पुल बन्यो, सडक उस्तै

कान्तिपुर संवाददाता

काठमाडौँ — चाँगुनारायण नगरपालिका–४ मिलाख्वाटकी लक्ष्मी भँडेलको परिवारसँग ३ मोटरसाइकल, २ वटा सामान बोक्ने गाडी छन् । आजसम्म सवारीसाधन घरसम्म ल्याउन भने सकेका छैनन् । लक्ष्मीको घरको २ सय मिटर दूरीमा साढे ५२ मिटर लामो मनोहरा पुल बनेको छ । रंगरोगन गरेर चिटिक्क बनाएको पुल जोड्ने सडकको अवस्था नाजुक छ । 

साघुँरो धराप सडकका कारण सवारीसाधन ब्रम्हखेल दूरसञ्चारतिरै छोडेर हिँड्दै घर आउनुपर्ने बाध्यता रहेको उनी बताउँछिन् । भक्तपुर र काठमाडौं जोड्ने मनोहरा खोलामा १० मिटर फराकिलो सडक बने पनि आवतजावतमा समस्या भएको स्थानीय बासिन्दाको गुनासो छ । ‘चिटिक्क पुलको दायाँबाँयाको सडक हिलाम्य छ,’ उनले भनिन्, ‘सवारीसाधन त के मान्छे हिँड्न सक्ने अवस्था छैन ।’

आर्थिक वर्ष ०६९/७० मा डिभिजन सडक कार्यालय भक्तपुरले निर्माण थालेको मनोहरा पुल ७ वर्षपछि निर्माण सम्पन्न भएको हो । सडक निर्माण नहुँदा करिब ४ करोड रुपैयाँ खर्चेर बनाएको पुलको औचित्य नभएको स्थानीय बताउँछन् । सडक नबन्दा चाँगुनारायण हलछाप, मिलाख्वाट, कापाहिटी, ब्रम्हखेललगायतका बासिन्दाले समस्या भोग्दै आएका छन् ।

कागेश्वरी मनोहरा–४ ब्रम्हखेलदेखि दूरसञ्चारसम्मको करिब ७ सय ५० मिटर सडक साँघुरो र हिलाम्य छ । ‘चाँगुनारायण मन्दिर पश्चिम भेगका अधिकांश मानिसको औषधोपचार काठमाडौंमा गरिन्छ,’ ब्रम्हखेलका श्यामबहादुर पण्डित क्षेत्रीले भने, ‘सडक निर्माणको अत्तोपत्तो छैन ।’

कागेश्वरी मनोहरा–४ का वडाध्यक्ष एवं नगरपालिकाका प्रवक्ता राजाराम पुडासैनीका अनुसार सडक निर्माणअघि सार्वजनिक खहरे संरक्षण गर्नुपर्ने भएकाले खहरेमा करिब २५ लाख रुपैयाँ लागतमा ढलानको रिटेनिङ्वाल लगाउने कार्य भइरहेको छ । मनोहरा पुल–ब्रम्हखेल–दूरसञ्चार सडक निर्माण तथा स्तरोन्नतिका लागि नगरपालिकाले योजना सडकअन्तर्गत इस्टमेटअनुसारको बजेट खर्च गर्ने योजना बनाएको र चालू अर्थिक वर्षभित्र सडक निर्माण सम्पन्न हुने बताए ।

मनोहरा पुल जोडिएको मिलाख्वाट–हलछाप–कापाहिटी–शाङ्दह–चाँगुनारायण सडकको ट्र्याकको अवस्था पनि त्यस्तै छ । ठाउँठाउँको भिरालो सडक भेलले बगाएर आवतजावतमा समस्या छ । उक्त सडकको स्तरोन्नतिका लागि १ करोड रुपैयाँ विनियोजन गरेको चाँगुनारायण–४ का वडा सदस्य दिनेश खनालले बताए ।

प्रकाशित : भाद्र २६, २०७६ ०७:३०
प्रतिक्रिया
पठाउनुहोस्

लिच्छविकालीन अनन्तलिङ्गेश्वरको पुनर्निर्माण सकियो

कान्तिपुर संवाददाता

भक्तपुर — भूकम्पका कारण क्षतिग्रस्त लिच्छविकालीन अनन्तलिङ्गेश्वर महादेव मन्दिर पुनर्निर्माण सकिएको छ । सातौं शताब्दीमा नरेन्द्रदेवले प्यागोडा शैलीमा बनाएको लिच्छविकालीन मन्दिर पुरानै शैलीमा पुनर्निर्माण गरिएको हो । 

लिच्छविकालन प्यागोडा शैलीको मन्दिर १९९० सालको भूकम्पले क्षतिग्रस्त भएपछि पुनर्निर्माण गर्दा गुम्बज शैलीमा बनाइएको थियो । सोही गुम्बज शैलीको मन्दिर पनि ०७२ वैशाखको भूकम्पले क्षतिग्रस्त भएको थियो ।

क्षतिग्रस्त मन्दिरलाई १९९० सालअघिकै शैलीमा पुनर्निर्माण गरिएको मन्दिर संरक्षण तथा विकास समिति अध्यक्ष शालिकराम न्यौपानेले बताए । इतिहासविद् पुरुषोत्तमलोचन श्रेष्ठको ‘अनन्तलिङ्गेश्वर’ पुस्तकमा १९९० सालको भूकम्प अघि अनन्तलिङ्गेश्वर मन्दिर नेपाली शैलीमा बनेको तीनतले थियो ।

स्मारक संरक्षण तथा दरबार हेरचाह कार्यालय (पुरातत्त्व विभाग) भक्तपुरका अनुसार यो पल्ट १ करोड ६३ लाख २९ हजार ६ सय ८८ लागतमा मान्दिर पुननिर्माण गरिएको हो । करिब दुई वर्ष खर्चेर बनाइएको अनन्तलिङ्गेश्वर महादेव मन्दिरको उपप्रधान तथा रक्षामन्त्री ईश्वर पोखरेल, पूर्वमन्त्री एवं प्रतिनिधिसभा सदस्य महेश बस्नेत र पूर्वमन्त्री आनन्दप्रसाद पोखरेलले संयुक्त रूपमा उद्घाटन गरे ।

उपप्रधान तथा रक्षामन्त्री ईश्वर पोखरेलले विकास निर्माणको नाममा पुरातात्त्विक संरचनाको विनाश हुन नहुने बताए । पूर्व पर्यटन मन्त्री आनन्दप्रसाद पोखरेलले लिच्छविकालीन मन्दिर र मन्दिरवरपर निर्माण गर्न लागिएको गुरुयोजना सम्पन्न गर्न समन्वय, ऐक्यबद्धता आवश्यक भएको बताए ।

अर्का पूर्वमन्त्री एवं प्रतिनिधिसभा सदस्य महेश बस्नेतले भक्तपुरका धेरै क्षेत्रहरू विश्व सम्पदामा सूचीकृत भएका र यहाँका महत्त्वपूर्ण धार्मिक स्थल भएकाले भक्तपुरलाई धार्मिक पर्यटकीय क्षेत्र घोषणा गरी विकास गर्नुपर्ने बताए ।

प्रकाशित : भाद्र २६, २०७६ ०७:३०
पूरा पढ्नुहोस्
प्रतिक्रिया
पठाउनुहोस्