तीन विधामा ७९ सालको अन्तर्दृष्टि पुरस्कार घोषणा

अन्तर्दृष्टि नमुना शिक्षक पुरस्कार ललितपुरको नमुना मच्छिन्द्र माध्यमिक विद्यालयमा अध्यापनरत शिक्षक मञ्जु सुवेदीलाई प्रदान गरिने भएको हो । यस्तै, अन्तर्दृष्टि हातेमालो पुरस्कार काठमाडौंको पृथ्वीनारायण माध्यमिक विद्यालयमा कक्षा ९ मा अध्ययनरत विद्यार्थी दुर्गादेवी वाइबालाई प्रदान गरिने भएको छ । त्यस्तै, अन्तर्दृष्टि प्रोत्साहन पत्रकारिता पुरस्कार हिमालखबरमा कार्यरत पत्रकार अनिता भेटवाललाई प्रदान गरिने भएको छ।

अन्तर्दृष्टि नमुना शिक्षक पुरस्कारको रकम २० हजार रुपैयाँ, अन्तर्दृष्टि हातेमालो पुरस्कारको रकम १० हजार रुपैयाँ र अन्तर्दृष्टि प्रोत्साहन पत्रकारिता पुरस्कारको रकम रु. १० हजार रहेको छ ।

देशभरका समावेशी शिक्षा सञ्चालित विद्यालयमा कक्षा ८ देखि १० सम्म अध्ययन गर्ने विद्यार्थीहरूको सर्वेक्षणका आधारमा ‘अन्तर्दृष्टि नमुना शिक्षक पुरस्कार’ तथा ‘अन्तर्दृष्टि हातेमालो पुरस्कार’का लागि एक शिक्षक र एक विद्यार्थी छनोट गरिएको पुरस्कारका संयोजक होमनाथ अर्यालले जनाएका छन् । ‘अन्तर्दृष्टि प्रोत्साहन पत्रकारिता’ पुरस्कारको निर्णय भने समितिका सदस्यहरू होमनाथ अर्याल, डा. कमल लामिछाने, सुनिता थापा र सरिता लामिछानेको छनोटका आधारमा गरिएको पुरस्कार समितिले जनाएको छ ।

सबै पुरस्कार आगामी वसन्तपञ्चमीका दिन प्रदान गरिनेछ ।