टेलिकमको निमित्त प्रबन्ध निर्देशकमा प्रतिभा वैद्य - बजार - कान्तिपुर समाचार

टेलिकमको निमित्त प्रबन्ध निर्देशकमा प्रतिभा वैद्य 

कान्तिपुर संवाददाता

काठमाडौँ — नेपाल टेलिकमको निमित्त प्रबन्ध निर्देशकमा प्रतिभा वैद्य नियुक्त भएकी छन् । सञ्चार तथा सूचना प्रविधि मन्त्रालयबाट प्रबन्ध निर्देशकको पदका लागि दरखास्त आह्वान भएको तर हाल सो प्रक्रिया सम्पन्न भइनसकेको परिस्थितिमा कम्पनी नायब प्रबन्ध निर्देशक वैद्यलाई नै निमित्त प्रबन्ध निर्देशकको जिम्मेवारी दिइएको हो । 

सञ्चार तथा सूचना प्रविधि मन्त्रालयको सचिवस्तरीय निर्णयअनुसार वैद्यलाई निमित्त प्रबन्ध निर्देशकमा नियूक्त गरिएको टेलिकमले जनाएको छ । एक विज्ञप्ति जारी गर्दै टेलिकमले भनेको छ ‘आइतबारको पत्रानुसार मन्त्रालयको (सचिवस्तरको) निर्णयानुसार वैद्यलाई निमित्त प्रबन्ध निर्देशक भई कामकाज गर्न तोकिएको छ ।’

सोमबारदेखि नै उनले निमित्त प्रबन्ध निर्देशकको जिम्मेवारी सम्हालेको टेलिकमले स्पष्ट पारेको छ । वैद्यले सरकारको योजना तथा कार्यक्रमलाई सहयोग हुने कार्यक्रमहरु कार्यान्वयन गर्न सबै पक्षबाट सहयोग हुने विश्वास व्यक्त गरिन् ।


प्रकाशित : पुस १९, २०७८ १९:१२
प्रतिक्रिया
पठाउनुहोस्

क्रस होल्डिङ भएका लघुवित्तलाई मर्जरको कार्ययोजना पेश गर्न निर्देशन

कान्तिपुर संवाददाता

काठमाडौँ — बैंक तथा वित्तीय संस्थाको दोहोरो लगानी भएका लघुवित्त वित्तीय संस्थाले मर्जर तथा एक्विजिसनका लागि कार्ययोजना बनाएर राष्ट्र बैंकमा पेश गर्नु पर्ने भएको छ । राष्ट्र बैंकले सोमबार परिपत्रमार्फत उक्त निर्देशन दिएको हो ।

निर्देशन अनुसार क, ख र ग वर्गका बैंक तथा वित्तीय संस्थाको १० प्रतिशत भन्दा बढी सेयर स्वामित्व रहेका दुई वा सोभन्दा बढी लघुवित्त संस्थाले एकअर्कोसँग मर्जरको कार्ययोजना पेश गर्नुपर्नेछ ।

यस्तै, क, ख र ग वर्गका बैंक तथा वित्तीय संस्थाको ५१ प्रतिशतभन्दा बढी सेयर स्वामित्व रहेका लघुवित्त संस्थाले पनि मर्जर तथा प्राप्तिमा जान आउँदो असारभित्र कार्ययोजना पेश गर्न राष्ट्र बैंकले निर्देशन दिएको छ । करिब २४ लघुवित्त संस्थाहरु यसबाट प्रभावित हुने राष्ट्र बैंकले जनाएको छ ।


प्रकाशित : पुस १९, २०७८ १८:५१
पूरा पढ्नुहोस्
प्रतिक्रिया
पठाउनुहोस्
×