प्रतिबन्धित औषधि बिक्रीवितरण

कान्तिपुर संवाददाता

काठमाडौँ — भारतमा प्रतिबन्धित पशु स्वास्थ्य एन्टिबायोटिक औषधि नेपालमा बिक्री भइरहेको छ । नेपाल सरकारले आयातमा रोक नलगाउँदा खुलमखुला भेटेनरी औषधि पसलमार्फत् यो औषधि बिक्रीवितरण भइरहेको हो ।

भारतको स्वास्थ्य मन्त्रालयले जुलाई १९ (१० दिनअघि) मा ‘कोलिस्टिन’ नामक एन्टिबायोटिकको उत्पादन, बिक्रीविरतण र प्रयोग बन्द गर्नु भन्दै सूचना निकालेको थियो । कुखुरा फार्म, माछापालन र पशु स्वास्थ्य रोग उपचारका लागि प्रयोग हुने यो औषधिले अप्रत्यक्ष रूपमा मानव स्वास्थ्यलाई समेत गम्भीर असर गर्ने भन्दै भारतले राजपत्रमा अंकित गरी यो औषधि प्रतिबन्ध गरिसकेको छ । नेपालमा भारतबाटै आयात गरी यो औषधिको
बिक्रीवितरण गरिने गरेको छ ।
पशुमा लाग्ने रोग निको बनाउन र पशुका खाद्यपदार्थमा प्रयोग गरिने भनिए पनि पछिल्लो समय पशुजन्य पदार्थको उत्पादन बढाउनका लागि ‘कोलिस्टिन’ को दुरुपयोग बढाइरहेको भारतीय सञ्चारमाध्यमले जनाएका छन् । र, यसले मानव शरीरमा ‘एन्टिबायोटिक रेसिस्टेन्ट’ बढेको पनि उल्लेख छ । ‘कोलिस्टिन’ को दुरुपयोग रोक्नकै लागि प्रतिबन्ध लगाइएको मन्त्रालयको सूचनामा उल्लेख छ ।

पशु सेवा विभागका डा. दिकरदेव भट्टका अनुसार नेपालमा विशेषगरी कुखुरामा लाग्ने रोग निको पार्न ‘कोलिस्टिन’ को प्रयोग हुन्छ । उनले भने, ‘कतै कुखुराको दानामा पनि यसको प्रयोग गर्छन् । दानामा एन्टिबायोटिक मिसाएर बेच्न र यस्तो दाना कुखुरालाई खुवाउने अभ्यासमा हामीले रोक लगाएका छौं ।’ रोक लगाए पनि लुकिछिपी यसको दुरुपयोग भने नरोकिएको उनले बताए ।

भारतबाट नेपालमा आयातित हुने औषधिमाथि तत्काल प्रतिबन्ध लगाउन नसकिने औषधि व्यवस्था विभागका निमित्त महानिर्देशक पानबहादुर क्षेत्रीले बताए । उनले भने, ‘औषधिको प्रयोग र बिक्रीवितरण रोक्ने प्रक्रिया लामो छ । मन्त्रिपरिषद्बाटै निर्णय गरेर राजपत्रमार्फत् औषधि प्रतिबन्ध गर्नुपर्ने हुन्छ ।’ आन्तरिक छलफल र औषधि सल्लाकार समितिको बैठक बसेर मात्रै यो औषधिबारे केही निर्णय लिन सकिने उनले बताए ।


प्रकाशित : श्रावण १९, २०७६ ०८:५७
प्रतिक्रिया
पठाउनुहोस्

हनुमन्ते सफाइ अभियान ७५औं हप्तामा

कान्तिपुर संवाददाता

(भक्तपुर) — हनुमन्ते सफाइ अभियानले ७५ औं हप्तासम्म निरन्तरता पाएकोमा शनिबार सडक हरियाली अभियान थालेको छ । हनुमन्ते सरसफाइ अभियानको ७५ औं हप्ताको अवसरमा शनिबार सफाइसँगै अरनिको राजमार्ग सडकखण्डअन्तर्गत सूर्यविनायक तीनकुने ६ लेन सडकको घलाँतेस्थित सडक किनारामा दुबो रोप्ने कार्यको थालनी गरिएको हो ।

सूर्यविनायक नगरपालिका ५ घलाँतेमा वन तथा वातावरणमन्त्री शक्तिबहादुर बस्नेत, हनुमन्ते सफाइ अभियानका मुख्य अभियन्ता प्रतिनिधिसभा सदस्य एवं पूर्वमन्त्री महेश बस्नेत, प्रदेशसभा सदस्यहरू, स्थानीय तहका जनप्रतिनिधि, सुरक्षा निकायका व्यक्तित्वहरू, शिक्षक, विद्यार्थीलगायतको उपस्थितिमा सडक हरियाली अभियान थालेको हो ।

