सरकार पुनर्गठन गरी एक वर्षभित्र निर्वाचन गर्नुपर्छ : महामन्त्री खड्का- समाचार - कान्तिपुर समाचार
कान्तिपुर वेबसाईट
AdvertisementAdvertisement

सरकार पुनर्गठन गरी एक वर्षभित्र निर्वाचन गर्नुपर्छ : महामन्त्री खड्का

कान्तिपुर संवाददाता

सुर्खेत — नेपाली कांग्रेसका महामन्त्री पूर्णबहादुर खड्काले नयाँ सरकार गठनको लागि ३ वटा विकल्प प्रस्तुत गर्दै एक वर्षभित्र देश नयाँ निर्वाचनमा जानुपर्ने बताएका छन् । त्रिशंकु संसद्‌को अवस्थालाई धरै लम्ब्याउन नहुने उनको भनाइ छ ।

मंगलबार सुर्खेतको गुर्भाकोटमा आयोजित कार्यक्रममा महामन्त्री खड्काले नेपाली कांग्रेसको नेतृत्वमा सबै दल सहभागी वृहत संयुक्त सरकार, कांग्रेसकै नेतृत्वमा नेकपा (माओवादी केन्द्र) र संघीय समाजवादी पार्टी सम्मिलित संयुक्त सरकार वा नेकपा एमाले र संघीय समाजवादी पार्टीको संयुक्त सरकार बन्ने सम्भावना रहेको बताए ।

‘सम्भावनाहरु अनेक भए पनि अहिलेको परिस्थितिलाई सम्हाल्न र देशलाई सही ‘ट्रयाक’ मा ल्याउनको लागि कांग्रेसको नेतृत्वमा सरकार बन्नुपर्छ,’ उनले भने, ‘त्यसरी बन्ने सरकारले एक वर्षभित्र नयाँ निर्वाचन गरेर जनतामा छाएको निराशालाई विश्वासमा बदल्नुपर्छ ।’ नेपाली कांग्रेसको लामो अनुभव र परिपक्व इतिहासले त्यो जिम्मेवारी कांग्रेसको काँधमा आइपुगेको उनले बताए ।

महामन्त्री खड्काले कम्युनिस्टहरुको दुईतिहाइको उन्मादले देशमा अस्थिरता निम्तिएको पनि बताए । ‘तत्कालीन नेकपाका जिम्मेवारी नेताहरुले कांग्रेसलाई बत्ति बालेर खोज्नुपर्नेदेखि हाम्रो पार्टी सभापति (शेरबहादुर देउवा) लाई कांग्रेसको अन्तिम प्रधानमन्त्री पनि भन्न भ्याए,’ उनले भने, ‘तर कांग्रेस त्यसबाट उत्तेजित र विचलित भएन, बरु संयमित र अनुशासित भएर संविधानले दिएको जिम्मेवारी निर्वाह गर्‍यो ।’ यही जिम्मेवारीपूर्ण भूमिकाले कांग्रेस राष्ट्रिय राजनीतिको मियो बनेको उनले बताए ।

प्रकाशित : चैत्र ३, २०७७ १८:१४
प्रतिक्रिया
पठाउनुहोस्

थलिए ‘सुइना कर्णालीका’का कलाकार

दुई वर्षदेखि रोगले थलिएका लेखक तथा कलाकार मल्लको उपचारमा खर्च अभाव
राजबहादुर शाही

मुगु — सुमन मल्लले ‘सुइना कर्णालीका’ नाटकमार्फत कर्णालीको स्वर्णिम सपना संसारलाई सुनाए । ‘कर्णाली दख्खिन बग्दो छ’ झन् बेजोड नाटकको रुपमा चर्चित बन्यो, जसले कर्णालीको कथाव्यथा बाहिर ल्यायो ।

