नक्कली परीक्षार्थी बनी प्रहरी जवानको लिखित परीक्षा दिने २२ जना पक्राउ- समाचार - कान्तिपुर समाचार

नक्कली परीक्षार्थी बनी प्रहरी जवानको लिखित परीक्षा दिने २२ जना पक्राउ

रासस

काठमाडौँ — लोकसेवा आयोग दिपायल केन्द्रबाट महेन्द्रनगर क्षेत्रका विभिन्न परीक्षा केन्द्रमा सञ्चालन भएको प्रहरी जवान (खुल्ला तथा समावेशी) जनपदको लिखित परीक्षामा नक्कली परीक्षार्थी बनी परीक्षा दिने २२ जनालाई प्रहरीले शनिबार पक्राउ गरेको छ । 

जिल्ला प्रहरी कार्यालय कञ्चनपुरका प्रहरी नायब उपरीक्षक अमरबहादुर थापा क्षेत्रीका अनुसार नागरिकताको प्रमाणपत्र र प्रवेश पत्रमा फोटो परिवर्तन तथा किर्ते हस्ताक्षर गरी नक्कली परीक्षार्थी बनेर परीक्षा दिनेहरुलाई पक्राउ गरी अनुसन्धान भइरहेको छ ।

पक्राउ पर्नेमा कैलाली गाउँपालिका–३ का १८ वर्षीय अविनाश चौधरी, २० वर्षीय लेखराज चौधरी, २० वर्षीय विशाल चौधरी, दार्चुलाको मार्मा गाउँपालिका–३ का गोकुल धामी, २४ वर्षीय दिनेश महरा, बझाङ मष्ठा गाउँपालिका–४ का १९ वर्षीय अजय कठायत, १८ वर्षीय बलराम कठायत, २० वर्षीय कमल कठायत, १८ वर्षीय प्रविन कठायत र बझाङ तल्कोट गाउँपालिका–३ का लोकराज जोशी रहेका छन् ।

यसैगरी कैलालीको धनगढी उपमहानगरपालिका–४ का १८ वर्षीय विपिन चौधरी, सोही उपनगरपालिका–५ का लक्ष्मण चन्द, १८ वर्षीय सागरबहादुर देउपा, बझाङको तल्कोट गाउँपालिकाका २२ वर्षीय दिनेश खाती, १९ वर्षीय नवीन जोशी र कैलालीको टीकापुर नगरपालिका–२ का १८ वर्षीय सागर बोहरा पक्राउ परेका छन् । यस्तै, बझाङ थलारा गाउँपालिकाका २० वर्षीय शिवराज नेपाली, दुर्गाथली गाउँपालिका–५ का २० वर्षीय कृष्ण कठायत, जनवासा गाउँपालिकाका १९ वर्षीय विक्रम बोहरा, वुनपा–७ का २२ वर्षीय विमल बोहरा र जनपका २० वर्षीय जीवन बोहरालाई प्रहरीले पक्राउ गरेको छ ।

प्रकाशित : फाल्गुन २३, २०७७ १०:०८
प्रतिक्रिया
पठाउनुहोस्

नरबहादुर बम्जन स्मृति फुटबलको उपाधि नमोबुद्धलाई

राजकुमार कार्की

सिन्धुली — सिन्धुलीमाडीमा भएको नरबहादुर बम्जन स्मृति कप खुला फुटबल प्रतियोगिताको उपाधि नमोबुद्ध युवा क्लब मरिणले जितेको छ । शनिबार भएको फाइनलमा टोलीले अमरज्योति युवा क्लब गोलन्जोरलाई पेनाल्टी सुटआउटमा ५–४ गोल अन्तरले पराजित गरेको हो । 

उपाधिसँगै नमोबुद्धले नगद २ लाख १० हजार हात पारेको छ । निर्धारित समयमा गोल हुन नसकेपछि खेल टाइब्रेकरमा पुगेको थियो ।

नमोबुद्ध युवा क्लबका अनिल थापामगरले उत्कृष्ट गोलरक्षक बन्दै ५ हजार नगद पुरस्कार पाए । प्रतियोगितामा ५ गोल गरेका भिमान क्लबका रितिकले सर्वाधिक गोलकर्ता खेलाडीको पुरस्कार पाए । उत्कृष्ट डिफेन्डरमा नमोबुद्ध क्लबका गौरव श्रेष्ठ ठहरिए । उपविजेता टिमले एक लाख नगद पुरस्कार पाएको छ ।

प्रकाशित : फाल्गुन २३, २०७७ ०९:५०
पूरा पढ्नुहोस्
प्रतिक्रिया
पठाउनुहोस्
×