काठमाडौंमा कलिंगा साहित्य उत्सव हुने - साहित्य/विविध - कान्तिपुर समाचार
कान्तिपुर वेबसाईट
AdvertisementAdvertisement

काठमाडौंमा कलिंगा साहित्य उत्सव हुने 

कान्तिपुर संवाददाता

काठमाडौँ — भारतमा स्थापित रहेको कलिंगा साहित्य उत्सवको पहिलो अन्तर्राष्ट्रिय संस्करण काठमाडौंमा हुने भएको छ । ओडिसाको राजधानी भुवनेश्वरमा विगत १० वर्षदेखि उक्त उत्सव हुँदै आएको छ ।

कलिंगा साहित्य उत्सवका संस्थापक निर्देशक रश्मीरञ्जन पाण्डेले भुवनेश्वरपछि पहिलो पटक काठमाडौंमा फेस्टिभल आयोजना गर्न लागिएको बताए । आगामी १५ र १६ अक्टोबरमा कार्यक्रम हुनेछ ।

उनले काठमाडौंमा हुने फेस्टिभलमा भारत र नेपालका साहित्य क्षेत्रका व्यक्तिको सहभागिता रहने बताए । भारतबाट कम्तीमा ३० जना प्रसिद्ध लेखकको सहभागिता रहने उनले बताए । ‘नेपालका ७० र भारतका ३० प्रतिशत वक्ताहरूको सहभागिता रहने गरी कार्यक्रमको डिजाइन गर्दैछौं,’ उनले भने ‘फेस्टिभलको छलफल र बहसको मुख्य विषय नेपालको कला संस्कृति र साहित्य रहने छ ।’ नेपालमा हिमालयन डायरी र राष्ट्रिका साहित्य प्रतिष्ठानको सहकार्यमा फेस्टिभल गर्न लागिएको पाण्डेले जानकारी दिए ।

फेस्टिभलले नेपाल र भारतबीचको साहित्य, संस्कृति, धार्मिक गातिविधि सबैलाई थपनजिक ल्याउन सहयोग पुर्‍याउने अपेक्षा राखिएको पाण्डेले बताए । साथै नेपाली लेखक र सहित्यलाई अन्तर्राष्ट्रिय प्रचारको अवसरसमेत मिल्ने उनले उल्लेख गरे ।

प्रकाशित : श्रावण २५, २०७९ १४:४१
प्रतिक्रिया
पठाउनुहोस्

नख्खु जेलभित्र बन्दीहरूको नाराबाजी र प्रदर्शन

कान्तिपुर संवाददाता

काठमाडौँ — ललितपुरको नख्खु कारागारभित्र कैदी बन्दीहरूले नाराबाजी र प्रदर्शन गरेका छन् । कारागार नाइकेले मनोमानी गरेको भन्दै बन्दीहरूले प्रदर्शन र नाराबाजी गरेका हुन् ।

नयाँ कैदी बन्दीसँग पैसा असुल्ने र महंगोमा सामान बिक्री गर्ने गरेपछि त्यहाँका नाइकेविरुद्ध अरु बन्दीहरू आन्दोलित बनेका हुन् । कारागार प्रशासनका एक कर्मचारीका अनुसार बुधबार बिहानैदेखि उनीहरूले नाराबाजी र प्रदर्शन गरेका हुन् ।

४ सयभन्दा धेरै संख्यामा रहेका बन्दीहरूले नाइके फेर्नुपर्ने लगायत माग गर्दै प्रदर्शन गरेका हुन् । यस क्रममा दुई समूहबीच झडप समेत भएको थियो ।

कारागार प्रमुख सुवास लामिछानेले भने सीमित व्यक्तिविरुद्ध अर्को समूहले नाराबाजी गरेको बताए । विरोधको क्रममा कारागारभित्र कुटपिट पनि भएको हुनसक्ने उनले बताए । तर यसबारे छानबिन हुने उनको भनाइ छ ।

तर कारागारभित्र अराजक गतिविधि गर्नेहरूको पहिचान गरी उनीहरूमाथि कानुनी कारबाही गरिने कारागार प्रमुख लामिछानेले बताए । 'सीमित व्यक्तिको विरोध गर्दै अर्को समूहले नाराबाजी गरेको छ । अराजक गतिविधि गर्नेहरूबारे हामी छानबिन गरेर कानुनी कारबाही गर्छौं,' कारागार प्रमुख लामिछानेले इकान्तिपुरसँग भने ।

कारागारभित्र भने बन्दीहरूका नाइकेले नयाँ बन्दीहरूसँग पैसा असुल्ने, महंगोमा सामान बिक्री गर्ने जस्ता दु:ख दिने गरेको असन्तुष्ट समूहको गुनासो छ । साथै नाइकेलाई कारागार प्रशासनले पनि कारबाही नगरेको भन्दै कारागार प्रशासनविरूद्ध पनि उनीहरूले नाराबाजी गरेका छन् ।

प्रकाशित : श्रावण २५, २०७९ १४:३८
पूरा पढ्नुहोस्
प्रतिक्रिया
पठाउनुहोस्
x
×