उपत्यकामा २४ घण्टामा थपिए २ हजार ४७ कोरोना संक्रमित
काठमाडौँ — काठमाडौं उपत्यकामा २४ घण्टामा २ हजार ४७ कोरोना संक्रमित थपिएका छन् । स्वास्थ्य तथा जनसंख्या मन्त्रालयका अनुसार पछिल्लो २४ घण्टामा १३ हजार ८७९ पीसीआर परीक्षणबाट २ हजार ४७ जनामा कोरोना संक्रमण पुष्टि भएको हो । काठमाडौंमा १ हजार ४६४, भक्तपुरमा २३२ र ललितपुरमा ३५१ जनामा संक्रमण पुष्टि भएको मन्त्रालयले जनाएको छ ।
२४ घण्टामा १३ हजार ८७९ पीसीआर परीक्षणबाट देशभर भने ४ हजार ७७४ जनामा संक्रमण पुष्टि भएको छ । त्यसैगरी ९५५ एन्टिजेन परीक्षणमा १२३ जनामा पोजिटिभ देखिएको छ । पीसीआर र एन्टिजेन गरी संक्रमितको संख्या ४ हजार ८९७ पुगेको छ ।
२४ घण्टामा ७७३ जना डिस्चार्ज भएका छन् । नेपालमा हालसम्म सक्रिय संक्रमितको संख्या ३० हजार २०९ रहेको छ ।
प्रकाशित : वैशाख १५, २०७८ १७:१९प्रतिक्रिया
