पृतनापति समन्वयात्मक बैठक सम्पन्न

बिहीबारबाट सुरु भएको उक्त बैठकमा मुलुकका विभिन्न क्षेत्रको आन्तरिक तथा बाह्य सुरक्षा, सेनाको भित्रको आन्तरिक विषय र अगामी दिनमा सेनाले लिनु पर्ने बाटोलगायतका विषयमा छलफल भएको थियो ।

छलफलमा सातै प्रदेशमा रहेका सात पृतनाका पृतनापतिसहित उपत्यका पृतनाका पृतनापतिको पनि सहभागिता रहेको थियो । साथै, सैनिक मुख्यालयमा रहेको विभिन्न विभागका प्रमुख तथा प्रधानसेनापति पूर्णचन्द्र थापा र रथी प्रभुराम शर्माको पनि उपस्थिति रहेको थियो ।

समापन कार्यक्रममा प्रधानसेनापति थापाले उक्त सम्मेलनबाट भविष्यमा नेपाली सेनाले गर्नै पर्ने, गर्नु पर्ने र गर्न सक्ने कार्यको योजना निर्माणमा सबैको समान सोच र दृष्टिकोण बनाउन मद्दत पुर्‍याउने बताएको सेनाद्वारा जारी विज्ञप्तिमा उल्लेख छ । थापाले उक्त सम्मेलनले संगठनको भावी योजनाको प्रभावकारी कार्यान्वयनको आधार तयार भएको पनि बताएका थिए ।