दुई वर्षदेखि थला परेका नाटककार सुमन मल्ल । तस्बिर : राजबहादुर शाही/कान्तिपुर

दलित समुदायको पीडा प्रस्तुत गरिएको ‘सुइना कर्णालीका’मा हुड्के बनेर उनले दर्शकको वाहवाही पाए ।उनी कर्णालीलाई थप नाटक दिन चाहन्थे । तर उनको त्यो सपना अहिले ओछ्यानमा थला परेको छ । कर्णालीको कला क्षेत्रमा अमूल्य सम्पदा बनेका यिनै दुई नाटकका लेखक तथा कलाकार मल्ल २ वर्षदेखि थला परेका छन् ।

मधुमेह र उच्च रक्तचापबाट थलिएका ४१ वर्षीय उनी उपचार खर्च नहुँदा आँगनबाट बाहिर निस्किन सकेका छैनन् । रोगका कारण उनको शरीर गल्दै गएको छ । ‘सुगर र ब्लड प्रेसरले घरबाट बाहिर निस्कन सक्दिनँ,’ उनले भने, ‘रोगकै कारण पटकपटक बेहोस भएको छु ।’ पुसदेखि हाडजोर्नी दुख्ने समस्यासमेत बल्झिएको उनले बताए ।

उपचारका लागि जुम्लास्थित कर्णाली स्वास्थ्य विज्ञान प्रतिष्ठानका साथै नेपालगन्ज र काठमाडौंसम्म पुगे पनि स्वास्थ्यमा सुधार नआएको मल्लकी श्रीमति गंगादेवीले बताइन् । निरन्तर औषधि सेवन गरे पनि सञ्चो नहुँदा घरेलु उपचार पनि जारी राखेको उनको भनाइ छ । ‘घरको आर्थिक अवस्था कमजोर हुँदा उपचारमा समस्या भयो,’ उनले भनिन्, ‘रकम नहुँदा महँगो अस्पतालमा लगेर उपचार गराउन सकिएको छैन ।’ आमासहित ६ जनाको परिवारको पालनपोषण गर्ने मल्ल आफै बिरामी परेपछि जीविकोपार्जनमा समस्या भएको उनले बताइन् । आर्थिक समस्याकै कारण दुई छोरी र एक छोराको पठनपाठनमा पनि कठिनाइ देखिएको छ ।

नेपालगन्जमा उपचार गर्न जाँदा छायानाथरारा नगरपालिकाले ५० हजार सहयोग गरेको थियो भने जुम्लामा उपचार गर्दा स्थानीय पत्रकारले खर्च जुटाइदिएका थिए । दुई महिनाअघि हङकङ ठकुरी सहयोग समाजमार्फत धिरजंग शाहीले उनको उपचारका लागि एक लाख रुपैयाँ संकलन गरेका थिए । ‘आफन्त र साथीभाइले सहयोग गरे औषधि किन्छु,’ मल्लले भने, ‘कहिलेकाही औषधि किन्न नसक्दा घरेलु उपचारको भर पर्नुपरेको छ ।’

नेपाल पत्रकार महासंघ मुगुका पूर्वअध्यक्षसमेत रहेका उनी नागरिक दैनिक, रारा रैबार अनलाइन र रेडियो मुगुमा समेत आबद्ध थिए । अहिले रोगकै कारण पत्रकारिता पेशाबाट निस्क्रिय छन् । ‘कलम नसमातेको पनि दुई वर्ष भयो,’ उनले भने, ‘दिमागले काम गर्नै छोडेपछि नाटक लेख्न पनि छोडें ।’ नाटक र समाचारमार्फत कर्णालीको पीडा उजागर गर्ने मल्लको जीवन रक्षाका लागि सहयोग गर्न महासंघका संस्थापक अध्यक्ष विनोद मल्लले आग्रह गरे ।

प्रकाशित : चैत्र ३, २०७७ १८:०६
पूरा पढ्नुहोस्
प्रतिक्रिया
पठाउनुहोस्
×