हिमालय एअरलाइन्सकी डंगोलले चढिन् सगरमाथा- बजार - कान्तिपुर समाचार
कान्तिपुर वेबसाईट
AdvertisementAdvertisement

हिमालय एअरलाइन्सकी डंगोलले चढिन् सगरमाथा

कान्तिपुर संवाददाता

काठमाडौँ — हिमालय एअरलाइन्सकी वरिष्ठ उडान परिचारिका ओम्निका डंगोलसहित सगरमाथा आरोहण टोलीले मे १६ मा सगरमाथाको आरोहण गरेको छ । थामसेर्कु ट्रेक्स एन्ड एक्सपिडिसनको आरोहण टोलीसँग एअरलाइन्सकी उडान परिचारिका डंगोलले ८८४८.८६ मिटर अग्लो सगरमाथाको आरोहण गरेकी हुन् ।

डंगोलले यसअघि मेरा, आइल्यान्ड र लोबुचे गरी तीनवटा चुचुरो आरोहण गरिसकेकी छन् । हिमालयले नेपालमा पर्यटन प्रवर्धन गर्ने उद्देश्यले ‘हिमालय एअरलाइन्स् एभरेष्ट एक्सपिडिसन बाई फ्लाइट अटेन्डेन्ट’ परियोजना सुरु गरेको जनाएको छ । यसै अन्तर्गत डंगोलले आरोहण गरेकी हुन् ।

एअरलाइन्स्का उपाध्यक्ष विजय श्रेष्ठले भने, ‘हिमालय एअरलाइन्स्का मुख्य उद्देश्यहरूमध्ये नेपाली पर्यटन प्रवर्धन गर्नु पनि एक हो र यो परियोजना नेपालको पर्यटन प्रवर्धनमा हिमालयको एउटा सानो कदम मात्र हो । हामी यस परियोजनाको उपलब्धिका लागि टोलीलाई बधाई दिन्छौं ।’

प्रकाशित : जेष्ठ ७, २०७९ १८:१०
प्रतिक्रिया
पठाउनुहोस्

धनगढीको उपमेयरमा रोचक प्रतिस्पर्धा

मोहन बुडाऐर

धनगढी — धनगढी उपमहानगरको उपमेयर पदमा प्रारम्भिक चरणदेखि अग्रता लिइरहेकी माओवादी केन्द्रकी शान्ति अधिकारीलाई एमालेकी उम्मेदवार कन्दकला रानाले उछिनेकी छन् ।

एमालेकी कन्दकला रानाले ९८ मतले पहिलोपटक अग्रता लिएकी छन् । मुख्य निर्वाचनको कार्यालय धनगढीले बिहान सार्वजनिक गरेको मतपरिणाम अनुसार रानाले १० हजार ८ सय ८० मतसहित अग्रता लिएकी हुन् ।

माओवादीकी अधिकारी १० हजार ७ सय २ मतसहित दोस्रो स्थानमा छिन् । उपमहानगरका ८, ९, १२, १३ र १४ वडाको मतगणना भइरहेको बेला एमालेकी राना अगाडि पुगेकी हुन् ।

उपमहानगरको ८ देखि १४ सम्मको वडामा राना समुदायकोको बसोवास बढी छ । वडा नम्बर ८ र ९ एमालेकी रानाको गृह वडा पनि हो । उपमहानगरको १३ वडाको गणना सम्पन्न भइसक्दा एमालेकी कन्दकलाले माओवादीकी अधिकारीलाई ५ देखि ७ सय कम मतले पन्छ्याउँदै आएकी थिइन् ।

अहिलेसम्म ५१ हजार ६५ बढी मत गणना भइसकेको छ । उपमहानगरका कुल मतदाता ९३ हजारमध्ये ६३ हजारले मतदान गरेका छन् । मेयरपदमा स्वतन्त्र उम्मेदवार गोपाल हमाल ११ हजार मतले अगाडि छन् । हमालले २२ हजार ५ सय ४१ मत प्राप्त गरेका छन् । नेपाली कांग्रेसका नृप बहादुर वडले ११ हजार ५ सय ४४ मत प्राप्त गरेका छन् । यस्तै एमालेका रण बहादुर चन्दले अहिलेसम्म ६ हजार ४ सय २३ मत पाएका छन् ।

प्रकाशित : जेष्ठ ७, २०७९ १८:०८
पूरा पढ्नुहोस्
प्रतिक्रिया
पठाउनुहोस्
×