विपक्षी गठबन्धनलाई थप बलियो बनाउन शीर्ष नेताहरुबीच सहमति- समाचार - कान्तिपुर समाचार

विपक्षी गठबन्धनलाई थप बलियो बनाउन शीर्ष नेताहरुबीच सहमति

अदालतको निष्पक्षता र विश्वास प्रभावित पार्ने काम नगर्न सरकारको ध्यानाकर्षण
कान्तिपुर संवाददाता

काठमाडौँ — विपक्षी गठबन्धनलाई थप बलियो बनाउन सम्बद्ध दलका शीर्ष नेताहरुबीच सहमति बनेको छ ।

एमाले वरिष्ठ नेता माधवकुमार नेपालको कोटेश्वरस्थित निवासमा कांग्रेस सभापति शेरबहादुर देउवा र माओवादी केन्द्रका अध्यक्ष पुष्पकमल दाहालबीच सोमबार छलफल भएको थियो ।

उक्त छलफलमा राष्ट्र, गणतन्त्र, संविधान र लोकतन्त्रको रक्षाका लागि गठबन्धनलाई थप बलियो बनाउने सहमति बनेको हो ।

नेता नेपालका स्वकीय सचिव मोहन गौतमका अनुसार नेताहरुले ‘वर्तमान गठबन्धन एकले अर्कोलाई उपयोग गर्न होइन राष्ट्र, गणतन्त्र, संविधान र लोकतन्त्रको रक्षा एवम् जनताको सुविधा र हितलाई अभिवृद्धि गर्न बनेको हो’ भन्नेमा पुन: स्पष्टता जनाएका छन् । उनका अनुसार नेताहरुबीच समसामयिक राजनीतिक घटनाक्रममाथि पनि समीक्षा भएको छ ।

यसबाहेक नेताहरुले ‘आपसी सम्बन्ध बलियो बनाउने तथा एक आपसमा अविश्वास उत्पन्न गराउने कुराबाट सजग रहने प्रतिबद्धता’ पनि जनाएको गौतमले बताए ।

कोभिड महामारी र जनसरोकारका विषयमा सरकारको ध्यानाकर्षण गराउने, तत्काल सबैलाई पुग्नेगरी कोभिड विरूद्धको खोप तथा विपन्नलाई राहत प्याकेज उपलब्ध गराउनसमेत नेताहरुले माग गरेका छन् ।

यसैगरी, गठबन्धनका नेताहरुले अदालतमा विचाराधिन मुद्दालाई प्रभावित गर्न सरकारले गरेका प्रयत्नबारे छलफल भएको र अदालतको निष्पक्षतामा र विश्वास प्रभावित पार्ने काम नगर्न सरकारको ध्यानाकर्षण गराएका छन् ।

राज्यका कतिपय अंग र केही संवैधानिक निकायहरूका भूमिकाको निष्पक्षता र निर्णय क्षमतामा गठबन्धनका नेताहरुले आंशका गरेका छन् । उनीहरुले यस्ता निकायबाट निष्पक्ष र समयमा निर्णय गर्न ध्यानाकर्षण पनि गराएका छन् ।

यसैगरी, पूर्वप्रधानमन्त्री झलनाथ खनालको स्वास्थ्य अवस्थाबारे चासो, चिन्ता एवम् शीघ्र स्वास्थ्यलाभको कामना गरिएको पनि गौतमले बताए ।

छलफलमा कांग्रेस नेता पूर्णबहादुर खड्का पनि सहभागी थिए ।

प्रकाशित : जेष्ठ ३१, २०७८ २१:०१
प्रतिक्रिया
पठाउनुहोस्

एमाले सुदूरपश्चिम संसदीय दलद्वारा ओली पक्षधर ७ जना सांसदलाई निलम्बन गर्ने निर्णय

निलम्बन गरिएकामा पठानसिंह बोहरा, रतनबहादुर थापा, लिलाधर भट्ट, बलदेव रेग्मी, माया तामाङ बोहरा, नेपालु चौधरी र ग्याल्बोसिंह बोहरा रहेका छन्
अर्जुन शाह

धनगढी — ह्वीप उल्लंघन गरेको आरोपमा नेकपा एमाले सुदूरपश्चिम संसदीय दलको सोमबार बसेको बैठकले ओली पक्षधर ७ जना सांसदलाई निलम्बन गर्ने निर्णय गरेको छ । 

एमाले सुदूरपश्चिम संसदीय दलको बैठक । फाइल तस्बिर ।

निलम्बन गरिएकामा पठानसिंह बोहरा, रतनबहादुर थापा, लिलाधर भट्ट, बलदेव रेग्मी, माया तामाङ बोहरा, नेपालु चौधरी र ग्याल्बोसिंह बोहरा रहेका छन् । उनीहरुमध्ये बोहरा र थापालाई १५ दिन, भट्ट र रेग्मीलाई १० दिन र अन्य चार जनालाई ७ दिन निलम्बन गर्ने निर्णय गरिएको एमाले संसदीय दलकी प्रमुख सचेतक दुर्गाकुमारी कामीले बताइन् ।

जेठ २५ गते मुख्यमन्त्री त्रिलोचन भट्टलाई विश्वासको मत दिने निर्णयका विरुद्ध अध्यक्ष ओली पक्षधर उनीहरुले दलको ह्वीप उल्लंघन गरेका थिए । त्यस अभियोगमा उनीहरुलाई दलका नेता प्रकाशबहादुर शाहले २४ घण्टे स्पष्टिकरण सोधेका थिए । आइतबार निर्णयार्थ पेश भएको नीति तथा कार्यक्रमको समेत उनीहरुले विपक्षमा मत जाहेर गरेका थिए ।

निलम्बनको निर्णयमा परेका सांसदहरुले भने दलको विधान नै वैधानिक नभएकाले त्यसको कुनै औचित्य नभएको बताएका छन् । ‘संसदीय दलको विधान केन्द्रिय कमिटिबाट अनुमोदन हुनुपर्ने नियम छ, त्यो भएको छैन्,’ सांसद बोहराले भने, ‘हामीले पार्टी निर्देशन मान्य हो । पार्टीले विपक्षमा मतदान गर्न निर्देशन गरेको हो ।’ दलको बैठकमा निलम्बन गरिएका सांसदहरु पनि उपस्थित थिए ।

संसदीय दलले गरेको निर्णय सभामुखले स्वीकृत गरी सूचना टाँस गरेमा मात्र उनीहरु निलम्बनमा पर्ने छन् । ‘अब सभामुखको हातमा छ, हामी त भोलि संसद बैठकमा जान्छौ,’ सांसद बोहराले भने ।

प्रकाशित : जेष्ठ ३१, २०७८ २०:५४
पूरा पढ्नुहोस्
प्रतिक्रिया
पठाउनुहोस्
x
×