रेलवे जग्गाको मुआब्जा पुनरावलोकन गर्न माग
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
काठमाडौँ — महोत्तरीको बर्दिबासका रेलवे जग्गा पीडितहरुले आफूहरुलाई दिइएको मुआब्जा नभएको भन्दै पुनरावलोकन गर्न माग गरेका छन् । स्थानीय पीडित किसानहरुले गृहमन्त्री बालकृष्ण खाँणलाई भेटेर आइतबार ज्ञापन पत्र बुझाउँदै जग्गाको मुआब्जा वापत्को मूल्य पुनरावलोकन गर्न माग गरेका छन् ।
![](https://assets-cdn.ekantipur.com/uploads/source/ads/reward-900x100-pxl-2462024072414.gif)
![रेलवे जग्गाको मुआब्जा पुनरावलोकन गर्न माग](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2021/third-party/railway-muaabja-bibad-2982021040516-1000x0.jpg&w=1001&h=0)
![](https://assets-cdn.ekantipur.com/uploads/source/ads/sathi-deposit-900-100-1262024124333.gif)
राष्ट्रियसभाकी उपाध्यक्ष शशिकला दाहाल, पूर्वमन्त्री एवं सांसद गिरिराजमणि पोखरेल, बर्दिबास नगरपालिकाका मेयर बिदुर कार्की र राजनीतिक दलका प्रतिनिधिहरुसहित गृहमन्त्रालय पुगेका किसानहरुले यस्तो माग गरेका हुन् । उनीहरुले स्थानीय जनप्रतिनिधि र किसानलाई थाहै नदिई एकतर्फी रूपमा ०७५ सालको मुल्यांकनका आधारमा मुआब्जा निर्धारण गरेको भन्दै पुनरावलोकन गर्न माग गरेका छन् ।
जवाफमा गृहमन्त्री बालकृष्ण खाँणले मुआब्जा वितरणको यथार्थ बुझेर पुनरावलोकनका लागि पहल गर्ने बताएका छन् । ‘समय सापेक्ष तरिकाले जग्गाको मुआब्जा निर्धारण हुनुपर्छ । यो कुरामा म सकारात्मक छु । तपाईंहरु कानुनबमोजिम अहिलेको मूल्यांकनका आधारमा मुआब्जा पाउनुपर्छ, त्यसमा सरकारी निर्णय पारदर्शी हुनुपर्छ । त्यो जनताको पक्षमा हुनुपर्छ,’ मन्त्री खाँणले भनेका थिए ।
सो क्रममा राष्ट्रियसभाकी उपाध्यक्ष दाहालले किसानलाई मर्का नपर्ने गरी निर्णयमा पुनर्विचार गर्न आग्रह गरिन् ।
पूर्वमन्त्री पोखरेलले समय सापेक्ष तरिकाले किसानलाई मार नपर्नेगरी मुआब्जा रकमको पुनर्मूल्यांकन गर्ने व्यवस्था गरिदिन सरकारसँग आग्रह गरेका थिए । सरकारले रेलवेका लागि बर्दिबासका १५० परिवारको ५९ बिघा जग्गा अधिग्रहण गरेको छ । तर, त्यो जग्गाको मुआब्जा भने तीन वर्षअघिको मूल्यका आधारमा पाएको किसानको गुनासो छ ।
किसानले त्यहाँबाट विस्थापित भएपछि अन्यत्र बासको बन्दोबस्त हुने गरी मुआब्जा रकम व्यवस्था गरिदिन आग्रह गरेका छन् ।
![](https://assets-cdn.ekantipur.com/uploads/source/ads/900-x-100-0172024023126.gif)