मध्यावधि निर्वाचन घोषणाको बाहिर विरोध गर्ने कांग्रेसको भित्रभित्रै हड्डी हाँसेको छ : मन्त्री श्रेष्ठ- समाचार - कान्तिपुर समाचार

मध्यावधि निर्वाचन घोषणाको बाहिर विरोध गर्ने कांग्रेसको भित्रभित्रै हड्डी हाँसेको छ : मन्त्री श्रेष्ठ

कान्तिपुर संवाददाता

काठमाडौँ — नेकपा नेता तथा शिक्षा, विज्ञान तथा प्रविधिमन्त्री कृष्णगोपाल श्रेष्ठले सरकारले मध्यावधि निर्वाचन घोषणा गरेपछि प्रमुख प्रतिपक्षी कांग्रेस खुसी भएको बताएका छन् । नेकपा (ओली पक्ष)को काठमाडौं जिल्ला कमिटीले आयोजना गरेको कार्यकर्ता भेलामा नेता श्रेष्ठले प्रतिपक्षी कांग्रेसले निर्वाचनको तयारी थालेको बताए ।

पुस ५ गते मन्त्रिपरिषद्ले प्रतिनिधिसभा विघटनको निर्णयले गर्दा प्रमुख प्रतिपक्षी खुसी भएको श्रेष्ठको भनाइ थियो । काठमाडौंको प्रज्ञाप्रतिष्ठानमा आयोजित कार्यक्रममा उनले भने, 'प्रतिपक्षीको भित्रभित्र हड्डी हाँस्या छ, बाहिर असंवैधानिक भनेर गाली गर्नुपरेको छ, हामीले नजानेको हो र !'

'पर्खाइमा रहेको सरकार' भएकाले कांग्रेस मध्यावधि निर्वाचनबाट खुसी भएको श्रेष्ठको भनाइ थियो । उनले पाँच वर्षका लागि एकल रूपमा नेकपाले मत पाएर प्रतिपक्षमा बस्नुपरेको कांग्रेसलाई तीन वर्षमै चुनावमा जान पाउँदा खुसी लागेको र उसले निर्वाचन तयारी गरेको उनको भनाइ थियो । 'सबै निर्वाचन क्षेत्रमा सभा गर्दैं हिँडेको छ । त्यो भनेको चुनाव प्रचार हो,'उनले भने ।

संसद्को विशेष अधिवशेन बोलाएर राष्ट्रपति विद्यादेवी भण्डारी र प्रधानन्यायाधीश चोलेन्द्र शम्शेर जबरामाथि महाभियोग र प्रधानमन्त्री केपी शर्मा ओलीमाथि अविश्वासको प्रस्ताव ल्याउने चाल पाएपछि सरकारले संसद् विघटन गरेको मन्त्री श्रेष्ठको भनाइ थियो ।

आधिकारिक नेकपा केपी ओलीको नेतृत्वमा रहेको भन्दै श्रेष्ठले सूर्य चुनाव चिह्न आफूहरूको हुने बताए । स्थानीय तहको निर्वाचनमासँगै मिलेर जाऔं भन्दा नेकपा अध्यक्ष पुष्पकमल दाहालले नमानेको, संघीय र प्रदेश सभा निर्वाचन सूर्य चुनाव चिह्न लिएर लड्ने सहमति गरेर दाहालले नमानेको भन्दै अहिले दाहालले सूर्य चिह्नमा दाबी गर्न नमिल्ने मन्त्री श्रेष्ठको भनाइ थियो ।

संसद् विघटन गरेपछि नेकपा विभाजनको कानुनी लडाइँमा लागेको छ । व्यवहारिक रूपमा फुटिसकेको नेकपा अहिले कानुनी रूपमा फुट्न बाँकी रहेको छ । निर्वाचन आयोगमा दुवै पक्षले आफू नै नेकपा भनेर दाबी गरिरहेका छन् ।

प्रकाशित : पुस १८, २०७७ १४:५१
प्रतिक्रिया
पठाउनुहोस्

पैदलयात्रीलाई ठक्कर दिएर भाग्यो मन्त्री प्रभु साहको गाडी

ओमप्रकाश ठाकुर

सर्लाही — सहरी विकास मन्त्री प्रभु साह सवार गाडीले शनिबार सर्लाहीको हरिवनमा एक पैदल यात्रुलाई ठक्कर दिएर भागेको छ । गाडीको ठक्करबाट घाइते भएका पैदलयात्रीको स्वाभिमान अस्पताल हरिवनमा उपचार भइरहेको छ ।

पश्चिमबाट पूर्वतर्फ आउँदै गरेको साह सवार ना १ झ ३८४२ नम्बरको जिपले लालबन्दी नगरपालिका–८ का ३० वर्षीय बच्चु तामाङलाई ठक्कर दिएको थियो । घाइते तामाङको अवस्था सामान्य छ ।

प्रत्यक्षदर्शी हरिवनस्थित चतुर्भुजेश्वर जनता बहुमुखी क्याम्पसका स्ववियु सभापति प्रज्वल ढुंगानाका अनुसार पश्चिमबाट पूर्वतर्फ झण्डा हल्लाउँदै आएको गाडीले ठक्कर दिएको थियो । दुर्घटना लगत्तै घाइतेको उद्धार गर्न लाग्दा जिप भागेको उनले बताए । मन्त्री साहको गाडीको ठक्करबाट घाइते भएका बच्चु तामाङ।

ढुंगानाले राज्यको मन्त्री जस्तो गरिमा पदमा बसेका व्यक्तीले मानवियता समेत नदेखाएको बताए । ‘दुर्घटना नहुने कुरो हैन, तर ठक्कर लागेपछि सामान्य मनिसले पनि मानवियता देखाउनुपर्छ, वहाँ त अहिलेको बहालवाला मन्त्री पर्नु भयो र पनि ठक्कर दिएपछि झन् भाग्नु भयो,’ उनले भने, ‘हामीले तत्काल उद्धार गर्दा घाइतेको अवस्था सामान्य बनेको छ, यसमा मन्त्रीज्युले गल्ती महसुस गर्नुपर्छ ।’

मन्त्री साह गृह जिल्ला रौतहटबाट महोत्तरीको जलेश्वरतर्फ जाँदै गर्दा दुर्घटना भएको थियो । ठक्कर दिने गाडीको अल्फाबेट देख्न नपाएका प्रत्यक्षदर्शीले प्रहरीलाई खबर गरेपछि मन्त्री साह चढेको गाडी रहेको फेला परेको थियो । प्रहरी उपरीक्षक सन्तोष सिंह राठौरले मन्त्री साह चढेको जिपले पैदल यात्रुलाई ठक्कर दिएको पुष्टि गरे । ‘मन्त्री ज्यू चढेको जिपले नै ठक्कर दिएको रहेछ, यसबारेमामाथि जाहेर गरिसकेका छौं,’ उनले भने, ‘घाइतेको उपचार भइरहेको छ, उनको अवस्था सामान्य छ ।’

प्रकाशित : पुस १८, २०७७ १४:४६
पूरा पढ्नुहोस्
प्रतिक्रिया
पठाउनुहोस्
×