झलनाथ खनाललाई भेट्न डल्लु पुगिन् राष्ट्रपति भण्डारी- समाचार - कान्तिपुर समाचार

झलनाथ खनाललाई भेट्न डल्लु पुगिन् राष्ट्रपति भण्डारी

कान्तिपुर संवाददाता

काठमाडौँ — राष्ट्रपति विद्यादेवी भण्डारी पूर्वप्रधानमन्त्री तथा एमाले वरिष्ठ नेता झलनाथ खनाललाई भेट्न डल्लु पुगेकी छन् ।

उनीहरुबीच डल्लुस्थिन खनाल निवासमा भेटवार्ता भइरहेको छ । शनिबार करिब ४ बजे राष्ट्रपति भण्डारी खनाल निवास पुगेकी हुन् ।

खनालका स्वकीय सचिव कृष्ण भट्टराईले राष्ट्रपति र नेता खनालबीच करिब ४ बजेदेखि भेटवार्ता भइरहेको जानकारी दिए । 'भेट नभएको लामो समय भइसकेको थियो त्यसैले राष्ट्रपति भेट्न आउनुभएको हो । समसामयिक विषयमा छलफल भइरहेको छ,' भट्टराईले भने ।

राष्ट्रपतिले केही दिन पहिले बोलाएको सर्वदलीय बैठकमा पूर्वप्रधानमन्त्री खनाल अनुपस्थित भएका थिए । प्रधानमन्त्री तथा एमाले अध्यक्ष केपी शर्मा ओलीसँग खनाल र नेता माधवकुमार नेपाल असन्तुष्ट रहेका छन् ।

प्रकाशित : चैत्र २१, २०७७ १६:५८
प्रतिक्रिया
पठाउनुहोस्

वडा कार्यालयमा चोरी

अनिश तिवारी

सिन्धुपाल्चोक — त्रिपुरासुन्दरी गाउँपालिका-६ टेकानपुरस्थित वडा कार्यालयमा चोरी भएको छ । वडा कार्यालयसहित ३ घरमा शुक्रबार राति अज्ञात समूहले तोडफोड गर्दै नगद,गहना तथा अन्य सामग्रीहरु चोरी गरेको हो ।

मध्यरातमा अज्ञात समूहले वडा कार्यालयको कागजात च्यात्दै कार्यालयमा राखिएको नगद १५ हजार, तीन घरमा सुन चोरी गरेको प्रहरीले जनाएको छ ।

इलाका प्रहरी निरीक्षक देवेन्द्र शाहकाअनुसार टेकानपुर वडा ६ कार्यालयमा चोरको समूहले वडाध्यक्ष रामचन्द्र बुढाथोकीले हस्ताक्षर गरेका सिफारिसजस्ता अन्य कागजात च्यातेका छन् । ‘वडा कार्यालयमा राखिएको कागजात च्यात्नु , नगद र मान्छे नबस्ने तीन घरमा सुन चोरेको देखिन्छ, सबै तंथ्याक संकलन गर्दैछौं,’ उनले भने ।

प्रहरीले मादक पदार्थ सेवन गरेका केही स्थानीय मानिसले चोरी गरेको हुन सक्ने बताएको छ । गाउँको बारेमा सबै थाहा भएको मानिसले यस्तो काम गरेको हुनसक्ने वडाध्यक्ष रामचन्द्र बुढाथोकीले बताए ।

प्रकाशित : चैत्र २१, २०७७ १६:३३
पूरा पढ्नुहोस्
प्रतिक्रिया
पठाउनुहोस्
×