हनुमन्ते सरसफाइको नाममा समग्र भक्तपुर सरसफाइ अभियानलाई नेतृत्व गरेको भन्दै वन तथा वातावरण मन्त्री बस्नेतले अभियन्ताको प्रशंसा गरेका छन् । ‘हनुमन्ते सरसफाइको नाममा भक्तपुर समृद्धिको अभियानमा अघि बढेको छ,’ उनले भने, ‘यो अभियानले भक्तपुरको मात्र नभई मुलुकलाई सभ्यता सिकाएको छ ।’

सांसद बस्नेतले राजनीतिमा प्रतिस्पर्धा विकासमा ऐक्यबद्वता हुनुपर्ने औंल्याउँदै हनुमन्ते खोलालाई नुहाउन योग्य बनाउने बताएका छन् । सफाइ अभियानले सकरात्मक सन्देश दिँदै आएको भन्दै अरनिको राजमार्ग सडकखण्डअन्तर्गत कोटेश्वरदेखि साँगासम्मको सडकलाई हरियाली तथा नमुनायोग्य सडक बनाइने उनले बताए । हनुमन्ते सरसफाइ अभियान २०७४ फागुन २९ मा देखि प्रत्येक शनिबार सरसफाइ गरिँदै आएको छ ।

सफाइ अभियानका संयोजक सूर्यविनायक नगरप्रमुख वासुदेव थापाले सफाइसँगै सुरक्षित भक्तपुरको परिकल्पनाअनुरूप कार्य गर्दै आएको बताए । हरियाली सडक निर्माणका लागि वातावरण विभाग बबरमहलले १ करोड ४५ लाख रुपैयाँ सहयोग गरेको नगरप्रमुख थापाले बताए । उक्त बजेट लागतमा मनोहरा पुल जगातीदेखि सूर्यविनायकसम्मको ६ लेन सडक किनारामा दुबो लगाउने, बिरुवा रोप्ने, पुराना बिरुवा कटिङ तथा व्यवस्थापन गर्ने योजना रहेको उनले बताए ।

हनुमन्तेसँगै मनोहरा खोलादेखि साँगासम्म अरनिको राजमार्ग सफाइ अभियानले निरन्तरता पाएको छ । मनोहरादेखि सूर्यविनायक सम्मको सडकमा सडक बत्ती जडान, डस्टबिन राख्ने योजना भएको नगरप्रमुख थापाले बताए । अभियानमा सडक, बस्ती, टोल, चोक सफाइ गर्ने, लागूऔषध दुर्व्यसनी, विभिन्न प्रकारका विकृति तथा विसंगतिका बारेमा अनुगमनलगायतको कार्य भइरहेको समेत उनले बताए । हनुमन्ते नदी सफाइ अभियान र अरनिको राजमार्ग सफाइ अभियानको तेस्रो चरणलाई श्रम शिविरको रूपमा विकास गर्दै आएको सफाइ मुख्य अभियन्ता बस्नेतले बताए ।

अभियानलाई प्रभावकारी बनाउन सम्बन्धित वडाका वडाध्यक्षको नेतृत्वमा स्थानीय बासिन्दा, संघसंस्था, विद्यालय, समूह, होटल व्यवसायी, जनप्रतिनिधि, सरोकारवाला निकायका पदाधिकारी लगायतलाई सहभागिता गराउँदै आएको नगरपालिकाले जनाएको छ ।

मध्यपुर थिमिमा सफाइ श्रमशिविरमध्यपुर थिमि नगरको विभिन्न संघसंस्थामा आवद्ध युवाहरूले मध्यपुर थिमि सफाइ श्रमशिविर अभियान थालेका छन् । शनिबारसम्म पाँच सातासम्म नियमित सफाइ श्रमशिविरमा उत्रिएका युवाहरूले ऐतिहासिक विष्णु कुण्डल, विष्णुवीर, बालकुमारीलगायत क्षेत्रमा फोहोर संकलन गरेको छ । श्रमशिविरमा उत्रिएका युवालाई मध्यपुर थिमि नगरप्रमुख मदनसुन्दर श्रेष्ठ र भैरव बहान गुल्म गठ्ठाघरको साथ रहेको स्थानीय विजयकृष्ण श्रेष्ठले बताए ।

प्रकाशित : श्रावण १९, २०७६ ०८:५७
पूरा पढ्नुहोस्
प्रतिक्रिया
पठाउनुहोस्