'राष्ट्रपतिले संवैधानिक हक अवलम्बन गर्न दिनुभएन भनेर आएपछि अदालतले दायाँबायाँ गर्दैन भन्ने विश्वास छ'- समाचार - कान्तिपुर समाचार
कान्तिपुर वेबसाईट
AdvertisementAdvertisement

'राष्ट्रपतिले संवैधानिक हक अवलम्बन गर्न दिनुभएन भनेर आएपछि अदालतले दायाँबायाँ गर्दैन भन्ने विश्वास छ'

'स्वेच्छाचारी कार्यकारी प्रमुख भइसकेपछि यसरी पटकपटक न्यायालय आउनुपरेको छ, यो  दुर्भाग्यपूर्ण हो'
कान्तिपुर संवाददाता

काठमाडौँ — नेपाली कांग्रेसका नेता गगनकुमार थापाले विघटित प्रतिनिधिसभाका सांसदहरू रिट निवेदन लिएर सर्वोच्च अदालतमा विश्वासका साथ आएको बताएका छन् । राष्ट्रपति विद्यादेवी भण्डारीले सांसदहरूलाई संवैधानिक हक अवलम्बन गर्न नदिएकाले सर्वोच्च आएको र सर्वोच्चले प्रतिनिधिसभा पुनःस्थापना गर्ने विश्वास आफूहरूमा रहेको उनले बताए । 

सर्वोच्च अदालतमा प्रतिनिधिसभा विघटनविरुद्ध सोमबार रिट दायर गरेपछि प्रतिक्रिया दिँदै थापाले भने, 'राष्ट्रपतिले हाम्रो संवैधानिक हक अवलम्बन गर्न दिनुभएन भनेर आएपछि अदालतले दायाँबायाँ गर्न सक्दैन विश्वास छ । अदालतप्रति सम्पूर्ण भरोसा छ ।'

सर्वोच्च अदालतले प्रतिनिधिसभा पुनःस्थापना गर्नेमा आफू ढुक्क भएको थापाको भनाइ थियो । उनले भने, 'आफैंले गरेको केही पहिलेको आदेशमा पनि टेकेर सर्वोच्च अदालतेले प्रतिनिधिसभा पुनःस्थापना गर्छ ।'

प्रधानमन्त्री केपी शर्मा ओलीले आफ्नो पद जोगाउनका निम्ती के के गर्छन् भन्ने थप पुष्टि हुँदै गएको पनि थापाको भनाइ थियो । संविधान मिच्नेदेखि केही सांसदलाई मनाउन अध्यादेश ल्याउनेसम्मका क्रियाकलाप त्यसमा पर्ने थापाको भनाइ थियो ।

सर्वोच्च अदालतमा १ सय ४६ जना विघटित प्रतिनिधिसभाका सदस्यले रिट दायर गरेका छन् । प्रतिनिधिसभा विघटन गर्ने राष्ट्रपतिको कदम संविधान र सर्वोच्चको आदेश विपरीत रहेको भन्दै उनीहरूले प्रतिनिधिसभा पुनःस्थापना र प्रधानमन्त्रीमा शेरबहादुर देउवालाई नियुक्तिको माग गरेका छन् ।

यसअघि १ सय ४९ जना सांसदले प्रधानमन्त्रीमा शेरबहादुर देउवालाई नियुक्त गरियोस् भनेर राष्ट्रपति कार्यालयमा हस्ताक्षर बुझाएका थिए । तर राष्ट्रपतिले शुक्रबार राति उक्त दाबी अस्वीकार गर्दै मन्त्रिपरिषद्को सिफारिसमा प्रतिनिधिसभा नै विघटन गरिदिएकी थिइन् ।

थापाले संविधान निर्माणका क्रममा ओलीजस्तो गैरजिम्मेवार व्यक्ति प्रधानमन्त्री होला भन्ने कल्पना नगरिएको बताए । 'यस्तो संविधान विरोधी, गैरजिम्मेवार, अयोग्य र अहंकारी प्रधानमन्त्री प्राप्त गरौंला भन्ने संविधान लेख्ने बेला कल्पना गरेका थिएनौं । संविधानका धारा लेख्दै गर्दाखेरि पटकपटक यसरी न्यायालय आउनुपर्ला भनेर अनुमानै नलगाइएको विषय हो,' उनले भने, 'स्वेच्छाचारी कार्यकारी प्रमुख भइसकेपछि यसरी पटकपटक न्यायालय आउनुपरेको छ, यो दुर्भाग्यपूर्ण हो ।'

प्रकाशित : जेष्ठ १०, २०७८ १६:५१
प्रतिक्रिया
पठाउनुहोस्

उपत्यकामा २४ घण्टामा २ हजार ७८५ जनामा कोरोना पुष्टि

कान्तिपुर संवाददाता

काठमाडौँ — उपत्यकामा २४ घण्टामा २ हजार ७८५ जनामा कोरोना भाइरस पुष्टि भएको छ । स्वास्थ्य तथा जनसंख्या मन्त्रालयका अनुसार सोमबार उपत्यकाका तीन जिल्लामा गरी २ हजार ७८५ जना संक्रमित थपिएका छन् । जसमध्ये काठमाडौंमा १ हजार ८०६, ललितपुरमा ६८१ र भक्तपुरमा २९८ जना रहेका छन् ।

२४ घण्टामा देशभर ७ हजार २२० जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयले दिएको जानकारी अनुसार विभिन्न जिल्लामा गरिएको १९ हजार ८४६ पीसीआर परीक्षणमा ७ हजार २२० जनामा कोरोना पुष्टि भएको हो । हालसम्म नेपालमा कोरोना संक्रमितको संख्या ५ लाख २० हजार ४६१ पुगेको छ ।

यस्तै, ७ हजार १३५ जना कोरोना संक्रमणमुक्त भएका छन् । योसँगै निको हुनेको संख्या ३ लाख ९८ हजार ४८३ पुगेको छ ।

नेपालमा सक्रिय संक्रमितको संख्या १ लाख १५ हजार ४४७ पुगेको छ । क्वारेन्टाइनमा ९२४ जना रहेका छन् ।

स्वास्थ्य तथा जनसंख्या मन्त्रालयले दिएको जानकारी अनुसार देशभर गरी थप १८५ जनाको मृत्यु भएको हो । यो सँगै नेपालमा कोरोनाबाट मृत्यु हुनेको संख्या ६ हजार ५३१ पुगेको छ ।

प्रकाशित : जेष्ठ १०, २०७८ १६:३७
पूरा पढ्नुहोस्
प्रतिक्रिया
पठाउनुहोस्
×