अक्सिजनमा कोटाले झनै संकट - समाचार - कान्तिपुर समाचार
कान्तिपुर वेबसाईट
AdvertisementAdvertisement

अक्सिजनमा कोटाले झनै संकट 

कान्तिपुर संवाददाता

काठमाडौँ — सरकारले कोटा निर्धारण गरेर अक्सिजन दिन थालेपछि अपुग भएको भन्दै अस्पताल व्यवस्थापकले कोरोना संक्रमितका आफन्तलाई आफैं अक्सिजन खोजेर ल्याउन आग्रह गर्न थालेका छन् । आईसीयू र भेन्टिलेटरमा रहेका बिरामीका आफन्तले समेत आफैं अक्सिजन जोहो गर्नुपर्ने अवस्था आएको हो ।

शिक्षण अस्पताल कोहलपुरका लागि लिक्विड बोकेर आएको ट्याकंर । तस्बिर : कान्तिपुर

कोभिड–१९ संकट व्यवस्थापन सञ्चालन केन्द्र (सीसीएमसी) ले सोमबार कुन अस्पताललाई दिनमा कति सिलिन्डर अक्सिजन दिने भनेर कोटा निर्धारण गरेको छ । स्वास्थ्य तथा जनसंख्या मन्त्रालयले उपलब्ध गराएको अस्पतालमा उपचाररत बिरामीको विवरणका आधारमा सीसीएमसीले अक्सिजन सिलिन्डरको कोटा तोकेको हो ।

नेपाल मेडिसिटी अस्पतालका अध्यक्ष उपेन्द्र महतोले कोटा निर्धारण गरिएपछि कसैले पनि अक्सिजन दिन नचाहेको बताए । ‘हामीलाई पहिला अक्सिजन दिने गरेको कम्पनीले तोकिएको ठाउँमा जानुस् भन्यो, तोकिएको कम्पनीले पनि अक्सिजन दिएन,’ उनले भने ।

महतोका अनुसार मेडिसिटीमा १ सय १८ जना संक्रमितको उपचार भइरहेको छ । भेन्टिलेटरमा मात्र ४० जना छन् । अस्पतालमा भर्ना भएकामध्ये ९० प्रतिशतभन्दा बढीलाई अक्सिजन दिनुपर्ने अवस्था छ । ‘दिनमा ३ सय सिलिन्डर जोहो गरेर बिरामीको उपचार गरिरहेका थियौं । सरकारले एक सय सिलिन्डर दिने निर्णय गरेको रहेछ,’ उनले भने, ‘अक्सिजन नभएकैले भोलि दुर्घटना नहोस् भनेर बिरामीका आफन्तलाई वास्तविकता बताएर अक्सिजन खोज्न आग्रह गरेका छौं ।’ आईसीयू र भेन्टिलेटरमा हाइफ्लो अक्सिजन दिइँदै गरेका संक्रमितका आफन्त आफैंले अक्सिजन खोज्नुपर्ने भएपछि निराश छन् ।

९० जना संक्रमितको उपचार भइरहेको धुम्बाराहीको ह्याम्स अस्पतालले दिनमा सय सिलिन्डरको मात्र कोटा तोकिएपछि बिरामी भर्ना गर्न छाडेको छ । ‘भएकै बिरामीलाई अक्सिजन पुर्‍याउन मुस्किल भएपछि हामीले भर्ना लिनै छाडिसक्यौं,’ अस्पतालका कार्यकारी निर्देशक डा. ज्योतिन्द्र शर्माले भने, ‘जति कोटा तोकिएको छ, त्यतिमा सुविधा दिन गाह्रो भयो । यो समस्या सीसीएमसीमा राखिसकेका छौं । पुनर्विचार हुनेमा आशावादी छौं ।’ उनले ह्याम्समा दिनमा २ सय ५० सिलिन्डर खपत भइरहेको जानकारी दिए । अस्पतालमा अक्सिजन प्लान्ट भए पनि पुरानो आवश्यकताअनुसार मात्रै भएकाले अहिले बढी अक्सिजन चाहिएको डा. शर्माले बताए ।

