राष्ट्रपति भण्डारीको सम्मानमा द्यो ब्वोय्केगु

लीला श्रेष्ठ

भक्तपुर — राष्ट्रपति विद्यादेवी भण्डारीको सम्मानमा द्यो ब्वोय्केगु (नवदुर्गा देवता प्रर्दशन) आयोजना गरिएको छ । भक्तपुरको नवदुर्गा देवगण नाच पहिलोपटक आइतबार कोजाग्रत पूर्णिमाको अवसरमा द्यो ब्वोय्केगु गरिएको हो । 

बडादसैंको अन्तिम दिन कोजाग्रत पूर्णिमाको अवसरमा राष्ट्रपति भण्डारीले नवदुर्गा देवगणको दर्शन, पुजा र प्रसाद ग्रहण गर्न आउने अवसर पारेर द्यो ब्वोय्केगु आयोजना गरिएको नवदुर्गा देवगण जात्रा तथा मन्दिर व्यवस्थापन समितिले जानकारी दिएको छ ।

प्रत्येक वर्ष कोजाग्रत पूर्णिमाको दिन राष्ट्र प्रमुख नवदुर्गा मन्दिरमा पुजाआजाको लागि आउने प्रचलन छ । सोही प्रचलन अनुसार कोजाग्रत पुर्णिमाको दिन दर्शनका लागि आउँदा राष्ट्र प्रमुखलाई द्यो ब्वोय्केगु कार्यक्रम गर्ने धेरै वर्षअघि देखिको प्रयास पुरा गरेको समितिका अध्यक्ष वृजेश बनमालाले बताए ।

यस्तै, नवदुर्गा भवानीको नाच व्यवस्थापन एवं मौलिक जात्रा संरक्षणका लागि ५२ लाख १५ हजार रुपैयाँको अक्षयकोष स्थापना गरिने भएको छ ।

अक्षयकोषका लागि जिल्ला समन्वय समिति भक्तपुर प्रमुख नवराज गेलालको संयोजकत्वमा १५ लाख र भक्तपुर उद्योग वाणिज्य संघको ५ लाख १५ हजार रुपैयाँ गरी कूल २० लाख १५ हजार रुपैयाँ नवदुर्गा देवगण तथा मन्दिर व्यवस्थापन समितिलाई हस्तान्तरण गरिएको छ ।

अक्षयकोषको उक्त रकम राष्ट्रपति विद्यादेवी भण्डारीले श्री नवदुर्गा गण तथा मन्दिर व्यवस्थापन समितिलाई हस्तान्तरण गरिन्। कोषका लागि समितिले ३२ लाख रुपैयाँ संकलन गरेको छ ।

प्रकाशित : आश्विन २६, २०७६ २०:१२
प्रतिक्रिया
पठाउनुहोस्
ADVERTISEMENT
ADVERTISEMENT

चिनियाँ राष्ट्रपति सीको भ्रमणमा विरोध गर्ने २ तिब्बती शरणार्थीसहित ३२ जना पक्राउ 

पक्राउ परेका मध्ये २९ जनालाई आइतबार साँझ छाडियो
मातृका दाहाल

काठमाडौँ — चिनियाँ राष्ट्रपति सी चिनफिङको भ्रमणलाई लक्षित गरेर स्वतन्त्र तिब्बतको पक्षमा प्रचार गर्ने ३२ जना पक्राउ परेका छन् । केही दिनअघि नै उनीहरु पक्राउ परेपनि सीको भ्रमणमा नकारात्मक असर पुग्ने भएर यो विषय प्रहरीले गुपचुप राखेको थियो । 

पक्राउ परेका मध्ये २ तिब्बती शरणार्थी र १ नेपालीलाई काठमाडौं र १ जनालाई सप्तरीबाट पक्राउ गरिएको हो । दुवै शरणार्थीलाई बौद्ध स्तुपा नजिकैबाट पक्राउ गरिएको हो । उनीहरुको बौद्ध फूलबारीमा पसल समेत रहेको खुलेको छ । महानगरीय प्रहरी परिसर काठमाडौंका प्रवक्ता डीएसपी होविन्द्र बोगटीका अनुसार राष्ट्रपति सीको भ्रमणमा अवरोध पुर्‍याउन खोज्ने ३२ जनालाई पक्राउ गरिएकोमा ३ जनालाई हिरासतमा राखेर बाँकीलाई आइतबार साँझ रिहा गरिएको छ ।

पक्राउ परेकामध्ये तिब्बती शरणार्थी परिचयपत्र बाहक हिस्से ग्याम्चो लामा र नवाङइमा लामा र शान्ति समाजका वीपी पौडेल छन् । पक्राउ परेका दुवै शरणार्थीलाई महानगरीय प्रहरी वृत्त बौद्ध र पौडेललाई टेकुस्थित काठमाडौं परिसरको हिरासतमा राखिएको छ ।

त्यस्तै, चिनियाँ विदेशमन्त्रीको नेपाल भ्रमणका क्रममा फ्रि तिब्बतको पक्षमा लागेको अभियोगमा सप्तरीको राजविराजबाट पक्राउ परेकी मधेस फाउण्डेसनकी सदस्य सुनिता साहलाई पनि आइतबार नै काठमाडौं ल्याइएको छ । उनलाई महानगरीय प्रहरी वृत्त कमलपोखरीको हिरासतमा राखिएको छ ।

प्रहरीका अनुसार काठमाडौंबाट पक्राउ परेका आरोपितले राष्ट्रपति सीको आगमनका बेला शनिबार त्रिभुवन अन्तर्राष्ट्रिय विमानस्थल बाहिर पुगेर विरोध गर्ने तयारीमा थिए ।

प्रहरीले झोला र टि–सर्टमा स्वतन्त्र तिब्बतको प्रचारप्रसार गरिएका सामान समेत बरामद गरेको छ । डीएसपी बोगटीले राष्ट्रपति सीको भ्रमणलाई व्यवधान पुर्‍याउने मनसायले गतिविधि गरेको आरोपमा ३२ जनालाई नियन्त्रणमा लिइएकोमा २९ जनालाई रिहा गरेर ३ जनालाई अभद्र व्यवहार कसुरमा हिरासतमा राखिएको बताए ।

राष्ट्रपति सीको भ्रमण अवधिभर पक्राउ परेका व्यक्तिको विषय गुपचुप राखिएको थियो । सी स्वदेश फिर्ता भएपछि ३ जनालाई नियन्त्रणमै राखेर बाँकीलाई रिहाई गरिएको हो । सी आइतबार दिउँसो २ बजे स्वदेश फिर्ता भएका हुन् ।

प्रकाशित : आश्विन २६, २०७६ १९:३७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×