दोहोरो पद नओगट्ने बहस बार–बार भए पनि त्यसको कार्यान्वयन कमजोरका लागि मात्रै भएको बताए । उनले कांग्रेसलाई लोकतन्त्रको मूलमार्गमा हिँडाउन विचारले पार्टी र राज्य सञ्चालन हुनुपर्ने बताए । ‘हाम्रो पार्टीमा रामशरण महतले दोहोरो पदको कुरा उठाएपछि राजीनामा दिनुपर्‍यो । तर, शेरबहादुर देउवाले राजीनामा गर्नुपरेन,’ पौडेलले भने, ‘यहाँ बलियालाई कानुन नियम लाग्दैन । निर्धालाई मात्र कानुन लाग्ने हो ।’

उनले पार्टी उमेरले नभई विचारले सञ्चालन हुनेसमेत दाबी गरे । ‘पार्टी उमेरले होइन, विचारले सञ्चालन हुन्छ । विचारले लोकतन्त्र र राज्य संयन्त्र सञ्चालन भएन भने त्यहाँ लोकतन्त्रको अस्तित्व सम्भव छैन,’ पौडेलले भने, ‘बीपीले निर्वाचित जनप्रतिनिधिले शासन गर्छन् भन्ने विचार दिनुभयो । यो विचार बुढो भएको छैन । आजसम्म यसकै पक्षमा दुनियाँ रहेको छ ।’

उनले अहिले राज्य सञ्चालनको तौरतरिका ठीक नभएको भन्दै अन्तुष्टि जनाए । ‘मलाई चित्त बुझेको छैन, अहिलेको राज्य सञ्चालनको तौरतरिका । विचारबाट राज्य संचालन भइरहेकै छैन,’ पौडेलले भने, ‘बीपीले पनि त्यही सरकार चलाउनुभएको हो । त्यसपछिका पनि थुप्रै सरकारहरू बने र चले तर, किन बीपीको जस्तो हुन सकेनन् ? किन भने विचारबाट सरकार सञ्चालन हुन सकेनन् ।’

नेता पौडेलले अहिले प्रतिपक्षीको व्यवहारले लोकतन्त्रमा खतरा देखिएको बताए । ‘लोकतन्त्रमा जति विपक्षी दलहरू जिम्मेवार हुन्छन्, त्यति नै लोकतन्त्र बलियो हुन्छ,’ पौडेलले भने, ‘हाम्रोमा प्रतिपक्ष जिम्मेवार छैन । सदन प्रतिपक्षको हो । तर, त्यो सदनलाई प्रतिपक्षले नै अवरुद्ध पारेर बन्धक बनाएर राखेको छ । संसद् बाहुबलीको बन्धक बन्ने अनि कसरी लोकतन्त्र समृद्ध हुन्छ ?’

प्रकाशित : आश्विन १५, २०७८ १७:१८
प्रतिक्रिया
पठाउनुहोस्

२४ घण्टामा नेपालमा ८९८ कोरोना संक्रमित, थप १३ जनाको मृत्यु

कान्तिपुर संवाददाता

काठमाडौँ — पछिल्लो २४ घण्टामा नेपालमा ८९८ जनामा कोरोना भाइरस संक्रमण देखिएको छ । स्वास्थ्य मन्त्रालयका अनुसार देशभर गरिएको १० हजार ११३ पीसीआर परीक्षणमा शुक्रबार थप ८९८ जनामा संक्रमण पुष्टि भएको हो । यो सँगै नेपालमा कोरोना भाइरसबाट संक्रमित हुनेको संख्या ७ लाख ९५ हजार ९५९ पुगेको छ ।

यस्तै एन्टिजेन विधिद्वारा गरिएको ३ हजार २५५ परीक्षणबाट १६८ जनामा पोजिटिभ देखिएको छ ।

२४ घण्टामा पीसीआर र एन्टिजेन विधिबाट गरिएको १३ हजार ३६८ परीक्षणमा १ हजार ६६ जनामा संक्रमण पुष्टि भएको मन्त्रालयले जनाएको छ ।

पछिल्लो २४ घण्टामा थप ९३८ जना संक्रमणमुक्त भएका छन् । हालसम्म निको हुनेको संख्या ७ लाख ६६ हजार ६९६ रहेको छ । नेपालमा कोरोना संक्रमणबाट थप १३ जनाको मृत्यु भएको छ । हालसम्म कोरोनाबाट मृत्यु हुनेको संख्या ११ हजार १४८ पुगेको छ ।

हालसम्म देशभर ४२ लाख १५ हजार ४९५ नमुनाको पीसीआर परीक्षण भएको छ । क्वारेन्टाइनमा २४२ जना रहेका छन् भने आइसोलेसनमा रहनेको संख्या १८ हजार ११५ छ ।

मन्त्रालयका अनुसार पछिल्लो २४ घण्टामा खोप लगाएकाको संख्या २ लाख १७ हजार ३९१ रहेको छ ।

मन्त्रालयको तथ्यांक




प्रकाशित : आश्विन १५, २०७८ १६:५९
पूरा पढ्नुहोस्
प्रतिक्रिया
पठाउनुहोस्
×