अमेरिका छिर्ने क्रममा ५ दर्जन नेपाली जर्मनीमा पक्राउ- समाचार - कान्तिपुर समाचार

अमेरिका छिर्ने क्रममा ५ दर्जन नेपाली जर्मनीमा पक्राउ

दुबईबाट मस्को हुँदै फ्र्यांकफर्ट पुगेका अन्य नेपालीलाई पनि जर्मन प्रहरीले नियन्त्रणमा लिएको आशंका
ददी सापकोटा

पेरिस — काठमाडौंबाट दुबई, मस्को र मेक्सिको हुँदै गैरकानुनी रूपमा अमेरिका छिर्न खोज्ने झन्डै पाँच दर्जन नेपाली फ्र्यांकफर्ट विमानस्थलमा पक्राउ परेका छन् । यही रुटबाट मेक्सिको पुगेका केही व्यक्तिलाई मेक्सिको प्रहरीले फ्र्यांकफर्ट डिपोर्ट गरेको थियो । अन्य केही भने मेक्सिको उड्ने तयारीमा थिए ।

मेक्सिकोबाट डिपोर्ट भएकाहरूलाई भने मस्को फिर्ता पठाउन लागिएको जर्मन सुरक्षा निकायले बताएको जर्मनीस्थित नेपाली राजदूत रामकाजी खड्काले जानकारी दिए । विमानस्थलको ट्रान्जिटस्थित प्रहरी सुरक्षा घेरामा रहेकामध्ये एक नेपालीले सुरक्षाका कारण आफ्नो नाम नखुलाइदिन आग्रह गर्दै कान्तिपुरसँग भने, ‘हामी यहाँ ६ दिनदेखि सुरक्षा घेरामा छौं । प्रहरी नियमानुसार अब दुई दिनभन्दा राख्दैन । हामी अझै मेक्सिको जाने आसमा छौं ।’

ती नेपालीका अनुसार आफन्तको विश्वासमा परेर उनीहरूले अमेरिका छिर्नका लागि जनही ३८ लाख रुपैयाँ तिरेका थिए । राजदूत खड्काका अनुसार दूतावासले जर्मनीको सुरक्षा एजेन्सीसँग सम्पर्क गर्दा १८ जना नेपाली आफ्नो नियन्त्रणमा रहेको बताएको छ । पक्राउ परेकामध्ये ६ जनासँग जापानको नक्कली भिसा भएकाले शंका लागेर समूहका सबैलाई नियन्त्रणमा लिइएको जर्मन सुरक्षा संस्थाले जानकारी दिएको खड्काले बताए ।

फ्र्यांकफर्ट विमानस्थलमा कार्यरत श्याम खनालका अनुसार १८ जनाबाहेक मेक्सिकोबाट फर्काइएका र मस्कोदेखि मेक्सिको जान उडेका अन्य नेपाली पनि थपिएका छन् । उनका अनुसार विमानस्थलको अर्को टर्मिनलबाट पक्राउ पर्नेको संख्या यकिन भइसकेको छैन ।

अलपत्र परेका अर्का एक नेपालीले आफूहरू नियन्त्रणमा रहेका भए पनि प्रहरीले अन्य केही नगरेको बताएका छन् । ‘हामीलाई प्रहरीले रोकेको त हो । तर पक्राउ गरेको जस्तो छनक दिएको छैन । हामी अझै पनि मेक्सिकोको टिकट बनाएर उतै उड्ने पर्खाइमा छौं,’ उनले भने । मोटो रकम तिरेर हिँडेकाले जसरी पनि मेक्सिको गएर अमेरिका छिर्ने आसमा रहेको बताउँदै उनले भने, ‘३८ लाख तिरेर आएको हो । दलालले थाहा पायो भने झन् दुःख दिन सक्छ र आमाबुबाले यो सुन्नुभयो भने चिन्ताले मर्नुहुन्छ ।’

कान्तिपुरसँगको टेलिफोन कुराकानीमा ती नेपालीले आफूहरूमध्ये अधिकांशलाई आले थरका नेपाली दलालले दुई साताअघि काठमाडौंबाट दुबई (यूएई) उडाएका थिए । एक सातासम्म दुबईको एक होटलमा राखिएपछि उनीहरू आफैं टिकट काटेर मस्को (रुस) उडेका थिए । मस्को उड्ने प्रबन्ध भने एक पाकिस्तानी दलालले मिलाइदिएका हुन् ।

मस्कोमा एकरात बसेपछि आफूहरू आफ्नै टिकटमा मेक्सिको उडेका थिए । उनीहरू सबैको जर्मनीको फ्र्यांकफर्टमा ट्रान्जिट परेको थियो । त्यहाँ प्रहरीले जाँचबुझ गर्दा उनीहरू पक्राउ परेका हुन् । केहीको नक्कली भिसा भेटिएका कारण समूहका सबै जनालाई जर्मनीको सुरक्षा निकायले रोकेको हो ।

