अदालतको फैसलाप्रति ओलीको टिप्पणी- 'कांग्रेसले विघटन गर्दा सदर, एमालेले गर्दा बदर'
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
पोखरा — एमाले अध्यक्ष एवं पूर्वप्रधानमन्त्री केपी शर्मा ओलीले एमालेले गरेकैले संसद् विघटन बदर गरेको बताएका छन् । ‘साधारण नियम छ अदालतको, संविधानमा जेसुकै लेखेको होस्, कांग्रेसले विघटन गरे सदर, एमालेले विघटन गर्यो भने बदर । यो पहिलेदेखि हो,’ मंगलबार पोखरामा उनले भने, ‘मनमोहन अधिकारीलाई बदर गरेर शेरबहादुर देउवा प्रधानमन्त्री, केपी ओलीका पालामा पनि त्यही ।’
![](https://assets-cdn.ekantipur.com/uploads/source/ads/reward-900x100-pxl-2462024072414.gif)
![अदालतको फैसलाप्रति ओलीको टिप्पणी- 'कांग्रेसले विघटन गर्दा सदर, एमालेले गर्दा बदर'](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2021/politics/kp-oli-pokhara-0792021123951-1000x0.jpg&w=1001&h=0)
![](https://assets-cdn.ekantipur.com/uploads/source/ads/sathi-deposit-900-100-1262024124333.gif)
कास्की जिल्लास्तरीय कार्यकर्ता भेलामा उनले काम गर्न पनि नसक्ने र बस्न पनि नसक्ने स्थितिमा संसद् विघटन गरेको भनाइ दोहोर्याए । ‘अदालतले फैसला गरेपछि जे पनि मान्नुपर्छ । सबैलाई थाहा छ । मान्न पर्ने भएपछि अदालतले पुनर्स्थापना गरिदियो,’ उनले भने, ‘अहिले अदालतबाट फलानालाई प्रधानमन्त्री तोकिएको छ भनेर सोझै दिने परमादेशसमेत हुन थाल्यो ।’ ०५३ सालमा मनमोहन अधिकारीलाई हटाउँदा पुन:स्थापना भनिए पनि अहिले एक कदम अगाडि बढेर परमादेश आएको उनले थपे ।
एमालेको सरकार ढाल्न अदालतले नै प्रधानमन्त्री तोकिदिएको उनको आरोप छ । ‘परमादेशबाट प्रधानमन्त्री तोक्ने व्यवस्था संविधानमा छैन,’ उनले भने, ‘विश्वमा अहिलेसम्म लोकतान्त्रिक प्रणालीमा, लोकतान्त्रिक अभ्यासमो यस्तो भएको छैन तर नेपालको सर्वोच्च अदालतले गर्यो ।’
लोकतन्त्रमा विश्वास गर्ने र शक्ति पृथकीकरणमा विश्वास गर्ने शक्ति भएकोले अदालतको फैसलालाई मानेर अगाडि बढेको उनको भनाइ छ ।
![](https://assets-cdn.ekantipur.com/uploads/source/ads/900-x-100-0172024023126.gif)