ओलीका निर्णयलाई वैधानिकता नदिन माग गर्दै फेरि आयोग पुग्यो नेपाल समूह [पत्रसहित]- समाचार - कान्तिपुर समाचार
कान्तिपुर वेबसाईट
AdvertisementAdvertisement

ओलीका निर्णयलाई वैधानिकता नदिन माग गर्दै फेरि आयोग पुग्यो नेपाल समूह [पत्रसहित]

कान्तिपुर संवाददाता

काठमाडौँ — नेकपा (एमाले)को माधवकुमार नेपाल समूह पार्टी अध्यक्ष केपी शर्मा ओलीले गरेका निर्णयलाई वैधानिकता नदिन माग गर्दै निर्वाचन आयोग पुगेको छ । 

फागुन २३ को सर्वोच्च अदालतको फैसलापछि ओलीले एकतर्फी गरेका निर्णयलाई वैधानिकता नदिन माग गर्दै नेताद्वय बेदुराम भुसाल र राजेन्द्र पाण्डे आइतबार आयोग पुगेका हुन् ।

नेता भुसालका अनुसार सर्वोच्च अदालतको फैसलापछि ओलीले एकतर्फी रुपमा एमालेका नाममा गरेका निर्णयलाई वैधानिकता नदिन माग गरिएको छ ।

नेपाल समूहले आधिकारिक रूपमा दल सञ्चालन गर्ने अख्तियारी आफूहरुसँग भएको हुँदा दलको पदाधिकारी, केन्द्रीय कमिटी र केन्द्रीय कमिटीको निर्णयको आधिकारिकता सम्बन्धी विषयमा राजनीतिक दल सम्बन्धी ऐन, २०७३ को दफा ४३ (ख), (ग) र दफा ४४ (१) बमोजिम विवादको निरुपण गर्न माग गरेको छ ।

‘नेकपा (एमाले) दलको पदाधिकारी, केन्द्रीय कमिटी र केन्द्रीय कमिटीको निर्णय आधिकारिकता सम्बन्धी गम्भीर विवाद सिर्जना भएकोले उक्त निर्णय काम कारवाही वदर गरी पार्टीको २०३ जना पदाधिकारी सहित केन्द्रीय सदस्यमध्ये हामी दावी प्रस्तुतकर्ता दलका जिम्मेवार वरिष्ठ नेता, पार्टी नेता, उपाध्यक्ष, उपमहासचिव, सचिव लगायत दलका बहुमत पदाधिकारीसहितका केन्द्रीय सदस्यहरूले आधिकारिक रूपमा दल सञ्चालन गर्ने अख्तियारी भएको हुँदा दलको पदाधिकारी, केन्द्रीय कमिटी र केन्द्रीय कमिटीको निर्णयको आधिकारीकता सम्बन्धी विषयमा राजनीतिक दल सम्बन्धी ऐन, २०७३ को दफा ४३ (ख), (ग) र दफा ४४ (१) समेत बमोजिम विवादको निरुपण गरी पाउनाका लागि हस्ताक्षर गरी प्रस्तुत दावी पेश गरेका छौं,’ आयोगमा बुझाएको पत्रमा छ ।

नेपाल समूहले माग पत्रसहित पदाधिकारी, केन्द्रीय सदस्य र वैकल्पिक केन्द्रीय सदस्य गरी ८९ जनाको हस्ताक्षर समेत आयोगलाई बुझाएको नेता भुसालले जानकारी दिए ।

यसअघि ११ जना स्थायी कमिटी सदस्यहरुको हस्ताक्षरसहित अध्यक्ष ओलीले गरेका निर्णयलाई वैधानिकता नदिन भन्दै चैत १ गते नेताहरु आयोग पुगेका थिए ।

प्रकाशित : वैशाख ५, २०७८ २०:२६
प्रतिक्रिया
पठाउनुहोस्

बोक्सी भन्दै यातना दिएको आरोपमा युवक पक्राउ

कान्तिपुर संवाददाता

सिरहा — काकीलाई बोक्सी आरोपमा कुटपिट गरी जबर्जस्ती मलमूत्र खुवाएको आरोपमा प्रहरीले आइतबार सिरहा औरही गाउँपालिका–५ का २९ वर्षीय घुरन साहलाई पक्राउ गरेको छ ।

जिल्ला प्रहरी कार्यालय सिरहाका अनुसार औरही–५ की ५० वर्षीया हिरादेवी साहले आफूलाई शनिबार बिहान बोक्सीको आरोपमा जेठाजुका छोरा घुरन, बुहारीलगायतले कुटपिट गरी मलमूत्र खुवाएको जाहेरी दिएपछि घुरनलाई पक्राउ गरिएको हो ।

गाईलाई टुनामुना गरेर मारेको भन्दै आफूमाथि भतिज घुरनले हात समातेर कुटपिट गर्दै भुइँमा लडाएपछि बुहारीहरूले जबर्जस्ती मानव मलमूत्र खुवाएका थिए । सिरहाका प्रहरी प्रमुख एसपी सुदीप राजभण्डारीले पीडित हिरादेवी साहको जाहेरीका आधारमा पक्राउ परेका घुरनलाई बोक्सीको आरोप (कसुर र सजाय) ऐन, २०७२ अनुसार कारबाही प्रक्रिया अगाडि बढाएको बताए । ‘घटनामा अन्यको पनि संलग्नता देखिएको छ,’ उनले भने, ‘अन्यको खोजी भइरहेको छ ।’

पीडित हिरादेवीले गाईलाई टुना गरेर मारेको आरोपमा जेठाजुका छोरा र बुहारीले कुटपिट गर्दै मानव मलमूत्र खुवाएको बताइन्। हिरादेवीका पति रामचलितर साह रोजगारका क्रममा भारतको चण्डीगढमा छन् । उनी छोराछोरीसहित घरमा बस्दै आएकी छन् । दुई छोरी र एक छोरामध्ये जेठी छोरी मात्र घरमा भएको मौका पारी आफूलाई अमानवीय व्यवहार गरिएको भन्दै उनले दोषीलाई कारबाही माग गर्दै आइतबार प्रहरीमा जाहेरी दिएकी थिइन् ।

प्रकाशित : वैशाख ५, २०७८ १९:५०
पूरा पढ्नुहोस्
प्रतिक्रिया
पठाउनुहोस्
×