म्याग्दी — मुस्ताङको एक मतदान केन्द्र हिँडेको मतदान अधिकृत सहितको टोली बाटोमा जमेको बाक्लो हिउँ छिचोल्न नसकेपछि रोकिएको छ । मुस्ताङ प्रहरी प्रमुख डिएसपी रवीन्द्र पौडेलका अनुसार वारागुङमुक्ति क्षेत्र गाउँपालिका–५ साङ्तास्थित हिमाली आधारभूत विद्यालय मतदान केन्द्रमा मतदान गराउन कर्मचारी र सुरक्षाकर्मी पुग्न नसकेका हुन् ।

निर्वाचन कार्यालयका अनुसार उक्त मतदानस्थलमा ३५ मतदाता छन् ।

‘मुस्ताङ–डोल्पा जाने बाटोमा करिब एक किलोमिटर क्षेत्रमा बाक्लो हिउँ जमेकोले मतदान अधिकृतसमेत कर्मचारी र सुरक्षाकर्मी पुग्न समस्या भएको छ । शुक्रबार डोजर लगेर बाटो सफा गरी कर्मचारी पुर्‍याउने योजनामा छौं,’ डिएसपी पौडेलले भने, ‘एक हप्ताअघि मतदान केन्द्र अनुगमनमा जाँदा ठिकै थियो, अहिले हिउँ जमेछ । उच्च भूगोल हो, पर्सि फर्कंदा फेरि उस्तै बन्न सक्छ, हामी सतर्क छौं ।’

मुख्य निर्वाचन अधिकृतको कार्यालय मुस्ताङका अनुसार आइतबार हुने प्रतिनिधिसभा तथा प्रदेशसभा सदस्य पदको निर्वाचन गराउन मतदान अधिकृतहरुसहित २ सय ९६ जना कर्मचारीहरु आवश्यक मतदान सामग्री, सुरक्षाकर्मी मतदानस्थल पुगेका छन् । ‘हाम्रा सबै मतदान अधिकृत आवश्यक मतदान सामग्रीसहित तत मतदानस्थल पुगेका छन् । सबै तयारी पूरा भएको छ,’ मुख्य निर्वाचन अधिकृत ईश्वर पराजुलीले भने, ‘मतदानस्थल निर्माण र यता मतगणना स्थलको व्यवस्थापनका काम धमाधम भइरहेको छ ।’

प्रतिनिधिसभामा एकमात्र निर्वाचन क्षेत्र रहेको मुस्ताङमा १० हजार ९ सय ५७ जना मतदाताले ३८ वटा मतदान केन्द्रबाट मतदानमा भाग लिँदैछन् । निर्वाचन कार्यालय मुस्ताङले दिएको जानकारीअनुसार सबैभन्दा कम वारागुङमुक्ति क्षेत्र गाउँपालिकाअन्तर्गत समर आधारभूत विद्यालय मतदान केन्द्रमा ३४ जना र बढी थासाङ गापाको जनआदर्श मावि कोवाङ मतदान केन्द्रमा ६ सय ५० मतदाता रहेका छन् । त्यस्तै सबैभन्दा दुर्गम लोमन्थाङ गापाको सम्जोङ मतदान केन्द्रमा ६१ जना र वारागुङमुक्तिक्षेत्र गापा, छ साङताको हिमाली आवि मतदान केन्द्रमा ३५ जना मतदाता छन् ।