उत्कृष्ट वायुसेवाहरुलाई पुरस्कृत गरिने
काठमाडौँ — नेपाली पर्यटन क्षेत्रमा हवाई क्षेत्रले गरेको योगदानको कदर गर्दै उत्कृष्ट वायुसेवाहरुलाई पुरस्कृत गरिने भएको छ । बेस्ट एअरलाइन्स अवार्ड नेपाल नामक संस्थाले बुधबार राजधानीमा पत्रकार सम्मेलन गर्दै २७ मंसिरमा एक समारोहबीच विभिन्न १६ विधामा वायुसेवा कम्पनीहरुलाई पुरस्कार दिने जनाएको छ ।
आयोजकका अनुसार, नेपालमा हाल काठमाडौं भएर विभिन्न अन्तर्राष्ट्रिय गन्तव्यमा उडान भर्दै आएका २७ र आन्तरिक ९ वटा वायुसेवाबीच प्रतिस्पर्धा हुने छ ।
आयोजकले बेस्ट एअरलाइन्स आवर्डस्अन्तर्गत ३ विधाका पुरस्कार नेपाली वायुसेवालाई मात्रै छुट्याइएको छ । त्यस्तै ११ विधामा नेपालबाट अन्तर्राष्ट्रिय उडान भरिरहेका वायुसेवाले प्रतिस्पर्धा गर्नेछन् भने बाँकी २ विधामा हवाई उड्डयनलाई सुरक्षित र सहज बनाउन भूमिका खेल्ने विभिन्न साझेदारहरुमध्येबाट उत्कृष्टलाई चयन गरिने भनिएको छ ।
यस पुरस्कारको निर्णायक मण्डलमा नेपाल उद्योग वाणिज्य संघका अध्यक्ष शेखर गोल्छा, होटेल द्वारिकाज्का अध्यक्ष तथा नेपालका लागि स्पेनका अनररी कन्सुलर अम्बिका श्रेष्ठ, होटेल एसोसिएसन नेपालका अध्यक्ष सृजना राणा, स्कुल क्लब अफ काठमाडौंका अध्यक्ष प्रवीणबहादुर पाण्डे, नाटाका पूर्वअध्यक्ष सीएन पाण्डे, पाटा नेपाल च्याप्टरका अध्यक्ष विभूतिचन्द ठाकुर, एभिएसन म्युजियमका प्रमुख कार्यकारी अधिकृत वेद उप्रेती, कान्तिपुर मिडिया ग्रुपका प्रमुख कार्यकारी अधिकृत महेश स्वाँर, लिड नेपाल इन्कका अध्यक्ष अनिलकेशरी शाह, सीजी होल्डिङ्स्का अध्यक्ष अरुण चौधरी तथा गैर आवासीय नेपाली संघका संस्थापक अध्यक्ष उपेन्द्र महतो छन् ।
