अन्नभण्डारमै छैन मल - समाचार - कान्तिपुर समाचार

अन्नभण्डारमै छैन मल 

प्रदेश २ ब्युरो

जनकपुर — माग र आपूर्तिको सन्तुलन नमिल्दा मल छर्ने मुख्य सिजनमै युरिया मलको चरम अभाव झेल्नुपरेको छ । कृषि सामग्री कम्पनीको क्षेत्रीय कार्यालय वीरगन्जमा छ, तर पर्सामै मलको अभाव छ ।

वीरगन्ज–२३ प्रसौनीका किसान विजय कोइरीले आफ्नो १ बिघा धान खेतका लागि ५ बोरा युरिया मल आवश्यक रहेकामा १ बोरा मात्र जोहो गर्न सकेको बताए । ‘सहकारीहरूले मल दिँदैनन्, कालोबजारीले महँगोमा बिक्री गर्छन्,’ उनले भने । केही सहकारीले किसानलाई मल वितरण नगरी बारा र रौतहटका कालोबजारीलाई प्रतिबोरा १ हजार १ सयदेखि १ हजार २ सय रुपैयाँमा बेच्ने गरेको किसान बताउँछन् । यसरी १ बोरामै ३ सय ५० रुपैयाँसम्म नाफा लिइरहेको उनीहरूको भनाइ छ ।

जिल्ला कृषि सहकारी संघ पर्साका अध्यक्ष शिवकुमार साहले भने सहकारीहरूले कालोबजारी गरेको गुनासो हालसम्म नआएको दाबी गरे । तर कृषि कम्पनी वीरगन्ज क्षेत्रीय कार्यालय प्रमुख गोरखनाथ केसी पर्साकै केही सहकारीले मलको कालोबजारी गरी गैरजिल्लाका मल व्यापारीलाई मल बेचेको गुनासो आफूसम्म आएको बताउँछन् ।

साल्ट ट्रेडिङ कर्पोरेसनले युरिया नल्याएपछि त्यसको दबाब कम्पनी एक्लैमाथि पर्न गएको केसी बताउँछन् । ग्लोबल टेन्डरबाट ३१ हजार मेट्रिक टन युरिया आयातको ठेक्का पाएको स्विस सिंगापुर कम्पनीको मल हाल सिपमेन्टमा रहेकाले उक्त मल आउन करिब १ महिना लाग्ने उनले बताए । कम्पनीको वीरगन्ज कार्यालयले प्रदेश १, २ र वाग्मती प्रदेशका डेढ दर्जनभन्दा बढी जिल्लामा मल वितरण गर्दै आएको छ ।

सप्तरीको छिन्नमस्ता–७ का किसान उमेशप्रसाद यादवले खेतमा धान लहलहाउँदा पनि मल नपाएको गुनासो गरे । रोप्ने र हुर्किएको बेला हरेक वर्ष मलको अभाव हुने गरेको उनीजस्ता आमकिसानको गुनासो हो । कृषि सामग्री कम्पनी लिमिटेड राजविराजका निमित्त प्रबन्धक सोनेलाल मुर्मुका अनुसार किसानको मागअनुसार मलको आपूर्ति हुन सकिरहेको छैन ।

मल नपाउँदा किसान लुकीचोरी भारतबाट ल्याउन बाध्य छन् । कृषि ज्ञान केन्द्र गौरका अधिकृत अशोककुमार सिंहले धान रोपेको ५० देखि ६० दिनभित्र गजाउने र बाला पसाउने हुँदा मल अत्यन्तै आवश्यक पर्ने बताए । रैथाने धानमा चाँडै रोग लाग्ने र मल अभाव हुने भएकाले पछिल्ला वर्ष धान खेती गर्ने किसान घट्दै गएका छन् ।

प्रकाशित : भाद्र २५, २०७८ १२:३०
प्रतिक्रिया
पठाउनुहोस्

घरैपिच्छे ज्वरो–रुघाखोकी

भाइरल ज्वरोका ५३ बिरामीको पीसीआर गर्दा ५ जनामा कोरोना संक्रमण
प्रदेश २ ब्युरो

जनकपुर — प्रदेश २ का आठवटै जिल्लामा घरैपिच्छे ज्वरो र रुघाखोकीका बिरामी देखिएका छन् । कोरोना भाइरससँग मिल्दोजुल्दो लक्षण भएका बिरामीको संख्या दिनहुँ बढ्दो छ । तर मौसम प्रतिकूलताका कारण पनि ज्वरो र रुघाखोकी भएको हुन सक्ने चिकित्सकको अनुमान छ । छिनमै चर्को घाम, छिनमै पानी पर्ने असुहाउँदो मौसम सातायता प्रदेशमा कायमै छ, जसका कारण बिरामी संख्या बढ्दो छ । 

