माउन्ट केटु हिमाल चढ्नेहरुलाई सेनाद्वारा सम्मान

सैनिक मुख्लायमा आयोजित कार्यक्रममा प्रधानसेनापति पूर्णचन्द्र थापाले आरोही दलका सदस्यहरुलाई कदरपत्र प्रदान गरेका हुन् । उक्त टोलीले माघ ३ गते माउन्ट केटुको सफलतापूर्वक आरोहण गरेका थिए ।

उक्त हिमालको उचाई ८ हजार ६११ मिटर रहेको छ । सो अवसरमा आरोहण दलका टिम लिडर निर्मल पुर्जाले मगरले आरोहणको दौरान मृत्युलाई चुनौती दिँदै माउन्ट केटुको सफलतापूर्वक आरोहण गरेको बताए ।

उनले शिखरमा नेपाल र नेपालीको नाम विश्वभर फैलाउन नेपालको राष्ट्रिय गान गाउँदै चुचुरोमा राष्ट्रिय झन्डा फहराउन आफूहरु सफल भएको बताए । उनको टोलीले जाडोयाममा उक्त हिमालयको सफलतापूर्वक आरोहण गरी ऐतिहासिक सफलता हासिल गरेको हो ।