भाडा घटाइएपछि यातायात बन्द- समाचार - कान्तिपुर समाचार
कान्तिपुर वेबसाईट
AdvertisementAdvertisement

भाडा घटाइएपछि यातायात बन्द

हरि गौतम

रुकुम पश्चिम — जिल्ला यातायात व्यवस्था समिति रुकुम पश्चिमले पछिल्लोपल्ट निर्धारण गरेको भाडाप्रति असहमति जनाउँदै यातायात व्यवसायीले बिहीबारदेखि यातायातका साधन बन्द गराएका छन् । सार्वजनिक सवारी नचलेपछि यात्रु हिँडेर गन्तव्यमा पुग्न बाध्य छन् ।

समितिले बिहीबारदेखि लागू हुने गरी ग्रामीण सडकको भाडा घटाएको हो । उक्त भाडा कम भएको भन्दै व्यवसायीले भाडा समायोजन गर्नुपर्ने अडान राखेका छन् । स्थानीय प्रशासनको निर्णयविरुद्ध सबै व्यवसायी एक भएको सिस्ने हिमाल बस तथा मिनीबस यातायात व्यवसायी समितिका महासचिव महेन्द्रराज गौतमले बताए । ‘केही रुटको भाडा मात्र समायोजन गर्न खोजेका हौं,’ भाडा निर्धारण कार्यदलका सदस्यसमेत रहेका उनले भने, ‘भाडा समायोजन नहुँदासम्म गाडी चलाउन सक्ने अवस्था छैन ।’

जिल्ला प्रशासन कार्यालयले भने यातायात व्यवसायीकै सहभागितामा भाडा निर्धारण गरिएकाले बढी भाडा लिए कारबाही गर्ने सूचना जारी गरेको छ । लामो समयदेखि भाडा महँगो भएको गुनासो आएपछि यातायात व्यवसायीसमेतको सहभागितामा भाडा निर्धारणका लागि कार्यदल बनाइएको प्रमुख जिल्ला अधिकारी बद्रीनाथ गैरेले बताए । उनका अनुसार कार्यदलको सिफारिसका आधारमा समितिले भाडा निर्धारण गरेको हो । ‘व्यवसायीहरू पनि कार्यदलमा हुनुहुन्थ्यो,’ उनले भने, ‘सडकको अवस्था र अरू सबै खर्चको हिसाब गरेर भाडा निर्धारण गरिएको हो, कार्यान्वयन जसरी पनि हुन्छ ।’

समितिले ‘क’ वर्गका सडकमा प्रतिकिलोमिटर ४, ‘ख’ वर्गका रुटमा ७ र ‘ग’ वर्गका सडकमा प्रतिकिलोमिटर ८ रुपैयाँका दरले भाडादर कायम गरेको छ । भाडा निर्धारण गर्न समितिले सहायक प्रमुख जिल्ला अधिकारी शेरबहादुर पुनको संयोजकत्वमा यातायात व्यवसायीसहित प्राविधिक, सडक प्रहरी र यातायात कार्यालयका प्रतिनिधिसहितको कार्यदल बनाएको थियो । कार्यदलको सिफारिसका आधारमा समितिले यसअघि ४ सय रुपैयाँ भाडा लाग्ने सडकमा झन्डै २ सय रुपैयाँ भाडादर कायम गरेको हो ।

प्रकाशित : माघ १, २०७७ १८:३१
प्रतिक्रिया
पठाउनुहोस्

इंग्ल्यान्ड आठ रनले मात्र पछाडि

एजेन्सी

गाले — इंग्ल्यान्ड श्रीलंकाविरुद्धको पहिलो टेस्टको पहिलो दिन बिहीबार बलियो स्थितिमा पुगेको छ । आफ्नो पहिलो इनिङ्स सुरु गर्दै इंग्ल्यान्डले दिनको खेल समाप्त हुँदा दुई विकेटमा १ सय २७ रन बनाएको छ । इंग्ल्यान्ड आठ रनले मात्र पछाडि रहेको छ ।

उसका लागि कप्तान जोए रुट ६६ र जोनी बेयरस्टो ४७ रन बनाएर खेलिरहेका छन् । उनीहरूले नटआउट १ सय १० रनको साझेदारी गरिसकेका छन् ।

यसअघि टस जितेर पहिले ब्याटिङको निर्णय गरेको श्रीलंका आफ्नो पहिलो इनिङ्समा १ सय ३५ रन मात्र बनाएर अलआउट भएको थियो । त्यसमा कप्तान दिनेश चन्डिमलले बनाएको २८ रननै सर्वाधिक ठूलो व्यक्तिगत स्कोर रह्यो ।

इंग्लिस बलरमध्ये डम बेस सर्वाधिक सफल रहे र उनले ३० रन दिएर पाँच विकेट लिए । यस्तै स्टुवार्ट ब्रडले तीन विकेट हात पारे ।

अब इंग्ल्यान्डले दोस्रो दिन पहिलो इनिङ्समा अग्रता लिएर त्यसलाई फराकिलो बनाउने प्रयास गर्नेछ ।

प्रकाशित : माघ १, २०७७ १८:२२
पूरा पढ्नुहोस्
प्रतिक्रिया
पठाउनुहोस्
×