बागलुङ घटनामा संलग्‍न भएको आरोपमा ६ जना पक्राउ- समाचार - कान्तिपुर समाचार
कान्तिपुर वेबसाईट
AdvertisementAdvertisement

बागलुङ घटनामा संलग्‍न भएको आरोपमा ६ जना पक्राउ

प्रकाश बराल

बागलुङ — बागलुङमा होली खेल्ने क्रममा भएको झडपपछि दुई जना युवकको ज्यान गएको घटनामा संलग्न भएको आरोपमा प्रहरीले बुधबार दिउँसो ६ जनालाई पक्राउ गरेको छ । 

घटनाको चार दिनपछि गुल्मीबाट २ जना र ४ जना बागलुङबाट पक्राउ परेको प्रहरी उपरीक्षक कृष्णबहादुर पल्लीमगरले बताए । घटनामा निसीखोला गाउँपालिका ७ का ३६ वर्षीय प्रकाश कुँवर र ३४ वर्षीय दीपक परियारको मृत्यु भएको थियो । झडपमा अन्य ६ जना घाइते भएका छन् । घटनास्थलदेखि ४ सय मिटर तल मृतकको शव भेटिएको थियो ।

गत आइतबार बागलुङको बडिगाड र निसीखोला गाउँपालिकाको सिमानामा पर्ने बलधुरेमा लागेको मेलामा झडप भएको थियो । प्रहरी उपरीक्षक कृष्णबहादुर पल्लीमगरको नेतृत्वमा ११ सदस्य र पोखराबाट सीआईबीको टोली समेत अनुसन्धानमा खटिएको थियो । उक्त टोलीले संलग्नको पहिचान गरिरहेको समेत उनले बताए । ‘अनुसन्धान सकिएको छैन, केही मानिस पक्राउ परेका छन्, त्यसैले नाम सार्वजनिक गर्न सकिएन,’ पल्लीमगरले भने, ‘अनुसन्धान सकिएपछि मात्रै दोषी सार्वजनिक गर्छौं ।’

रंग लगाउने विषयमै दुई पक्षबीच झडप भएको हुन सक्ने प्रारम्भिक अनुसन्धानमा देखिएको प्रहरीको भनाइ छ । ‘रंग लगाएकै विषयमा मनमुटाव भएको देखिन्छ, त्यसले झगडाको रुप लियो,’ प्रहरी नायब उपरीक्षक इकवाल हवारीले भने, ‘सामूहिक झगडा भएकोले दोषी पत्ता लगाउन पनि ढिला भएको हो ।’

घटनामा घाइते भएका मिठू परियारले रमाइलो गरिरहेकै स्थानमा एकाएक आक्रमण भएको बताए । घाइतेमध्ये ५ जनाको स्थानीय स्वास्थ्य संस्थामा उपचारपछि घर फर्केका छन् । अर्का घाइते ज्ञानु परियारको टाउकोमा गहिरो चोट लागेको छ । प्राथमिक स्वास्थ्य केन्द्र बुर्तिवाङमा उपचारपछि उनी पाल्पा थप उपचारका लागि गएका छन् ।

प्रकाशित : चैत्र १८, २०७७ १४:२८
प्रतिक्रिया
पठाउनुहोस्

एमाले सचेतकको प्रश्न : जनताका बीचमा जाने कुरा प्रतिगमन हुन्छ सभामुख महोदय ?

कान्तिपुर संवाददाता

काठमाडौँ — सत्तारुढ नेकपा (एमाले)की सचेतक शान्ता चौधरीले जनतामा जाने कुरा कसरी प्रतिगमन र संविधान विपरीत हुन्छ भनेर प्रतिनिधिसभा बैठकमा प्रश्न गरेकी छन् ।

असंवैधानिक रूपमा पुस ५ गते विघटन भएर सर्वोच्च अदालतको फागुन ११ गतेको फैसलाबाट पुन:स्थापित भएपछि पनि प्रधानमन्त्री केपी शर्मा ओलीले ताजा जनादेशमा जानु सही भएको भनिरहेका बेला एमालेकी सचेतकले पनि सोही प्रश्न संसद्‍मा उठाएकी हुन् ।

प्रतिनिधिसभाको बुधबारको बैठकमा विशेष समयमा चौधरीले भनिन्, 'जनताको बीचमा जाने कुरा असंवैधानिक हुन्छ र सभामुख महोदय ? जनतामा जाने कुरा प्रतिगमन हुन्छ र महोदय ?'

प्रधानमन्त्रीले असंवैधानिक कदम नचालेको दाबी गरेकी चौधरीले चालेको भए पनि त्यसरी असंवैधानिक कदम चाल्न बाध्य पार्ने को थियो भन्ने प्रश्न उठाएकी थिइन् । 'असंवैधानिक कदम चाल्न बाध्य बनाउनेहरूलाई जनताले, देशले देखिरहेको छ,' उनको भनाइ थियो ।

संसद्‍मा सभ्य भाषा बोल्न र सरकारका राम्रा कामको प्रसंसा गर्न पनि सचेतक चौधरीले आग्रह गरेकी थिइन् । उनले भनिन्, 'सरकारले गरेका राम्रा कामका पक्षमा पनि बोल्नुपर्‍यो नि ! विरोध मात्रै गर्ने कि सरकारले गरेका राम्रा कामका पक्षमा पनि गर्ने ?'

सरकारले गरेका राम्रा कामको पनि विरोध गर्ने कि ? भनेर चौधरीले प्रश्न गरिन्, 'मेलम्ची पानी तीन दशकपछि काठमाडौंमा प्रवेश गरेको छ, यसको पनि विरोध गर्ने कि ? मुलुक सुरुङ युगमा प्रवेश गरेको छ, यसको पनि विरोध गर्ने कि ? भूकम्पमा ढलेका घर ठडिएका छन् यसको पनि विरोध गर्ने कि ?'

मुलुकमा वर्तमान सरकारको पालामा धेरै पुल बनेको, पानीजहाज चलेको र सबै पालिकाहरूमा अस्पताल पुगेको बताएकी चौधरीले विद्रोही शक्तिलाई वार्ताको टेबुलमार्फत शान्तिको बाटोमा ल्याएको कामको सत्तापक्ष र प्रतिपक्षले प्रसंशा गर्नुपर्ने बताइन् । 'सरकारलाई यतिबेला खुलेर धन्यवाद दिनुपर्ने बेला विरोध गरिरहेका छौं । यो कस्तो संस्कार हो, कस्तो बुझाइ हो ?,' उनले भनिन् ।

प्रकाशित : चैत्र १८, २०७७ १४:२०
पूरा पढ्नुहोस्
प्रतिक्रिया
पठाउनुहोस्
×