२५.१२°C काठमाडौं
एमाले केन्द्रीय कमिटीबाट ओलीको राजनीतिक प्रतिवेदन पारित
काठमाडौँ — एमाले अध्यक्ष केपी शर्मा ओलीले प्रस्तुत गरेको राजनीतिक प्रतिवदेन केन्द्रीय कमिटीले पारित गरेको छ । च्यालसस्थित तुल्सीलाल स्मृति प्रतिष्ठानमा बसेको बैठकमा राजनीति प्रतिवेदनमाथि उठेको जवाफ दिएपछि त्यसलाई पारित गरिएको हो ।
बैठकमा अध्यक्ष ओलीले समूहगत रुपमा आएको सुझावलाई समेत समावेश गरेर राजनीतिक प्रतिवेदन तयार पारिने जनाकारी गराएका केन्द्रीय सदस्य नीरज आचार्यले बताए ।
तर राजनीतिक प्रतिवेदनमा रहेको तीन वटा बुँदामा उपमहासचिव घनश्याम भुसालले फरक मत राखेका छन् । उनले संसद् विघटन गर्नु गलत भएको कुरा स्वीकारेर जानुपर्ने, समाजवादी कार्यक्रमको र जबज कसरी कार्यान्वयन हुन्छ भनेर थप व्याख्या आवश्यक रहेको धारणा बैठकमा राखेका थिए ।
बैठकमा सोमबार स्थायी कमिटीको बैठकमा अन्य विषयहरुमा छलफल हुने जानकारी गराइएको थियो । त्यसैगरी सरकारले ल्याएको प्रतिस्थापन विधेयकको विरोध गर्ने समेत निर्णय बैठक गरेको छ । बैठकमा डेढ घण्टा लामो सम्बोधन गरेका अध्यक्ष ओलीले एकता प्रक्रियाबाट आएका सबैले पार्टीमा सुरक्षित वातावरणको अनुभूति गर्ने बताएका थिए ।
