साहित्यकार भ्रमरको ५० औं कृति सार्वजनिक- साहित्य/विविध - कान्तिपुर समाचार

साहित्यकार भ्रमरको ५० औं कृति सार्वजनिक

श्यामसुन्दर शशि

जनकपुर — मैथिली र नेपाली भाषाका चर्चित साहित्यकार रामभरोस कापडी ‘भ्रमर’द्वारा लिखित ‘मिथिलाक लोकजीवन : लोक सन्दर्भ’ सार्वजनिक गरिएको छ ।

आइतबार नेपाल प्रज्ञा प्रतिष्ठानका कुलपति गंगाप्रसाद उप्रेतीले भ्रमरको ५०औं कृति लोकार्पण गरेका हुन् । पुस्तक लोकर्पण समारोहलाई सम्बोधन गर्दै कुलपति उप्रेतीले पुस्तकलाई राष्ट्रिय र अर्न्तराष्ट्रिय महत्त्वको कृति भएको टिप्पणी गरे । 'मैथिली स्वयंमा दुई देशीय भाषा हो । नेपाल र भारत दुबै भुगोलमा बोलिन्छ । यसको प्रकाशक अमेरिकास्थित मिथिला सेन्टर हो । यस अर्थमा यो पुस्तक अर्न्तराष्ट्रिय महत्त्वको छ ।’

मैथिली साहित्य नेपालको साहित्यिक इतिहासको महत्वपूर्ण अंग भएको उल्लेख गर्दै उनले मल्लकालमा राजभाषाको रुपमा चलनमा रहेको मैथिली बीचका केही वर्ष राजनीतिक कारणले ओझेलमा परे पनि अहिले पुन : उजागर हुन लागेको बताए ।

‘मैथिलीबिना नेपालको साहित्यिक इतिहास पूरा हुनै सक्दैन । मैथिली साहित्यको इतिहास खोज्दै जाँदा यो अत्यन्त प्राचिन तथा सम्मुनत देखिन्छ ।’ उप्रेतीले भनेका छन् ।

लोकार्पण कार्यक्रममा साहित्य भारतका समीक्षकहरु डा. भीमनाथ झा, डा. रमानन्द झा रमण, चन्द्रेशसँगै डा. रेवतीरमण लाल, डा. भोगेन्द्र झा, नित्यानन्द मण्डल, कोलकताका साहित्यकार अशोककुमार झा, राजविराजकी करुणा झा, बिराटनगरका प्रविणनारायण चौधरीसँगै मिथिला सेन्टर अमेरिकाका नवल यादवलगायतले पुस्तक तथा लेखक रामभरोस कापडी 'भ्रमर'बारे बोलेका थिए ।

मिथिला सेन्टर, अमेरिकाद्वारा प्रकाशित २ सय ८४ पृष्ठको यस पुस्तकमा मैथिली भाषा, साहित्य, कला, संस्कृति, इतिहास र भूगोल विषयक खोजपूर्ण लेख, निबन्ध आदि प्रकाशित छन् ।

साहित्य समीक्षक डा. रमानन्द झा रमणले भ्रमरको पुस्तक पढेपछि नेपालको पछिल्लो ५० वर्षको इतिहास बुझ्न सजिलो भएको बताएका थिए ।

‘साहित्य समाजको ऐना हो भनिन्छ । भ्रमरद्वारा लिखित मिथिलाक लोकजीवन : लोक सन्दर्भ पुस्तक पढ्दा नेपालको ५० वर्षमा घटित राजनीतिक, सामाजिक तथा सांस्कृतिक घटनाहरु बुझन सजिलो भयो,’ डा. रमणले बताए ।

यससँगै ५० वर्षीय भ्रमरका ५० कृति प्रकाशित भइसकेका छन् । साहित्यिक यात्रामा ५० पुस्तक लेख्न भ्याएकोमा उनले खुसी व्यक्त गरेका थिए । साथै यस पुस्तकले आफूलाई खुसी बनाएको र ऊर्जा प्रदान गरेको प्रतिक्रिया दिए ।

प्रकाशित : वैशाख २५, २०७९ २०:५७
प्रतिक्रिया
पठाउनुहोस्

कांग्रेस जनकपुर नगर सभापति साहले दिए राजीनामा 

मेयरमा स्वतन्त्र उम्मेदवारी दिने    
श्यामसुन्दर शशि

जनकपुर — नेपाली कांग्रेस जनकपुर नगर समितिका सभापति मनोज साहले पार्टीबाट राजीनामा दिएका छन् । विद्यापति चोकमा रहेको घरमा शुक्रबार पत्रकार सम्मेलन गरी उनले राजीनामाको घोषणा गरेका हुन् । उनले वैशाख ३० गते हुने निर्वाचनमा जनकपुरधाम उपमहानगर पालिकाको मेयर पदमा स्वतन्त्रतर्फ उम्मेदवारी दिने पनि बताए । 

‘सत्ता गठबन्धन दलको निर्णयप्रति हाम्रो असहमति छ । उपमहानगरपालिकाका २५ वटै वडासमितिका पदाधिकारी, कांग्रेस नेता,कार्यकर्ता तथा शुभेच्छुकहरुको सल्लाहअनुसार पार्टीबाट राजीनामा गरेको छु । असली कांग्रेस हामी हौं । कांग्रेसीहरु मलाई नै मतदान गर्छन् भने विश्वास छ,’ उनले भने ।

मनोज साहसँगै जनकपुरधाम उपमहानगर पालिका १५ रामपुरका वडासभापति नन्दलाल साहसहित सिंगै कार्यसमिति, वडाका क्रियाशील सदस्य, क्षेत्रीय प्रतिनिधि, महाधिवेशन प्रतिनिधि तथा शुभेक्षुक संघ संस्थासँग आबद्धहरुले पदबाट लिखित राजीनामा दिएका छन् । २५ वटै वडाका कांग्रेस नेता कार्यकर्ताहरुले राजीनामा दिने मनस्थितिमा छन् ।

बुधबार सत्ता गठबन्धन दलका शीर्ष नेताहरुको बैठकमा जनकपुरधाम उपमहानगरपालिकाको मेयर पद जनता समाजवादीको भागमा परेको थियो ।

प्रकाशित : वैशाख ९, २०७९ १६:४९
पूरा पढ्नुहोस्
प्रतिक्रिया
पठाउनुहोस्
×