राजदूत खड्काले आफूहरूसमक्ष आधिकारिक रूपमा उद्धार वा अन्य सहयोगका लागि आग्रह नगरिएको उल्लेख गर्दै भने, ‘कसैले उद्धार गरिदिनुपर्‍यो भन्यो भने दूतावासले पहल गर्ने हो । आधिकारिक रूपमा केही आएको छैन । तर नेपालीहरूलाई यस्तो भयो भन्ने सुनेपछि हामी सुरक्षा निकायको सम्पर्कमा छौं । थप जानकारी लिने प्रयासमा छौं ।’

प्रकाशित : आश्विन ३, २०७८ २१:४८
प्रतिक्रिया
पठाउनुहोस्

तलेजुबाट चोरिएका तोरन–मूर्ति लिलामीबाट हटाइयो

ददी सापकोटा

पेरिस — नेपालबाट ४० वर्षअघि चोरिएका र यो साता पेरिसको ‘बोनह्याम्ज’ कला बिक्री केन्द्रमा लिलामीमा राखिएका ५ प्रतिकात्मक हिन्दु मूर्तिका बारे समाचार आएपछि ‘बोनह्याम्ज’ले यी सम्पदा लिलामीबाट हटाएको छ ।

पाटन दरबारको तलेजु मन्दिरको मूल ढोकामाथि तोरनमा रहेका तामामा सुनको जलप लगाइएका प्रतिकात्मक महालक्ष्मी, नृत्यनाथ, चामुण्डा , भैरव र पञ्चमुखी हनुमानका मूर्तिलाई बढीमा ५ हजार युरो प्रति मूर्तिको दरमा लिलामी (अक्सन)मा राखिएको थियो । १० दिनका लागि खुलाइएको सम्पदा बिक्री जेठ २७ सम्म जारी रहने ‘बोनह्याम्ज’को बिक्री अनलाइनले जनाएको थियो ।

चोरिएका सम्पदाको प्रदर्शनी तथा ‘अक्सन’बारे बिहीबार समाचार आएपछि र काठमाडौंस्थित युनेस्को कार्यालय, पेरिसस्थित नेपाली दूतावाससहितले उक्त चोरिएको सम्पदालाई तत्काल ‘लिलामी’बाट हटाउन तथा नियमानुसार उत्पत्तिको मुलुक (कन्ट्री अफ ओरिजिन)मा फिर्ता गर्न पत्र लेखेका थिए । यी सम्पदालाई बिक्री केन्द्रको ‘अक्सन’ बाट हटाएको थियो । पेरिसस्थित राजदूत दीपक अधिकारीले अन्तर्राष्ट्रिय तहको ‘अक्सन सेन्टर’ बोनह्याम्जसँग नेपाली सम्पदाको प्रामाणिकता र यो सम्पदालाई युनेस्को प्रावधानअनुसार तत्काल नेपाल फिर्ता गर्नुपर्ने बारेमा कुराकानी भएको जानकारी दिए ।

यी प्राचीन सम्पदा १२ औं शताब्दीयताको रहेको ऐतिहासिक अभिलेखहरुमा उल्लेख छ । यी सम्पदाबारेमा भारतीय इतिहासविद् बीएन बेनर्जीको ‘आर्कियोलोजिकल सर्भे अफ इन्डिया(आर्किटेक्चर अफ नेपाल), जर्मन अध्येता सिकको ‘गड्स आर लिभिङ द कन्ट्री : आर्ट थेफ्ट फ्रम नेपाल’ आदिमा समेत उल्लेख छ ।

भारतीय अध्येता बेनर्जीको ‘आर्कियोलोजिकल सर्भे अफ इन्डिया’ पुस्तकबाट । तस्बिर सौजन्य : सञ्जय अधिकारी

नेपालको सम्पदालाई ‘बोनह्याम्ज’ले अक्सनबाट हटाएपछि न्युयोर्कस्थित आर्ट–क्राइम प्रोफेसर एरिन एल थोम्सनले यी पुरातात्विक मूल्यका सम्पदा अब उत्पत्तिको मुलुक (नेपाल) फर्काउनका लागि तदारुकता रहनुपर्ने बताइन् । थोम्सन नेपालबाट चोरिएका वा हराएका सम्पदाको घरफिर्ती अभियानमा लागेकी एक अन्तर्राष्ट्रिय अभियन्ता हुन् ।

यो पनि पढ्नुहोस् :

प्रकाशित : जेष्ठ २१, २०७८ २०:३८
पूरा पढ्नुहोस्
प्रतिक्रिया
पठाउनुहोस्
×