काष्ठमण्डपको छानो छाउने काम सुरु- समाचार - कान्तिपुर समाचार

काष्ठमण्डपको छानो छाउने काम सुरु

कान्तिपुर संवाददाता

काठमाडौँ — काठमाडौंको वसन्तपुरस्थित ऐतिहासिक तथा पूरातात्विक महत्वको सम्पदा काष्ठमण्डपको छानो छाउने काम सुरु गरिएको छ ।

२०७२ साल वैशाख १२ गते आएको विनाशकारी भूकम्पले ध्वस्त बनाएको सो सम्पदाको पुनर्निर्माणको काम अन्तिम चरणमा पुगेपछि छानो छाउने काम सुरु गरिएको हो । सातौं शताब्दीमा बनेको सो सम्पदामा मौलिक प्रविधिकै प्रयोग गरेर झिंगटीको छानो छाउने काम सुरु गरिएको काष्ठमण्डप पुनर्निर्माण समितिका अध्यक्ष राजेश शाक्यले जानकारी दिए ।

उनले सो सम्पदाको पुनर्निर्माणको काम सम्पन्न गर्न अझै केही महिना लाग्ने पनि स्पष्ट पारे । समितिले पुरानै मौलिकतालाई कायम राखेर सो सम्पदा पुनर्निर्माणको काम सम्पन्न गरेर विश्वलाई नै नमूना उदाहरण पेश गर्न सक्षम हुने दाबी समेत गरेको छ । समितिका अध्यक्ष शाक्यले भने, ‘यो सम्पदाको पुनर्निर्माणको काम नियमित भइरहेको छ । यो काम अब अन्तिमतिर आइरहेको छ । ’ छानो छाउने काम सम्पन्‍न हुन केही महिना लाग्‍ने उनले बताए ।


हालसम्म यो सम्पदाको पुनर्निर्माणका लागि ११ करोड ५० लाख रुपैयाँ खर्च गरिएको छ । काठमाडौं महानगरपालिकाको अनुदान सहायतामा भइरहेको पुनर्निर्माणको काम छिटो सम्पन्न गरी उद्घाटन गर्ने योजना तय गरिएको समितिका अध्यक्ष शाक्यले बताए ।

काठैकाठको प्रयोग, झिंगटीको छाना, चारकुने इाटका गरा, लेसाइलो मोटाको लिपाइ र मिहिन बुट्टा कुँदिएका काठको विशाल संरचना थियो–काष्ठमण्डप । समितिले सोही मौलिक प्रविधिको उपयोग गरी यसको पुनर्निर्माण गरेकाले काम सम्पन्न गर्न समय लागेको पनि स्पष्ट पारेको छ ।

प्रकाशित : भाद्र २२, २०७८ १५:२९
प्रतिक्रिया
पठाउनुहोस्

गृह मन्त्रालयको विज्ञप्ति तत्काल सच्याउन पत्रकार महासंघको माग

कान्तिपुर संवाददाता

काठमाडौँ — नेपाल पत्रकार महासंघले गृह मन्त्रालयद्वारा जारी पछिल्ला दुई विज्ञप्तिप्रति गम्भीर ध्यानाकर्षण भएको जनाउँदै तत्काल सच्याउन माग गरेको छ । 

महासचिव रोसन पुरीले मंगलबार विज्ञप्ति जारी गर्दै २०७८ भदौ १८ र २० गतेको विज्ञप्ति संविधानप्रदत्त अधिकारलाई कुण्ठित बनाउने तथा नागरिकको स्वतन्त्रतापूर्वक भेला वा प्रदर्शन गर्न पाउने अधिकारलाई नियन्त्रण गर्ने नियत रहेकोले तत्काल सच्याउन माग गरेका हुन् ।

मित्र राष्ट्रको बहानामा सरकारले संविधानले दिएको अधिकार र स्वतन्त्रता खोस्न खोजेको भन्दै नेपाली सञ्‍चारमाध्यम गम्भीर बनेको पनि जनाइएको छ ।

'मित्र राष्ट्रसँगको सम्बन्धको बहानामा सरकारले संविधानले दिएको शान्तिपूर्ण आन्दोलन गर्न पाउने अधिकार र अभिव्यक्ति स्वतन्त्रता खोस्न खोजेको कुरामा महासंघ प्रस्ट छ । मित्र राष्ट्रसँगको सम्बन्धको विषयमा के लेख्ने र के नलेख्ने भन्ने कुरामा नेपाली प्रेस गम्भीर छ,' विज्ञप्तिमा लेखिएको छ, 'महासंघ संविधानले सुनिश्चित गरेको प्रेस तथा अभिव्यक्ति स्वतन्त्रता र नागरिकको संवैधानिक स्वतन्त्रताको सम्मान गर्न सरकारको गम्भीर ध्यानाकर्षण गराउँदछ ।'

महासंघले नागरिकको अभिव्यक्ति स्वतन्त्रता प्रत्याभूत गरेको नेपालको संविधानको मूल मर्म र भावनाविपरीत आएका ती दुई विज्ञप्ति प्रेस तथा अभिव्यक्ति स्वतन्त्रतालाई समेत नियन्त्रण गर्ने उद्देश्य प्रेरित भएको ठहर गरेको छ ।

प्रकाशित : भाद्र २२, २०७८ १५:२९
पूरा पढ्नुहोस्
प्रतिक्रिया
पठाउनुहोस्
×