नैतिकताको पाठ पढाएर मन्त्रीलाई राजीनामा दिन लगाउने प्रधानमन्त्री जितिया शासक भएर हिँडेका छन् : भुसाल

‘राजनीतिमा नैतिकता हुन्छ, मूल्य हुन्छ । हामीलाई स्मरण छ । यही केपी ओली नेतृत्वकै सरकारका कानुनमन्त्रीले सार्वजनिक कार्यक्रममा बोल्ने क्रममा प्रशंगवस गलत शब्द प्रयोग गर्दा राजीनामा दिनु भएको थियो । राजीनामा दिन लगाइएको थियो, नैतिकताको पाठ पढाएर । अर्का एउटा मन्त्रीलाई सुरक्षा प्रेस सम्बन्धी अडियो सार्वजनिक भएपछि राजनीनामा दिएको, दिन लगाइएको थियो,’ शुक्रबार प्रतिनिधिसभा बैठकमा बोल्दै नेता भुसालले भनिन्, ‘मैले सोचेको थिएँ फागुन ११ को सर्वोच्चको फैसलापछि त्यो राजनीनिक नैतिकताको पालना गरिने छ भनेर ।अहिले पनि बडो जिताहा शासकजस्तो गरेर हिँड्ने कुराले आज आमनागरिकमा के पर्छ होला ?’

अनैतीक कामको जिम्मेवारी नलिने र आत्मसमीक्षा नगर्ने व्यक्तिहरुका कारणले आज राजनीति बदनाम भएको भुसालले बताइन् । ‘सबै नीतिको माउ नीति राजनीति हो । राजनीतिज्ञले कस्तो आदर्श र चरित्र देखाउँछन् ? त्यसको प्रभाव आम जनतामा पर्छ । त्यस्तै अनैतिक कामको जिम्मेवारी नलिने, आत्मसमीक्षा नगर्ने व्यक्तिहरुका कारणले आज राजनीति बदनाम छ । मान्छेहरुले राजनीति भनेपछि फट्याइँ, ठग्ने नै हो भन्ने ठानेका छन्,’ उनले भनिन् ।