थापाप्रति दाहालको टिप्पणी- 'सम्झिँदा पनि एलर्जी हुन्छ'- समाचार - कान्तिपुर समाचार

थापाप्रति दाहालको टिप्पणी- 'सम्झिँदा पनि एलर्जी हुन्छ'

कान्तिपुर संवाददाता

काठमाडौँ — माओवादी केन्द्रका अध्यक्ष पुष्पकमल दाहालले पार्टीबाट अलग्गिएका रामबहादुर थापा, टोपबहादुर रायमाझीहरुलाई सम्झिँदा पनि आफूलाई एलर्जी हुने गरेको टिप्पणी गरेका छन् ।
काभ्रेमा बिहीबार आयोजित योङ कम्युनिस्ट लिग (वाईसीएल) नेपालको पाँचखाल नगर सम्मेलनलाई सम्बोधन गर्दै दाहाले एमालेमा लागेका नेताहरुप्रति उक्त टिप्पणी गरेका हुन् ।

दाहालले भने, 'त्यो टोपबहादुर भन्नेलाई मैले कतिचोटी मन्त्री बनाएँ । अहिले कहाँ हेर्नुस् त... त्यो बादल हिजोको साथी । अहिले त सम्झिँदा पनि तैट ! एलर्जी हुन्छ ! तानेर ल्याएर गृहमन्त्री, सरकारको नेतृत्व तपाईंले गर्नुस् भनेर बनाएको त माओवादीले, मैले हो नि ! हेर्नुस् । जो जति माथि आएको छ । त्यो त्यति बिग्रिएको छ । बुझ्नु होला ।' तत्कालीन नेकपा पुरानै अवस्थामा फर्किएपछि थापा समूह एमालेमा लागेका थिए ।

दाहालले अगाडि भने, 'तल ग्राउन्डमा बस्ने कार्यकर्ता कोही बिग्रिएका छैनन् । बिग्रिएका भनेका टाठाबाठा, चुनाव जितेका धेरैजसो छन्,' दाहालले भने, 'मेरो अनुभवले के देखायो भने जल्लाई धेरै मन्त्री बनाएँ त्यही सबभन्दा धेरै भगौडा । त्यही धोकेबाज । कोही कोहीलाई मन्त्री बनाएसी ठीक हुन्छ भन्ठानेको त के को हुन्थ्यो ?'

नेताहरुको प्रवृत्ति नबदल्ने हो भने पार्टी विघटन गर्नुपर्छ भन्ने धारणा पछिल्लो समय दाहालले राख्दै आएका छन् । उनले आफू पनि बिग्रिएकोले सच्चिन तयार रहेको बताए । 'म अरुलाई धेरै भन्दिनँ । बिग्रिएको मै हुँ । अब म सच्चिन्छु । अरु को-को सच्चिने, नसच्चिने तपाईंहरु सोच्नुस्,' उनले थपे, 'हिजो जनयुद्धमा हामफालेँ । अर्कोपटक शान्ति प्रक्रियामा हामफालेँ । कहिले संविधान बनाउनमा हामफालेँ । पार्टी एकतामा हामफालियो । फेरि समाजवादी क्रान्तिका लागि म चाहिँ हामफालेँ फालेँ । तपाईं/हामी सबैले यो फटाहाले बिगार्‍यो भन्नुभन्दा, मैले के बिगारेँ भन्ने सोच्न थालियो भने त्यहींबाट रुपान्तरण सुरु हुन्छ ।'

दाहालले बाँकी जीवन समाजवादी क्रान्तिका लागि लड्ने भनाइ पुन: दोहोर्‍याए । 'अब कति वर्ष बाँचिन्छ । ज्यान छोडेर समाजवादी क्रान्तिको निम्ति युवाहरुको नेतृत्व गर्छु म । तपाईं युवाहरुले मलाई साथ दिनपर्‍यो पहिलेजस्तै । मचाहिँ हामफालेँ फालेँ ।'

प्रकाशित : आश्विन ७, २०७८ १७:४६
प्रतिक्रिया
पठाउनुहोस्

ओलीको चुनौती - मन्त्रिपरिषद् विस्तार गर्न नसक्नेले एमालेसँग लड्ने धाक लाउने ?

कान्तिपुर संवाददाता

काठमाडौँ — एमाले अध्यक्ष केपी शर्मा ओलीले सत्तारुढ गठबन्धनले आगामी चुनावमा एमालेसँग लड्नका लागि एकजुट भएर आउन चुनौती दिएका छन् ।

काठमाडौंमा बिहीबार आयोजित पार्टीको कार्यक्रममा ओलीले पार्टीलाई एकजुट बनाएर जान कार्यकर्ताहरूलाई निर्देशन दिए भने सत्तारुढ गठबन्धनलाई एकजुट भएर आउन चुनौती दिए ।

'एमालेसँग लड्नेहरूले कमसेकम आफू त एकताबद्ध भएर आउ न । यो पाँचवटाको पञ्चे गुट छ नि ! मजबुद एमालेसँग लड्न यत्तिकै लिरिखिरी पाराले मन्त्रीमण्डल बनाउन नसक्ने एमालेसँग लड्ने गफ दिने,' ओलीले थपे, 'मन्त्रिपरिषद्को विस्तार गर्न नसक्ने एमालेसँग लड्ने धाक लाउने ? एकता देखियो त्यहाँ एकता ।'

भविष्यमा एमाले सरकारमा आएमा तीन दिनभित्र सरकार बनाउने ओलीले सुनाए । उनले प्रधानमन्त्रीले शपथ लिएकै दिन पनि मन्त्रिपरिषद्लाई पूर्णता दिने बताए ।

प्रधानमन्त्रीले शपथ लिएको ७५ दिन बितिसक्दा पनि मन्त्रिपरिषद्ले पूर्णता नपाएको ओलीको भनाइ थियो । उनले १४ महिनामा मन्त्रिपरिषद्ले पूर्णता पाए धन्यवाद दिनुपर्ने भन्दै व्यंग्य गरेका थिए ।

प्रधानमन्त्री शेरबहादुर देउवाले असार २९ गते शपथ लिएका थिए । सोही दिन चार जना मन्त्रीले पनि शपथ लिएका थिए । त्यसपछि एक मन्त्री र एक राज्यमन्त्री थपिएका छन् । सत्तारुढ गठबन्धनभित्र सहमति हुन नसक्दा मन्त्रिपरिषद्ले पूर्णता पाउन सकेको छैन ।

एमाले पार्टीमा विभाजन ल्याउन फेरि पनि प्रयास नहोलान् भन्न नसकिने ओलीले बताए । त्यसका लागि कार्यकर्ताहरू गतिशील हुनुपर्ने र पार्टी नीति तथा निर्णयमा अगाडि बढ्नुपर्ने बताए ।

पार्टी सिध्याउन खोजेको तर एमाले एकताबद्ध भएर अगाडि बढ्नुपर्ने उनको भनाइ थियो ।

सम्बन्धित समाचारः

प्रकाशित : आश्विन ७, २०७८ १७:४६
पूरा पढ्नुहोस्
प्रतिक्रिया
पठाउनुहोस्
×