सर्लाहीमा चिकित्सकमाथि आक्रमण गर्न खोज्दा प्रहरीसँग झडप- समाचार - कान्तिपुर समाचार

सर्लाहीमा चिकित्सकमाथि आक्रमण गर्न खोज्दा प्रहरीसँग झडप

ओमप्रकाश ठाकुर

सर्लाही — सर्लाहीको लालबन्दीस्थित एक निजी अस्पतालका चिकित्सकमाथि स्थानीयले आक्रमण गर्न खोज्दा प्रहरीसँग झडप भएको छ । प्रहरीले चार राउण्ड हवाई फायर गरेपछि भिड तितरबितर भएको छ । लालबन्दीस्थित मोडेल अस्पतालमा टेटनसका सुई लगाउन आएका एक बिरामीलाई रेवीजको सुई दिएपछि स्थानीयले चिकित्सकमाथि आक्रमण प्रयास गरेका थिए । हो–हल्ला हुनेबित्तिकै अस्पतालमा पुगेको प्रहरी र लालबन्दी नगरपालिका–६ का स्थानीयसँग झडप भएको थियो । 

अस्पतालमा तनावको स्थिति उत्पन्न भएपछि प्रहरीले हवाई फायर खोलेर भीड तितरबितर पारेको ईलाका प्रहरी कार्यालयका प्रहरी निरीक्षक निर्मल थापाले बताए । उनले चार राउण्ड हवाई फायर गरेर स्थिति नियन्त्रणमा लिनु परेको जानकारी दिए । प्रहरीको बल प्रयोगबाट पछि हटेका स्थानीय केही पर पूर्व–पश्चिम राजमार्गसमेत अवरुद्ध पारेका थिए । राजमार्ग अवरुद्ध भएपछि ईलाका प्रहरी लालबन्दी र सशस्त्र प्रहरीको टोलीले सामान्य बल प्रयोग गरेर राजमार्ग खुलाएका छन् । झडपमा घाइते भए नभएको जानकारी अहिलेसम्म नआएको प्रहरी निरीक्षक थापाले बताए ।


प्रकाशित : श्रावण १५, २०७८ २०:४०
प्रतिक्रिया
पठाउनुहोस्

पोखरीमा ९ दिने शिशुसहित तीन जनाको शव फेला

ओमप्रकाश ठाकुर

सर्लाही — ब्रह्मपुरी गाउँपालिका–३ भेल्हीस्थित पोखरीमा तीन जनाको शव फेला परेको छ । गाउँको पूर्वतर्फ रहेको पोखरीमा स्थानीय सञ्जीव कापरकी २५ वर्षीया श्रीमती रितेबादेवी, दुई वर्षीया छोरी रोमाकुमारी र ९ दिने छोराको शव भेटिएको प्रहरीले जनाएको छ । 

प्रहरी नायब उपरीक्षक माधवप्रसाद बुढाथोकीका बुधबार बिहान सूर्यवंश चौधरीको पोखरीमा तीन जनाको शव तैरिरहेको देखेपछि स्थानीयले प्रहरीलाई खबर गरेका थिए । ती महिला बच्चासहित मंगलबार राति नै घरबाट निस्केको स्थानीयलाई उद्धृत गर्दै प्रहरीले जनाएको छ

पत्नी र बच्चाको खोजीमा निस्किएका भनिएका सञ्जीव अहिलेसम्म घर आइनपुगेको र उनीसँग सम्पर्क गर्ने प्रयास भइरहेको प्रहरीले जानकारी दिएको छ ।

शव पोस्टमार्टमका लागि जिल्ला अस्पताल ल्याइएको र घटनाबारे थप अनुसन्धान भइरहेको प्रहरी नायब उपरीक्षक बुढाथोकीले बताए ।

प्रकाशित : श्रावण १३, २०७८ ११:५९
पूरा पढ्नुहोस्
प्रतिक्रिया
पठाउनुहोस्
×