सिंहदरबारमा कांग्रेस पदाधिकारी बैठक जारी, निस्किए देउवा - समाचार - कान्तिपुर समाचार

सिंहदरबारमा कांग्रेस पदाधिकारी बैठक जारी, निस्किए देउवा 

कान्तिपुर संवाददाता

काठमाडौँ — १४ औँ महाधिवेशनको कार्यतालिकाको विषयमा छलफल गर्न कांग्रेसको पदाधिकारी तथा पूर्वपदाधिकारीहरुको बैठक सिंहदरबारस्थित संसदीय दलको कार्यालयमा जारी छ । सभापति एवम् प्रधानमन्त्री शेरबहादुर देउवा भने बैठकमा सहभागी भएर केहीबेरमै निस्किएका छन् । 

केन्द्रीय निर्वाचन समितिका संयोजक महादेवप्रसाद यादव र अन्य पदाधिकारीसहित महाधिवेशनको कार्यतालिकाका सन्दर्भमा नेताहरुबीच छलफल चलिरहेको छ । सहमहामन्त्री प्रकाशशरण महतका अनुसार बैठकले ९ असोजको गाउँ/नगर अधिवेशन र त्यसपछिका अधिवेशनका सन्दर्भमा निर्णय गर्न सक्ने बताए । ‘छलफल चलिरहेको छ । ६४ जिल्लाको वडा अधिवेशन सकिएको छ । अब १३ जिल्लाको वडा अधिवेशन गर्नुपर्नेछ । साथीहरुले ७५३ वटै स्थानीय तहको अधिवेशन एकैदिन गर्नुपर्ने प्रस्ताव ल्याउनुभएका छ,’ महतले ईकान्तिपुरसँग भने, ‘त्यही विषयमा छलफल भइरहेको छ ।’

बुधबार पनि पदाधिकारी तथा पूर्वपदाधिकारी बैठक बसेको थियो । बैठकले दसैंअघि पालिका अधिवेशनमात्रै गर्ने सहमति गरेको थियो । तर, पालिका तहको अधिवेशन ९ असोजमै हुने वा त्योभन्दापछि सबै जिल्लामा एकैपटक हुने भन्ने टुंगिएको छैन ।

प्रकाशित : आश्विन ७, २०७८ १७:५७
प्रतिक्रिया
पठाउनुहोस्

थापाप्रति दाहालको टिप्पणी- 'सम्झिँदा पनि एलर्जी हुन्छ'

कान्तिपुर संवाददाता

काठमाडौँ — माओवादी केन्द्रका अध्यक्ष पुष्पकमल दाहालले पार्टीबाट अलग्गिएका रामबहादुर थापा, टोपबहादुर रायमाझीहरुलाई सम्झिँदा पनि आफूलाई एलर्जी हुने गरेको टिप्पणी गरेका छन् ।काभ्रेमा बिहीबार आयोजित योङ कम्युनिस्ट लिग (वाईसीएल) नेपालको पाँचखाल नगर सम्मेलनलाई सम्बोधन गर्दै दाहाले एमालेमा लागेका नेताहरुप्रति उक्त टिप्पणी गरेका हुन् ।

दाहालले भने, 'त्यो टोपबहादुर भन्नेलाई मैले कतिचोटी मन्त्री बनाएँ । अहिले कहाँ हेर्नुस् त... त्यो बादल हिजोको साथी । अहिले त सम्झिँदा पनि तैट ! एलर्जी हुन्छ ! तानेर ल्याएर गृहमन्त्री, सरकारको नेतृत्व तपाईंले गर्नुस् भनेर बनाएको त माओवादीले, मैले हो नि ! हेर्नुस् । जो जति माथि आएको छ । त्यो त्यति बिग्रिएको छ । बुझ्नु होला ।' तत्कालीन नेकपा पुरानै अवस्थामा फर्किएपछि थापा समूह एमालेमा लागेका थिए ।

दाहालले अगाडि भने, 'तल ग्राउन्डमा बस्ने कार्यकर्ता कोही बिग्रिएका छैनन् । बिग्रिएका भनेका टाठाबाठा, चुनाव जितेका धेरैजसो छन्,' दाहालले भने, 'मेरो अनुभवले के देखायो भने जल्लाई धेरै मन्त्री बनाएँ त्यही सबभन्दा धेरै भगौडा । त्यही धोकेबाज । कोही कोहीलाई मन्त्री बनाएसी ठीक हुन्छ भन्ठानेको त के को हुन्थ्यो ?'

नेताहरुको प्रवृत्ति नबदल्ने हो भने पार्टी विघटन गर्नुपर्छ भन्ने धारणा पछिल्लो समय दाहालले राख्दै आएका छन् । उनले आफू पनि बिग्रिएकोले सच्चिन तयार रहेको बताए । 'म अरुलाई धेरै भन्दिनँ । बिग्रिएको मै हुँ । अब म सच्चिन्छु । अरु को-को सच्चिने, नसच्चिने तपाईंहरु सोच्नुस्,' उनले थपे, 'हिजो जनयुद्धमा हामफालेँ । अर्कोपटक शान्ति प्रक्रियामा हामफालेँ । कहिले संविधान बनाउनमा हामफालेँ । पार्टी एकतामा हामफालियो । फेरि समाजवादी क्रान्तिका लागि म चाहिँ हामफालेँ फालेँ । तपाईं/हामी सबैले यो फटाहाले बिगार्‍यो भन्नुभन्दा, मैले के बिगारेँ भन्ने सोच्न थालियो भने त्यहींबाट रुपान्तरण सुरु हुन्छ ।'

दाहालले बाँकी जीवन समाजवादी क्रान्तिका लागि लड्ने भनाइ पुन: दोहोर्‍याए । 'अब कति वर्ष बाँचिन्छ । ज्यान छोडेर समाजवादी क्रान्तिको निम्ति युवाहरुको नेतृत्व गर्छु म । तपाईं युवाहरुले मलाई साथ दिनपर्‍यो पहिलेजस्तै । मचाहिँ हामफालेँ फालेँ ।'

प्रकाशित : आश्विन ७, २०७८ १७:४६
पूरा पढ्नुहोस्
प्रतिक्रिया
पठाउनुहोस्
×