महोत्तरीको बर्दिवासस्थित शुभस्वस्तिक अस्पतालमा उपचार गराइरहेका ज्वरोका बिरामी । तस्बिर : सुनीता बराल/कान्तिपुर

जनकपुर सीता चोकका विनोद भण्डारीलाई गत साता एकाएक ज्वरोले च्याप्यो । पारासिटामोल खाँदा पनि निको भएन । बरु, शरीर झन् गल्यो । शरीर काँप्ने ज्वरोले दुई दिन सताएपछि भण्डारीलाई अस्पताल नै भर्ना गर्नुपर्‍यो । उनकी पत्नीलाई पनि ज्वरो र रुघाखोकीले छोयो । अहिले उनीहरूको अवस्था सामान्य छ । राजविराज नगरपालिका–१० मैटगढी गाउँमा हाल झन्डै डेढ सयभन्दा बढीमा ज्वरो, शरीर दुख्ने, रुघाखोकीलगायतका लक्षण देखिएको छ । तीन/चार दिनयता उक्त बस्तीमा यस्तो लक्षण भएका बिरामीको संख्या बढ्दो रहेको राजविराज नगरपालिकाका प्रमुख शम्भुप्रसाद यादवले जानकारी गराए । बिरामीको संख्या निरन्तर बढेपछि शुक्रबारबाट नगरपालिकाले त्यहाँ स्वास्थ्य शिविर नै सञ्चालनमा ल्याएको छ ।

सप्तरीको मैटगढी मात्रै नभई जिल्लाका अधिकांश भेगमा ज्वरो आएका बिरामीको संख्या ह्वात्तै बढेको छ । जिल्ला स्वास्थ्य कार्यालय सप्तरीका प्रमुख दुनियालाल यादवका अनुसार जिल्लाका प्रायःजसो परिवारमा कम्तीमा एक जना व्यक्ति ज्वरो, शरीर दुख्ने, रुघाखोकी लगायतका समस्याले पीडित छन । ग्रामीण भेगका अधिकांश स्वास्थ्य संस्थामा यस्ता लक्षण भएका बिरामीको भीड रहेको यादवले बताए । राजविराजस्थित गजेन्द्रनारायण सिंह अस्पतालमा उपचाररत बिरामीमध्ये झन्डै आधाभन्दा बढी ज्वरो र रुघाखोकीकै बिरामी रहेको अस्पतालका मेडिकल सुपरिन्टेन्डेन्ट डा. रञ्जितकुमार झाले जानकारी गराए । बिरामीमा ज्वरो, रुघा, शरीर दुख्नेलगायतका लक्षण देखिएपछि कोरोना संक्रमणको त्रास बढेको छ । गजेन्द्रनारायण अस्पतालको पीसीआर मेसिन बिग्रिएका कारण सप्तरीमा कोरोना परीक्षण ठप्प छ ।

बारामा पनि कहिले वर्षा र कहिले चर्को घामसँगै मौसम परिवर्तनले भाइरल ज्वरोको प्रकोप बढेको छ । कलैया अस्पतालमा बिरामीको उपचार गर्न स्वास्थ्यकर्मीलाई केही सातादेखि भ्याइनभ्याइ छ । ग्रामीण क्षेत्रमा पनि प्रकोप उत्तिकै छ । अस्पताललगायत कलैयाका निजी स्वास्थ्य क्लिनिकमा पनि बिरामीको चाप बढेको छ । विभिन्न गाउँ ठाउँमा अहिले भाइरल ज्वरोसँगै संक्रमितमा टाइफाइड देखिएको कलैया अस्पतालका चिकित्सकले बताए । बिरामी पर्नेहरूमा बालबालिकादेखि वृद्धवृद्धासम्म छन् । एउटै घरका चार/पाँच जनासम्म पनि बिरामी परेका कलैया–४ का अजय जयसवालले बताए ।

संक्रमितहरूमा टाउको दुख्ने, उच्च ज्वरो आउने, रिंगटा लाग्ने, रुघाखोकीसँगै हाँच्छ्यु आउने, आँखा रातो हुने, घाँटी खसखस गर्ने, जीउ दुख्ने, जाडो लागेर ज्वरो आउने यसको लक्षण देखिएको हो । उमालेको पानी पिउन, मास्क लगाउन, चिसो, धूलोधूवाँबाट बच्न र पानी तताएर बाफ लिन चिकित्सकहरूले सल्लाह दिइरहेका छन् । कलैया अस्पतालका निमित्त मेडिकल सुपरिन्टेन्डेन्ट गौरव महतोले ओपीडी र इमर्जेन्सीमा दैनिक आउने १ सय ५० देखि २ सय बिरामीमा ४० देखि ५० प्रतिशतसम्म भाइरल ज्वरो देखिएको बताए । रोगीको चाप बढेअनुसार स्वास्थ्यकर्मी पर्याप्त नभएकाले भर्ना गर्ने अवस्था नरहेको उनको भनाइ छ । जिल्लामा तीन दिनयता भाइरलका ५३ बिरामीको पीसीआर गर्दा ५ जनामा कोभिड पोजिटिभ देखिएको छ । तिनीहरूलाई भर्ना गर्ने अवस्था नभएकाले घरमै बस्न सुझाएको उनले बताए । यो सरुवा रोग भएकाले सरसफाइसहित उमालेको पानी पिउन र पानी तताएर बाफ लिन महतोले सुझाए ।