कोटा निर्धारणले सरकारी अस्पतालमा पनि समस्या सुरु भएको छ । पाटन अस्पतालमा दिनमा ३ सय सिलिन्डरभन्दा बढी अक्सिजन खपत हुन्छ तर सरकारले दुई सय सिलिन्डर मात्रै तोकिदिएको छ । ‘सामान्य अवस्थामै डेढ सय सिलिन्डरभन्दा बढी खपत हुन्थ्यो । कोरोनाका बिरामी बढेपछि दोब्बर चाहिन थालेको छ । सरकारले थोरै कोटा तोकिदिएपछि बिरामी भर्ना लिनै गाह्रो भएको छ,’ पाटनका एक चिकित्सकले भने ।

सीसीएमसीले सोमबार कान्तिपुर, सगरमाथा, नवज्योति, सीता, अक्सिटेक, सोपान, शंकर, हिमाल, हाम्रो ग्यास कम्पनीलाई पत्र लेखी कुन अस्पताललाई कति अक्सिजन दिने भनेर निर्देशन दिएको हो । सीसीएमसीका सहसचिव नूरहरि खतिवडाले हस्ताक्षर गरेको पत्रमा अस्पतालहरूलाई तोकिएबमोजिम दैनिक न्यूनतम अक्सिजन वितरण गर्ने व्यवस्था मिलाउन अनुरोध गरिएको छ ।

अक्सिजन ग्यास उत्पादक संघलाई बोधार्थ दिइएको पत्रमा कुन अस्पताललाई कति अक्सिजन दिने भनेर तोकिएको छ । सीसीएमसीले काठमाडौं मेडिकल कलेज, सहिद शुक्रराज ट्रपिकल तथा सरुवा रोग अस्पताल, त्रिवि शिक्षण अस्पताल, वीरेन्द्र सैनिक अस्पताल, एपीएफ अस्पताललाई दिनमा १ सय ५० सिलिन्डरका दरले अक्सिजन उपलब्ध गराउन निर्देशन दिएको छ । वीर अस्पताललाई ३ सय, नर्भिक, ह्याम्स, नेपाल प्रहरी अस्पताल, नेपाल मेडिकल कलेजलाई एक सय सिलिन्डरका दरले अक्सिजन उपलब्ध गराउन भनिएको छ ।

पाटनलाई २ सय, ग्रान्डी, प्रसूति गृहलाई ७५, धुलिखेल अस्पताललाई ९० सिलिन्डर कोटा तोकिएको छ । सीसीएमसीले काभ्रे र काठमाडौं उपत्यकाका ७७ वटा अस्पताललाई अक्सिजन ग्यासको कोटा निर्धारण गरेको हो ।

प्रकाशित : वैशाख २८, २०७८ ०६:४६
प्रतिक्रिया
पठाउनुहोस्

भरतपुरस्थित प्राइम कमर्सियल बैंकमा आगलागी

रमेशकुमार पौडेल

काठमाडौँ — चितवन– प्राइम कमर्सियल बैंक लिमिटेडको भरतपुर, चौबिसकोठीमा रहेको शाखा कार्यालयमा आगलागी भएको छ । बिजुली सर्ट भएका कारण सोमबार साँझपख आगलागी भएको चितवन प्रहरीले जनाएको छ ।

भरतपुर महानगरपालिकाको दमकल, सेना र प्रहरीको टोलीले आगो साँझ सवा ६ बजे पूर्ण रूपमा नियन्त्रणमा लिएको थियो ।

चितवन जिल्ला प्रहरी कार्यालयका प्रवक्ता डीएसपी सरोज गिरीका अनुसार आगलागी हुँदा १० थान कम्प्युटर, प्रिन्टर १० थान, दुई थान फोटोकपी मेसिन, दुईवटा एसी, टेलिफोन सेटहरू, पैसा गन्ने मेसिन, बैंक स्टेटमेन्ट प्रिन्ट गर्ने मेसिन, टोकन मेसिन, स्क्यानर, पङ्खा, हाजिर गर्ने मेसिन जलेका छन् । फर्निचर र अन्य उपकरण पनि जलेका छन् । ४० लाख रुपैयाँ बराबरको क्षतिको अनुमान गरिएको डीएसपी गिरीले बताए ।

प्रकाशित : वैशाख २८, २०७८ ०६:४५
पूरा पढ्नुहोस्
प्रतिक्रिया
पठाउनुहोस्
×