नेपाल बैंकको कर्जा प्रवाह १ खर्ब ७६ अर्ब पुग्यो- बजार - कान्तिपुर समाचार
कान्तिपुर वेबसाईट
AdvertisementAdvertisement

नेपाल बैंकको कर्जा प्रवाह १ खर्ब ७६ अर्ब पुग्यो

कान्तिपुर संवाददाता

काठमाडौँ — नेपाल बैंकले निक्षेप संकलन तथा कर्जा विस्तार दुबैमा उल्लेख्य वृद्धि गरेको छ । वैशाख महिनामा नेपालका २७ वटा वाणिज्य बैंकहरुमध्ये निक्षेप संकलन तथा कर्जा प्रवाह वृद्धिदरको आधारमा नेपाल बैंक अगाडि देखिएको छ । 

असार मसान्तसम्मको तुलनामा वैशाख मसान्तसम्म नेपाल बैंकको निक्षेप २४ अर्ब ३५ करोड बढेको छ भने कर्जा ३१ अर्ब ९८ करोडले वृद्धि भएको छ । वैशाख मसान्तसम्म बैंककाे निक्षेप १ खर्ब ८७ अर्ब पुगेको छ भने कर्जा १ खर्ब ७६ अर्ब पुगेको छ । २७ वाणिज्य बैंकहरुमध्ये १९ वटाको निक्षेप वृद्धि भएको छ भने ८ वटाको कमी आएको छ ।

वैशाख मसान्तसम्मा वाणिज्य बैंकहरुसँग कुल निक्षेप ४३ खर्ब ६९ अर्ब रुपैयाँ पुगेको छ भने कुल कर्जा प्रवाह ४१ खर्ब ९१ अर्ब रुपैयाँ पुगेको छ । नेपाल बैंकर्स संघले उपलब्ध गराएको तथ्याङ्क अनुसार यस अवधिमा १८ वटा वाणिज्य बैंकहरुको कर्जा निक्षेप अनुपात (सीडी रेसियो) नेपाल राष्ट्र बैंकले तोकेको सीमा ९० प्रतिशत भन्दा बढी छ । नेपाल बैंकको सीडी रेसियो भने राष्ट्र बैंकले तोकेको सिमाभित्र नै (८९.६५ प्रतिशत) छ । औसतमा वाणिज्य बैंकहरुको कर्जा निक्षेप अनुपात ९०.८८ प्रतिशत रहेको छ । देशभर २१३ शाखाहरु, १७० एटिएम मेसिन साथै ४७ वटा एक्टेन्सन काउन्टर मार्फत करिब २० लाख ग्राहकलाई नेपाल बैंकले वित्तीय सेवा दिादै आएको छ ।


प्रकाशित : जेष्ठ ६, २०७९ १२:३९
प्रतिक्रिया
पठाउनुहोस्

माधव नेपालको वडामा एमालेको 'क्लिन स्विप'

कान्तिपुर संवाददाता

काठमाडौँ — काठमाडौं महानगरपालिका-३२ को अध्यक्षमा नेकपा एमालेका नवराज पराजुली निर्वाचित भएका छन् । पराजुली तेस्रो पटक वडाध्यक्ष बनेका हुन् । वडाध्यक्षसहित एमालेले महिला सदस्य, दलित महिला सदस्य तथा सदस्य पनि जितेको छ ।

काठमाडौं महानगरको जारी मतगणनामा वडा नं. ३२ को परिणामअनुसार पराजुली ५ हजार २ सय २५ मतसहित अध्यक्षमा निर्वाचित भएका हुन् । उनले ३ हजार १०८ मत पाइन् । पराजुलीले नेकपा एकीकृत समाजवादीकी सीतादेवी कँडेललाई पराजित गरे । उनी ०५४ मा पनि वडाध्यक्ष भएका थिए । ०७४ को निर्वाचनमा पनि उनी नेकपा एमालेबाटै उम्मेदवार बनेर निर्वाचित भएका थिए ।

महिला सदस्यमा हिरादेवी पोखरेल ५४ सय ८९ मत, दलित महिला सदस्यमा सिता विशुंखे ५२ सय ३५ मत तथा सदस्यमा भगवान बुढाथोकी ४४ सय ७१ र हरिबहादुर बस्नेत ४३१८ मत प्राप्त गर्दै विजयी भएका छन् ।

नेकपा एकीकृत समाजवादीका अध्यक्ष माधवकुमार नेपालको निवाससमेत रहेको यो वडामा कांग्रेस, माओवादी र नेकपा एकीकृत समाजवादीबीच गठबन्धन थियो । तर, अध्यक्ष नेपालकै वडामा उनको उम्मेदवार पराजित भएकी छन् । का‌ंग्रेसका तर्फबाट सुरुमा उम्मेदवारी परे पनि नाम फिर्ता लिने अन्तिम दिन सभापति शेरबहादुर देउवाले नै पत्र पठाएर उनको मनोनयन फिर्ता लिएका थिए भने माओवादीका उम्मेदवार राम भारतीले अन्तिम समयमा कँडेललाई समर्थन दिएका थिए ।

राष्ट्रिय प्रजातन्त्र पार्टीका विष्णुप्रसाद गजुरेलले ११६२, नेकपा माओवादी केन्द्रका राम भारतीले ११९ र विवेकशील साझा पार्टीका रवि रिमालले १५४ मत पाएका छन् ।

प्रकाशित : जेष्ठ ६, २०७९ १२:२९
पूरा पढ्नुहोस्
प्रतिक्रिया
पठाउनुहोस्
×