सरकारले छिट्टै पूर्णता पाउने अपेक्षा गरिएको छ : प्रवक्ता श्रेष्ठ- समाचार - कान्तिपुर समाचार
कान्तिपुर वेबसाईट
AdvertisementAdvertisement

सरकारले छिट्टै पूर्णता पाउने अपेक्षा गरिएको छ : प्रवक्ता श्रेष्ठ

कान्तिपुर संवाददाता

काठमाडौँ — नेकपा (माओवादी केन्द्र)को शुक्रबार पार्टी केन्द्रीय कार्यालय पेरिसडाँडामा बसेको स्थायी कमिटी बैठकले सरकारले छिट्टै पूर्णता पाउने विश्वास व्यक्त गरेको छ । पार्टीको तर्फबाट सरकारमा सहभागी हुने मन्त्रीहरुको विषयमा भने बैठकमा छलफल नगरिएको प्रवक्ता नारायणकाजी श्रेष्ठले बताए ।

गठबन्धनभित्र मन्त्रालयको टुंगो नै लगाउने काम नभएकाले पार्टीभित्रबाट कुन व्यक्तिलाई पठाउने भन्ने विषयमा छलफल नभएको उनले बताए । प्रवक्ता श्रेष्ठले भने, ‘सरकारले छिट्टै पूर्णता पाउने अपेक्षा गरिएको छ । गठबन्धनभित्र मन्त्रालय कसले पाउने भन्ने टुंगो नलागेकाले पार्टीभित्र कसलाई पठाउने भन्ने विषयमा छलफल गरिएको छैन । १/२ दिन भित्र सरकारले पूर्णता पाउने गरी गठबन्धनभित्र छलफल हुन्छ ।’

बैठकले सत्तारुढ गठबन्धन कार्यदलले सरकारको न्यूनतम साझा कार्यक्रम तयार पारेकोमा धन्यवाद दिँदै छिट्टै सार्वजनिक गर्न पनि आग्रह गरेको छ ।

त्यसैगरी माओवादी केन्द्रले सुकुम्बासी, भूमिहीन किसान, दलित, अव्यवस्थित बसोबासको समस्या समाधान तथा कार्यान्वयन गर्न अभिलम्ब उच्चस्तरीय आयोग गठन गर्न पनि सरकारलाई अनुरोध गरेको छ । सरकारले केपी ओली नेतृत्वको अघिल्लो सरकारले भूमि सम्बन्धी समस्या समाधान गर्न गठित आयोग खारेज गरेपछि माओवादी केन्द्रले उच्चस्तरीय आयोग तत्काल गठन गरी सो समस्या समाधान गर्न सरकारलाई आग्रह गरेको हो । संविधान र कानुनको परिधिमा रहेर ती समस्या समाधान गर्न उच्चस्तरीय आयोग गठन गर्न सरकारलाई अनुरोध गरिएको उनले जानकारी दिए ।

माओवादी केन्द्रले लुम्बनी प्रदेशसभाका आफ्नो पार्टीकी सांसद विमला वलीलाई मुख्यमन्त्री शंकर पोखरेलको निवासमा 'बन्धक बनाएको' घटनाप्रति आपत्ति जनाउँदै भत्सर्ना समेत गरेको छ ।

प्रकाशित : श्रावण २२, २०७८ १९:३७
प्रतिक्रिया
पठाउनुहोस्

उपेन्द्र यादवले मधेसी एकतामाथि कुठाराघात गरे : महतो

कान्तिपुर संवाददाता

राजविराज — निर्वाचन आयोगबाट आधिकारिकता गुमाएका जसपा महन्थ ठाकुर समूहका नेता राजेन्द्र महतोले उपेन्द्र यादवले मधेसी एकतामाथि कुठाराघात गरेको आरोप लगाएका छन् । सप्तरीको राजविराजमा शुक्रबार आयोजित अगुवा कार्यकर्ता भेलालाई सम्बोधन गर्दै नेता महतोले उपेन्द्र यादव समूहले मधेस र मधेसी जनताप्रति अक्षम्य अपराध गरेको पनि बताए । 


मधेसलाई कमजोर गर्ने षड्यन्त्रअन्तर्गत यादवको मागबमोजिम निर्वाचन आयोगले जसपा फुटाएको दाबी गरे । उनले भने,‘पार्टीभित्र मत भिन्नता हुन्छन् तर मधेसी जनताको एकताको भावनालाई कुठाराघात गर्दै उपेन्द्र यादव पार्टी विखण्डन गर्न निवेदन लिएर दुगुर्दै निर्वाचन आयोग गए, निर्वाचन आयोगले उसको मागबमोजिम पार्टी फुटाइदियो’उनले भने ।

मधेसको शक्तिलाई एकीकृत गर्ने प्रयासस्वरुप तत्कालीन संघीय समाजवादी पार्टीसित बिनागृहकार्य एकता गरेको स्मरण गर्दै महतोले भने,‘तर उपेन्द्र यादवहरुको समूह मधेस कमजोर गर्ने कार्य गरे जुन क्षमायोग्य छैन ।’

केपी ओली नेतृत्वको सरकारमा १८ महिना रहेर उपेन्द्र यादवले गर्न नसकेको कार्य आफूहरुले १८ दिनमा गरेको दाबी गर्दै महतोले भने,‘१ सय ३९ जनाको मुद्दा फिर्ता, नागरिकता अध्यादेश र संविधान संशोधनका लागि कार्यदल गठन लगायतका कार्य हामीले सरकारमा सामेल हुनुभन्दा पूर्व नै गर्‍यौ ,उपेन्द्र जस्तो अलिखित सम्झौता गरेर सरकारमा गएनौं ।’ महतोले निर्वाचन आयोगले जसपाको सन्दर्भमा गरेको फैसला उचित नभएकोले त्यसविरुद्ध सर्वोच्च अदालतमा न्यायका लागि गएको बताउँदै सर्वोच्च अदालतले दुई हप्ताभित्र गर्ने निर्णयका आधारमा नयाँ पार्टी खोल्ने वा के गर्ने भन्ने सन्दर्भमा विचार गर्ने बताए ।

नेता केशव झाले नेपालको राजनीतिमा अस्थिरता ल्याउने कार्य माओवादी केन्द्रका अध्यक्ष प्रचण्डले गरिरहेको आरोप लगाउँदै त्यसको पुच्छर बन्न केही ब्यक्ति गएको आरोप लगाए । उनले तत्कालीन राजपा र समाजवादी पार्टीबीच एकता भए पनि समायोजन प्रक्रिया हुन नदिई उपेन्द्र यादव समूहले सुरुदेखि नै पार्टी कमजोर बनाउने खेल खेलेको आरोप लगाए ।

प्रकाशित : श्रावण २२, २०७८ १८:५२
पूरा पढ्नुहोस्
प्रतिक्रिया
पठाउनुहोस्
×