कोरोनासँग मिल्दोजुल्दो लक्षण

कोभिडसँग मिल्दोजुल्दो लक्षण भएका बिरामी सर्लाहीमा पनि बढ्न थालेका छन् । बिरामीमा उच्च ज्वरो तथा रुघाखोकीजस्ता लक्षण देखिएको छ । पीसीआर जाँच गर्दा यस्ता बिरामीमा ५ प्रतिशतमा संक्रमण देखिएको अस्पतालका निमित्त मेडिकल सुपरिन्टेन्डेन्ट डा. नवलकिशोर झाले बताए । झाका अनुसार वर्षासँगै गर्मीमा विभिन्न रोगका कीटाणु सक्रिय हुने भएकाले भाइरल ज्वरोका बिरामीको संख्या बढेको हो ।

शारीरिक रूपमा कमजोर बालबालिका, वृद्धवृद्धा भाइरल ज्वरो, टाइफाइडबाट प्रभावित छन् । ‘अहिले भाइरल ज्वरोका बिरामीको संख्या बढेको छ, यो कोभिडको लक्षणभन्दा पनि मौसमी रोग हो,’ उनले भने, ‘जिल्ला अस्पतालमा आएका बिरामीको पीसीआर जाँच गर्दा पाँच प्रतिशतको हाराहारीमा मात्र कोभिड फेला परे पनि सजगता भने अपनाउनुपर्ने देखिन्छ ।’ अस्पताल तथा निजी क्लिनिक भरिभराउ रहेकाले चिकित्सकसँग स्वास्थ्य जाँच गराउन बिरामीले घण्टौं पालो कुर्नुपर्ने अवस्था छ ।

इन्फ्लुएन्जा–ए का बिरामी घट्दै

पर्सामा ‘इन्फ्लुएन्जा–ए’ का बिरामीको संख्या केही घटे पनि न्यून भइसकेको छैन । नारायणी अस्पतालको मेडिकल ओपीडीमा अझै पनि दैनिक २५ देखि ३० जना बिरामी आइरहेका अस्पतालका आकस्मिक विभाग प्रमुख एवम् कोभिड संयोजक डा. उदयनारायण सिंहले जानकारी दिए । ‘मेडिकल ओपीडीबाहेक बाल रोग विभागमा पनि केही बिरामी दैनिक उपचारका लागि आइरहेका छन्,’ उनले भने, ‘इन्फ्लुएन्जा भएका बिरामी सबै उमेरका छन् । २० देखि ६० वर्षका बिरामी बढी छन् ।’

बिरामी सबैमा ज्वरो, भोक नलाग्ने, जीउ दुख्ने र नाकबाट पानी आउने समान लक्षण छ । कतिपय पोस्ट भाइरलका बिरामी पनि आइरहेको उनले बताए । तीमध्ये कोभिडसँग मिल्दोजुल्दो लक्षण भएकाको स्वाब संकलन गरी पीसीआर परीक्षण गर्ने गरिएको उनले बताए । शरीरमा पानी कम भएर कमजोर अवस्थामा आएका बिरामीलाई अस्पतालको आकस्मिक कक्षमा भर्ना गरी उपचार गर्ने गरिएको उनले बताए ।

पर्सामा करिब एक महिनादेखि ‘इन्फ्लुएन्जा–ए’ ज्वरो फैलिएको छ । केन्द्रीय प्रयोगशाला टेकुमा गत साता गरिएको परीक्षणबाट ‘इन्फ्लुएन्जा–ए’ ज्वरो फैलिएको पुष्टि भएको थियो । ५ वर्षयता पहिलोपटक यसरी ‘इन्फ्लुएन्जा–ए’ का बिरामीको संख्या यस वर्ष ह्वात्तै बढेको डा. सिंहले बताए । शुक्रबार प्रदेश २ मा १२ जना कोरोना संक्रमित थपिएका छन् ।

-अवधेशकुमार झा (सप्तरी), ओमप्रकाश ठाकुर (सर्लाही), लक्ष्मी साह (बारा) र शंकर आचार्य (पर्सा)

प्रकाशित : श्रावण १८, २०७८ १३:०४
पूरा पढ्नुहोस्
प्रतिक्रिया
पठाउनुहोस्
×