एमालेको विरोधका बीच राष्ट्रिय सभामा विनियोजन विधेयक टेबुल

प्रमुख प्रतिपक्ष एमालेले बैठकको सुरुमै विरोध जनाएको थियो । एमाले सांसदहरू सिटबाट उभिएर विरोध जनाइरहेको अवस्थामा नै राष्ट्रिय सभाका अध्यक्ष गणेशप्रसाद तिमिल्सिनाले विधेयक टेबुल गर्न सचिवलाई समय उपलब्ध गराएका थिए ।

एमाले सांसद देवेन्द्र दाहालले प्रतिनिधिसभाका एमालेबाट निर्वाचित १४ सांसदलाई सभामुखले पदमुक्त भएको सूचना नटाँसेसम्म विरोध जारी रहने बताएका थिए । 'जबसम्म सभामुखले आफ्नो गल्ती स्वीकार्नु भएको छैन, एमालेले कारबाही गरेका १४ जनाको नाम अहिले पनि टाँस गरिएको छैन, त्यो स्थिति रहुन्जेलसम्म विरोध जारी रहन्छ,' दाहालले भनेका थिए ।

अध्यक्ष तिमिल्सिनले भने आफ्ना कुरा राखिसकेपछि बसेर सभाको कारबाही अगाडि बढाउन सहयोग गर्न आग्रह गरेका थिए ।

राष्ट्रिय सभाको बैठक १५ मिनेटका लागि स्थगित गरिएको छ ।