मसाल जुलुसबाट फर्कंदै गरेका नेकपाका सर्लाही इन्चार्ज बाटोमै मृत भेटिए
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
सर्लाही — मसाल जुलुसबाट फर्कंदै गरेका नेपाल कम्युनिस्ट पार्टीका सर्लाही इन्चार्ज डाचाराज वाग्ले बाटोमै मृत अवस्थामा भेटिएका छन् । उनको दुर्घटनामा मृत्यु भएको हुन सक्ने प्रहरीले जनाएको छ ।
![](https://assets-cdn.ekantipur.com/uploads/source/ads/sathi-deposit-900-100-1262024124333.gif)
बुधबार साँझ बरहथवामा मसाल जुलुस निकालेपछि उनी मोटरसाइकलमा राजमार्गतर्फ आउँदै थिए । उनलाई हरिपुर नगरपालिका–१ हजारबिगहाका वाग्ले मुर्तियाको जंगलमा लडिरहेको अवस्थामा भेटिएको थियो । बरहथवाबाट बुधबार अबेर राति हिँडेका उनी बाटोमा पर्ने जंगलमा लडिरहेको देखेपछि स्थानीयले प्रहरीलाई खबर गरेका थिए । मोटरसाइकलबाट केही पर लडिरहेका वाग्लेलाई बरहथवास्थित प्राथमिक स्वास्थ्य केन्द्रमा पुर्याउँदा चिकित्सकले मृत्यु भइसकेको घोषणा गरेको प्रहरीले जनाएको छ ।
वाग्लेको टाउको र खुट्टामा गम्भीर चोट लागेको प्रहरी उपरीक्षक सन्तोषसिंह राठौरले बताए । उनले जंगलको बाटोमा मोटरसाइकलको गति बढाएको वा जंगली जनावरले बाटो काट्दा दुर्घटना भएको हुन सक्ने बताए ।
बुधबार दिउँसो बरहथवामा पार्टीको जिल्ला कमिटीको पूर्ण बैठकमा सहभागी भएका वाग्लेले साँझ मसाल जुलुसको नेतृत्व गरेका थिए ।
प्रकाशित : माघ २२, २०७७ ०८:५९