जनकपुरमा आफ्नै भवनबाट सिटिजन्स बैंकका सेवा सञ्चालन - बजार - कान्तिपुर समाचार

जनकपुरमा आफ्नै भवनबाट सिटिजन्स बैंकका सेवा सञ्चालन 

कान्तिपुर संवाददाता

काठमाडौँ — सिटिजन्स बैंकले जनकपुरको विद्यापती चोकस्थित आफ्नै सुविधा सम्पन्न भवनबाट सेवा संचालनमा ल्याएको छ । उक्त भवनमा पूजापाठ गरी बैंकका प्रमुख कार्यकारी अधिकृत गणेशराज पोखरेलले कारोबार सेवा उद्घाटन गरे ।

करिब ३७६७ वर्गफिटमा फैलिएको उक्त शाखाको उद्घाटन समारोहमा स्थानीय निकायका प्रतिनिधिहरू, उद्योगी, व्यापारी, विभिन्न संघ संस्थाका प्रमुख तथा नागरिक समाजका अगुवाहरुको उपस्थिति थियो । यसअघिको विद्यापती चोकको शाखा अब करिब ३०० मिटरको दूरीमा रहेको आफ्नै भवनमा स्थानान्तरण भएको बैंकले जनाएको छ ।

स्थानान्तरण भएको शाखाबाट ग्राहकहरूलाई प्राथमिकतामा राख्दै प्रिभिलेज काउन्टर समेत सुरुवात गरिएको छ । साथै यस शाखा मार्फत ग्राहकको वित्तीय आवश्यकता पुरा गर्न आवश्यक सम्पूर्ण रिटेल बैंकिङ सेवा प्रदान गर्नुका साथै साना तथा कर्पोरट व्यवसायीहरुमाझ वित्तीय पहुँच पुर्‍याउने बैंकको लक्ष्य छ । बैंकका देशभर १७४ वटा शाखा, १२३ वटा एटीएम र ९० वटा शाखा रहित बैंकिङ्ग इकाई सञ्चालनमा छन् । करिब १३ लाख ग्राहकले सेवा लिँदै आएको बैंकले जनाएको छ ।


प्रकाशित : माघ ३, २०७८ १५:४४
प्रतिक्रिया
पठाउनुहोस्

उत्तर कोरियाले फेरि गर्‍यो मिसाइल प्रहार

जापान र अमेरिकाको आपत्ति
एजेन्सी

सोल — उत्तर कोरियाले दुईवटा छोटो दूरीका ब्यालेस्टिक मिसाइल प्रक्षेपण गरेको छ । जुन यही महिनामा चौथो प्रहार हो । दक्षिण कोरियाली सेनाले उत्तर कोरियाको श्रृंखलावद्ध प्रहारबारे बताएसँगै उक्त प्रक्षेपणको संयुक्त राष्ट्रसंघको निन्दा गरेको छ ।

फाइल तस्बिर : केसीएनए/रोयटर्स

दक्षिण कोरियाली सैन्य गठबन्धनका प्रमुखले उत्तरले सोमबार राजधानी सुनान विमानस्थलबाट दुई ब्यालिस्टिक मिसाइल प्रहार गरेको जनाएका थिए । यस्तै जापान सरकारले पनि उक्त प्रक्षेपणलाई लिएर आपत्ति जनाएको छ । उत्तरको मिसाइल प्रक्षेपणले यस क्षेत्रको शान्ति र सुरक्षा खतरामा पारेको भन्दै जापान सरकारले घटनाको निन्दा गरेको हो ।

जापानी रक्षामन्त्री नोबुओ किशीका अनुसार उक्त क्षेप्यास्त्र उत्तर कोरियाको पूर्वी तटीय समुद्रमा खसेको देखिएको थियो । यस्तै उत्तरले लगातार क्षेप्यास्त्र प्रहार गर्नुको उद्देश्य उसको क्षेप्यास्त्र प्रविधि विकास गर्नु भएको नोबुओले बताए ।

'उत्तर कोरियाको बारम्बारको क्षेप्यास्त्र प्रक्षेपण जापानसहित अन्तर्राष्ट्रिय समुदायका लागि विनाशकारी समस्या हो,' जापानी रक्षामन्त्री किशीले बताए ।

यस्तै अमेरिकी सेनाको इन्डो-प्यासिफिक कमाण्डले उक्त प्रक्षेपणले अमेरिका वा यसका सहयोगीहरूलाई तत्काल खतरा नपार्ने जनाएको छ । तर यस्ता क्षेप्यास्त्र प्रक्षेपणहरूले उत्तर कोरियाको अवैध हतियार कार्यक्रमको अस्थिर प्रभावलाई जोड दिने जनाएको छ ।

उत्तर कोरियाले भने यसै वर्ष सुरु भएयता श्रृंखलावद्ध रुपमा क्षेप्यास्त्र प्रहार गर्दैआएको छ । गत साता मात्रै उत्तरका नेता किम जोङ उनले हाइपरसोनिक हतियार प्रक्षेपणको अवलोकन गरेका थिए ।

उत्तर कोरियाले आणविक हतियार राखेको भन्दै संयुक्त राष्ट्रसंघले पनि ब्यालिस्टिक प्रक्षेपणमा प्रतिबन्ध लगाएको छ । साथै अमेरिकासँग पहिलो पटक भएको आणविक निशस्त्रीकरण वार्ता पनि २०१९ यता स्थगित छ ।

शुक्रबार मात्रै उत्तर कोरियाली विदेशमन्त्रीले अमेरिकी प्रतिबन्धको आलोचना गर्दै अमेरिकाको द्वन्द्वात्मक दृष्टिकोणको कडा विरोध जनाएका थिए । छिमेकी चीनले पनि गत साता अमेरिकी प्रतिबन्धको आलोचना गरेको थियो । तर संवाद मार्फत् तनाब कम गर्न सबै पक्षलाई चीनको आग्रह थियो ।

प्रकाशित : माघ ३, २०७८ १५:३५
पूरा पढ्नुहोस्
प्रतिक्रिया
पठाउनुहोस्
×