काठमाडौं महानगरको खोप कार्यक्रम स्थगित- समाचार - कान्तिपुर समाचार
कान्तिपुर वेबसाईट
AdvertisementAdvertisement

काठमाडौं महानगरको खोप कार्यक्रम स्थगित

कान्तिपुर संवाददाता

काठमाडौँ — काठमाडौं महानगर पालिकाले सञ्चालन गरेको खोप कार्यक्रम स्थगित हुने भएको छ । गएको मंगलबारदेखि महानगरको ३२ वटै वडामा सञ्चालन हुँदै आएको खोप कार्यक्रम सरकारले खोप उपलब्ध नगराउने भएपछि स्थगित हुन पुगेको हो ।

काठमाडौं महानगर शहरी जनस्वास्थ्य प्रमुख हरि कुँवरले स्वास्थ्य तथा जनसंख्या मन्त्रालयको खोप महाशाखाले काठमाडौं महानगरलाई थप खोप उपलब्ध गराउन नसक्ने भनेपछि जारी कार्यक्रम बाध्य भएर रोक्नु परेको बताए ।

नेपाल सरकारलाई गएको हप्ता मित्रराष्ट्र चीनले १० लाख डोज खोप सहयोग स्वरूप उपलब्ध गराएको थियो । यसरी प्राप्त भएको खोपलाई सरकारले देशैभरी ६० वर्षभन्दा माथि ६५ वर्ष सम्म उमेर समूहका व्यक्तिलाई लगाउने कार्यक्रम बनाएको थियो ।

'सरकारले ६५ हजार डोज खोप उपलब्ध गराउछु भनेपछि खोप लगाउने कार्यक्रम सुरु गरेका थियौं अहिले २८ हजारलाई लगाइसके पछि रोक्नु परेको छ,' जनस्वास्थ्य प्रमुख कुँवरले भने,'अब बाँकीलाई कसरी खोप लगाउने कुनै निश्चित भएको छैन ।'

कार्यक्रम अनुसार काठमाडौं महानगरले गएको मंगलबारदेखि पाँच दिनसम्म उमेर समूह अनुसार दिन तोकी खोप कार्यक्रमको तालिका नै सार्वजनिक गरेको थियो ।

प्रकाशित : जेष्ठ २७, २०७८ २०:५२
प्रतिक्रिया
पठाउनुहोस्

गैंडा मारेको आरोपमा खड्कबहादुर पक्राउ

रमेशकुमार पौडेल

चितवन — गैंडा मारेको आरोपमा चितवन राष्ट्रिय निकुञ्जसहितको टोलीले एकजनालाई पक्राउ गरेको छ । निकुञ्जका सूचना अधिकारी रहेका सहायक संरक्षण अधिकृत लोकेन्द्र अधिकारीका अनुसार नवलपरासी गैंडाकोट नगरपालिका–३ ढोडेनीका ३२ वर्षीय खड्कबहादुर गुरुङ मंगलबार पक्राउ परेका हुन् ।

गैंडा मारेको अभियोगमा पक्राउ परेका खड्कबहादुर । तस्बिर सौजन्य : चितवन निकुञ्ज कार्यालय ।

निकुञ्जको विशेष टोली, नेपाली सेना र इलाका प्रहरी कार्यालयको संयुक्त टोलीले उनलाई नियन्त्रणमा लिएको हो ।

गुरुङले निकुञ्जको पश्चिम क्षेत्र आइल्याणमा गत वर्षको भदौ १६ र १८ गते गैंडा मार्न हतियार उपलब्ध गराएको र आफैंले समेत गैंडालाई गोली हानेको अभियोग छ । उनी विरुद्ध गैंडा मार्ने अपराध सम्बन्धि नवलपुर (नवलपरासी बर्दघाट सुस्ता पूर्व) जिल्ला अदालतमा दुईवटा र चितवन जिल्ला अदालतमा एकवटा मुद्दा दायर भएको अधिकारीले जानकारी दिए ।

गुरुङको साथबाट बारुदका १२ वटा पोका, बन्दुकको बेरिङ १५ वटा, भरुवा बन्दुक बनाउने रडसमेत बरामद भएको उनले बताए । गैंडा मार्ने उद्देश्यले उनी ६ पटक निकुञ्ज छिरेको र कम्तिमा चारवटा गैंडा मार्ने काममा उनी संलग्न भएको निकुञ्जको अभियोगमा उल्लेख छ । उनी लुक्दै हिँडे पनि निकुञ्जले खोजी जारी राखेको थियो । चितवन निकुञ्जले चालू आर्थिक वर्षमा योसमेत गरेर गैंडा मुद्दामा २६ जनालाई पक्राउ गरेको छ ।

गैंडा मार्ने अभियोग लागेका केही व्यक्तिहरु फरार छन् । फरारमध्ये यो वर्ष चारजना गिरफ्तार भएको अधिकारीले बताए ।

गैंडा मारेमा १५ वर्षसम्म कैद, १० लाख रुपैयाँसम्म जरिवाना तथा कैद र जरिवाना दुवै हुने कानुनी व्यवस्था छ ।

प्रकाशित : जेष्ठ २७, २०७८ २०:२१
पूरा पढ्नुहोस्
प्रतिक्रिया
पठाउनुहोस्
×