आईएमई बन्यो पब्लिक रेमिट्यान्स कम्पनी, आइपीओ जारी गर्ने
काठमाडौँ — रेमिट्यान्स कम्पनी आईएमई लिमिटेडको शुक्रबार आयोजित २२औँ साधारण सभाले आईपीओ जारी गर्ने प्रस्ताव पारित गरेको छ । यो सँगै नेपालको पहिलो पब्लिक रेमिट्यान्स कम्पनीको परिचय आईएमईले थपेको विज्ञप्तिमा उल्लेख छ ।
अब आईएमईले सर्वसाधारणका लागि चाँडै प्राथमिक सेयर निष्कासन गर्ने कम्पनीका प्रमुख कार्यकारी अधिकृत खिलेन्द्र पौडेलले बताएका छन् । यो प्रकृयाका लागि कम्पनीले सेयर निष्कासन तथा बिक्री प्रबन्धक नियुक्त गरी नियामक धितोपत्र बोर्डमा निवेदन दिनेछ । सम्बन्धित नियामक निकायबाट स्वीकृत प्राप्त हुनासाथ यो प्रकृया अगाडि बढ्नेछ ।
आईएमई ग्रुपका अध्यक्ष एवं संस्थापक चन्द्रप्रसाद ढकालले पहिलो पब्लिक रेमिट्यान्स कम्पनीका रूपमा आउन पाउँदा खुसी लागेको बताए । आईएमई ग्रुपका प्रबन्ध निर्देशक हेमराज ढकालले विश्व अहिले डिजिटल युगमा प्रवेश गरेको औल्याउँदै प्रतिस्पर्धी बजारमा कम्पनीलाई अझै उर्जावान, पारदर्शी र व्यवसायिक बनाउन पब्लिकमा लगिएको बताए ।
आईएमईले विश्वभर मनी ट्रान्सफर सेवा प्रदान गर्छ । आइएमईबाट विश्वका दुई सयभन्दा बढी देशहरूबाट देशमा विप्रेषण भित्रिने गरेको कम्पनीले जनाएको छ । नेपाल राष्ट्र बैंक र बैंक नेगारा मलेसियाबाट इजाजतप्राप्त आईएमई सन् २००१ मा स्थापना भएको थियो ।
प्रकाशित : मंसिर १७, २०७९ १२:४१
